कीर्तिपुर नगरपालिकापाखें नेपाल संवत् ११४२या लसताय् कीर्तिपुर सिङ्गिङ आइडल–११४२ या घाेषणा किपू नगरपालिकाया मेयर रमेश महर्जनं याःगु दु । थुगु कासाय् न्हाप लाःम्हेसित ५० हजार तका, ल्यू लाःम्हेसित ४० हजार व लियांल्यू लाःम्हेसित ३० हजार तकाया घाेषणा नं याःगु दु । किपू नगरपालिकाया दुनेच्वंपिं १४ वर्ष पूरा जुयाः ३० वर्षं क्वकालि म्येहालामिपिंत सांगितिक क्षेत्रय् आकर्षित यायेगु निंतिं हे थुगु ज्याझ्वः यायेत्यंगु खः ।
थ्व हे झ्वलय् असोज २७ गते महाष्टमीया दिं खुन्हु थुगु कीर्तिपुर सिङ्गिङ आइडल–११४२ या संयोजक हरिशरण साय्मिया स्ट्रिङ्ग्स स्टुडियो, अनामनगरय् थुगु म्ये सिग्नेचर म्यूजिक तयार याःगु खः । थुगु म्ये तयार यायेगु निंतिं किपूया लाेकंह्वाःपिं म्येहालामिपिं एवं समितिया सदस्यपिं सतिश महर्जन, राजेश महर्जन, सविन श्रेष्ठ, सन्तोष महर्जन, कृष्णहरि महर्जन, रुविन श्रेष्ठ, स्वस्ती महर्जन, रानीशोभा महर्जन, रत्नशोभा महर्जन, रीता महर्जन, राजु महर्जन, न्हुच्छे दर्शनधारी लिसें थी थी लाेक बाजं थाना रेकर्ड याःगु खः।
थुगु कासाय् ब्वति कायेत कीर्तिपुर नगरपालिकाया आधिकारीक वेवसाईट य्अनलाइन फारम भरे याये माः । अथे हे नगर सन्देश व कीर्तिपुर सिङ्गिङ आइडल–११४२ या फेसबुक पेज स्वयेत नं इनाप यानातःगु दु ।
