चिराग फिल्मस्या ब्यानरय् निर्माण जूगु एतिहासिक बुद्धकालीन नेपालभासाया संकिपा घोषक पाखें न्हूदँ ११४२या लसताय् भिंतुना कालबिल ज्याझ्वः लिसें च्यापान ज्याझ्व असाेज ६ गते विशाल बजार स्थीत बेन्टो लाउन्ज एण्ड बारय् जुल । प्याखँया निर्माता रोशन बज्राचार्यया सभापतित्वय् छगू औपचारीक ज्याझ्वः याना भिंतुना कालबिल याःसें थी थी संघसंस्थाया उपस्थीति नं दुगु खः ।
ज्याझ्वलय् ईलोहं प्रकाशनया प्रबन्ध निर्देशक नरेशवीर शाक्यं घोषक प्याखनय् नेपालभासाया प्याखँ जुगु व बुद्ध दर्शन दुगु कारण झीसं थुगु प्याखँ स्वये हे माः धकाः बिचाः प्वंकादीगु खःसा थःम्हं हे प्याखँ वा छुं नं बिषय मस्वयेकं मेपिंसं धाःगु खँयात पत्याः यानाच्वने मज्यु धकाः बुद्ध शिक्षा नं लुमंका ब्यूगु खः । ज्याझ्वलय् बज्राचार्य समन्वय परिषदया नायः अनाररत्न बज्राचार्यं बुद्धधर्मया प्रचारया हेतु घोषक संकिपाया कुतः तसकं हे च्वछाय् बहजू धकाः तारिफ यानादीगु खः । ज्याझ्वलय् शाक्य समाजपाखें डा. लक्ष्मण शाक्य, परम्परागत बौद्धधर्म संघ पाखें दयानन्द शाक्य, ज्ञानमाला भजन पाखें पुर्णकाजी ज्यापू, बज्राचार्य क्लब पाखें ज्योति बज्राचार्य, वरिष्ठ सिने पत्रकार बिजयरत्न असंबरे व मूपाहां तपश्वी भन्ते नं नुगः खँ तयादीगु खः ।
ज्याझ्वलय् वरिष्ठ कलाकार एवं घोषक प्याखँया प्रतिनिधीत्वयाना राजेन्द्र मान शाक्यं लसकुश यानादीगु खः सा प्याखँया निर्देशक अमृतचन्द्र श्रेष्ठं नेपालभासाय् प्याखँ दयेकेगु धैगु फिइ लः तयेगु सरह मखु । थःपिंसं मेहेनत याना वन धाःसा लगानी लिसें लवः नं काये फइ धकाः खँ तयादिल । पाहांपिं सकसितं प्याखँया मेम्ह निर्माता प्रेमा शाक्यं लसकुश याना खादा न्येकादीगु खः ।
घोषकया प्रिमियर अशोजया ९ गते जूगु खःसा प्याखँया मेगु शो वइगु कार्तिक २७ गते अष्ट नारायण हल, बालाजुइ स्वंगू शो क्यनेत्यंगु दु ।
ज्याझ्वलय् बज्राचार्य कल्ब पाखें छगू शाे, पूर्णकाजी ज्यापू पाखें छगू शाे व पासा पुचः पाखें वइगु २७ गतेया शाेया निंतिं १००पाः टिकट नं काःगु खः ।
