शास्त्रीय संगीतया बिकासया निंतिं यलमाया केन्द्रं हरेक महिनाया २ गते शास्त्रीय संगीत ज्याझ्वः यानावयाच्वंगु दु । थ्व हे झ्वलय् कार्तिक २ गते यलमाया क्लासिकया १८५ औं ब्वय् क्लासिक कल्चर सेन्टर, सुन्धारा पाटनपाखें भरतनात्यम नृत्य न्ह्यब्वल।
नेपाःया इतिहासय् नृत्यया थी थी विधाय् विविध एकल प्रस्तुति लिसें छुं ई न्ह्यो भारतया बनारस हिन्दु विश्वविद्यालय पाखें भरतनात्यम नृत्यय् स्नात्तकोतर यानादीम्ह स्वजन रघुबंशी व वय्कया खुम्ह शिष्यपिं सिद्धार्थ श्रेष्ठ, गर्दिस्मा मल्ल, सदिक्ष्या पौडेल, सम्झना थुसा, पलेस्वा रघुबंशी व साद्भि नकर्मीं भरतनात्यम नृत्य न्ह्यब्वःगु खः ।
थुगु ज्याझ्वलय् पुष्पान्जली, अल्लारिपु, वर्नम, हनुमान चालिसा, मालसी व महिसासुर मर्दिनि स्तोत्रया समायोजन नृत्य, स्लोक, भो शम्बो कृतनम व कोरोनाया महामारी थुगु संसारं याकनं हे क्वलाना वनेमा धकाः सर्वे भवन्तु सुखिन नृत्यनं न्ह्यब्वःगु खः । ज्याझ्वलय् मालसी नेवा परम्परागत भजनयात भरतनात्यम नृत्य शैलिइ न्ह्यब्वःगु खः ।
सभ्य, भब्य व आनन्दित लकसय् जूगु थुगु ज्याझ्वःया न्हापांगु चरणय् म्येनं हाःगु खः । सनिल लामाया सः, जगथनाथ धैगोदाया तबला व गुरु श्री के सिं हर्मोनियम थाःगु खः । थुगु ज्याझ्वःया आयोजक यलमाया ढोकामा क्याफे खः।
