नगिना जाेशी छम्ह कुशल अभिनेतृ जक मखुसे छम्ह कुशल म्ये हालामिनं खः धकाः हाकनं छक्व पुष्टि जुइ कथं करुण रसं जाःगु घातु म्ये ‘न्ह्योखा हाल…’या म्यूजिक भिडियाे प्रिमियरय् खने दत । न्ययेदँ खुइदँ न्ह्यः जनकवि दुर्गालाल श्रेष्ठ च्वसां पिज्वःगु पाहाँचःह्रे धूनया लसय् तयार जूगु थुगु म्येय् नगिना जाेशीया जहान अकलमान महर्जनया नं परिपक्व सः दुथ्यानाच्वंगु दु । लाेकलसय् दुगु थुगु म्येया संगीत संयाेजन जीवित जल्मीं यानादीगु खः ।
खुइदँ न्ह्यःया थुगु म्येलय् प्राण तयाबिल धकाः च्वमि दुर्गालाल श्रेष्ठं मन्चय् न्ववाःगु खःसा थुगु म्ये रामकृष्ण खड्गीया निर्देशनय् तयार जूगु खः ।
नेवाः न्ह्यलुवा पबित्र बज्राचार्यया सभानायःसुइ जुउगु उगु पितब्वज्या ज्याझ्वःया मूपाहाँ जनकवि दुर्गालाल श्रेष्ठं त्वाःदेवाय् मत च्याका उलेज्या यानादीगु खः ।
ज्याझ्वलय् नांजाःम्ह म्येहालामि जुजुकाजि रन्जित, नेपालभाषाया वरिष्ठ सिने पत्रकार विजयरत्न असंबरे, नांजाःम्ह संगीतकार न्ह्यू बज्राचार्य व न्हूदँ राष्ट्रिय समारोह समितिया नायः निरन्जनरत्न शाक्यं मनतुना तयादीगु खः ।
ज्याझ्वलय् नगिना जोशीया छय् मयजु लुमिला जोशीं लसकुस यागु खः । भिडियो मतिना इन्टरटेंटमेंटया यूट्युबपाखें सार्वजनिक जूगु खः । थ्व म्येय् नगिना जोशी व अकलमान महर्जनया नापनापं बिजयमान सिंह, सरिता बज्राचार्य व मचा प्याखंम्वः पालिजा मानन्धर खड्गीया अभिनय दु ।
