नेपालभासा ख्यलय् छगू ह्युपाः हःगु ज्याझ्वः नेपालभासा चीहा संकिपाकासा खः । थुगु चीहाः कासाया कारण यक्वं हे न्हूगू नेवाः पुस्ता नेपालभासा ख्यलय् न्ह्यचिलाच्वंगु दु । आकर्षित जुयाच्वंगु दु । थुगु हे ज्याझ्वलं नेपालभासाया चिहाः संकिपायात विश्वबजारय् तकं थ्यंकाब्यूगु दु । दँय् दसं न्ह्याकाच्वंगु चीहाः संकिपाः कासा धाःसा वंगु दँ काेराेनाया कारण जुइमफूत । तर थुगुसी कासा याना यंकेगु ताःतुनां सामाजिक संजालय् चर्चा जुयाच्वंगु दु । थुगु हे बिषयलय् नेपालभासा चीहाःसंकिपा कासाया छम्ह दुजः प्रविण ताम्राकार लिसेया खँल्हाबल्हा । थौं कन्हे वय्कलं अमेरिकाय् नेवाः टक प्रोगामया होष्ट नं यानाच्वनादीगु दु ।
नेपालभासा चिहाः संकिपा कासाया उद्देश्य छु खः ?
नेपालभासा चीहाः संकिपाया आज्जु धयागु नेपालभासं चीहाः संकिपा दयेकेगु लँपु नालाः नेपालभासा च्वन्ह्याकेगु खः । अथे हे, संकिपा दयेकेगु ज्याय् प्रतिभा दुपिं संकिपाकःमिपिंत हःपाः जुइगु ज्या यायेगु खः ।
थुकीया आयोजक व आयोजनाया बिषयलय् छुं खँ कनादिसँ ।
थुकिया ग्वसाः नेपालभासा चीहाः संकिपा कासा ग्वसाः पुचः खः । थुगु पुचलय् अमेरिकाय् दिइपिं प्रविन ताम्राकार, अनिल रंजितपिं खःसा नेपालय् सुमन श्रेष्ठ, सुरेशकिरण, पवित्र कसाःपिं खः । अले , थुगु ज्या सुथां लाकेत अमेरिकाय् दिइम्ह मार्कण्डेय मानसिंह प्रधान लिसें नेपाः पासापुचः अमेरिकाय्, नेवाः अर्गनाइजेसन अफ् अमेरिका थें जाःगु खलः पुचलं अमेरिकाय् संकिपा क्यनेत माःगु ग्वहालि यानाच्वंगु दुसा थन नेपालय् विजय रत्न असंबरे, तेज महर्जन, आलोक सिद्धि तुलाधर लिसें संकिपा क्यनेत माःगु ग्वहालि बियाः गुण सिनेमा हल, अष्टनारायण हल, बाराहि सिनेमा हल व मेवमेवपिं आपाःसिनं फुथेचाःथे ग्वहालि यानादिइगु दु । थ्व पुचलं आः नेपालभासा टाइम्स चीहाः संकिपा कासा नां छुनाः थुगु चीहाः संकिपा कासा न्ह्याकागु च्वनागु खः। थ्व नामं आः जुइगु कासा निक्वःगु खःसा चीहाः संकिपा कासाया ग्वसाः कथं स्वक्वःगु खः।
लकडाउनय् ध्यबाया समस्या जुयाच्वंगु इलय्, प्याखं दयेके बियाः कासा यायेमाःगु छाय् थें?
खयेत ला थ्व स्वक्वःगु कासा थगुने हे क्वचायेमाःगु खः । अथेसां, हलिं न्यंक ब्वलंगु कोभिद ल्वय्या हुनिं लकडाउन जुयाः थगुने क्वचायेके मछिन । आः थुगुसिइ थगुने थें कोभिद ल्वय् तच्वः खनेमदुगुलिं सरकारं लकडाउन नं छ्वासुकुगु जुयाः थुगुसिइ थ्व कासा यायेमालिइ धकाः ग्वसाः ग्वयाच्वनागु खः । फछिंफतले दँय्दँस याना हे च्वनेगु ग्वसाः खलःया आजु खः । व हे कथं थुगुसिइ यानाच्वनागु खः ।
चिहाः संकिपा (Short movie) यात थुगु फेस्टिभलं गुकथं परिभाषित यानातःगु दु ?
चीहाः संकिपा धकाः धायेबेलय् थुकिया प्राविधिक खँ बिसकं दइगु खयां नं थ्व ग्वसाः खलकं आःयात ईया हाकलं चीहाकःगु संकिपा यात हे चीहाः संकिपा नाला कयाच्वनागु दु । अथे धकाः चीहाः संकिपाय् दयेमाःगु प्राविधिक खँयात ब्यागलं तयाच्वनागु मदु । थुगु कासाया ल्यज्या पुचलय् संकिपा ख्यलय् थःत पानाच्वनादिइपिं व दिइधुंकुउपिं प्राविधिकपिं दइगु जुयाः वय्कःपिंसं चीहाः संकिपाय् दयेमाःगु प्राविधिक खँयात नं बिचाः यानाः सिरपाःया निंतिं ल्ययेगु ज्या याना दिइगु दु।
थुगुसीया थीम बारे धयादिसँ ।
थुगुसिइ संकिपा दयेकाः ब्वति काइपिंसं मचा साहित्य बा मचा मनोविज्ञानया लिधंसाय् दयेकेमाःगु धकाः क्वःछिनागु दु । अथे धयागु, मचा लिसे स्वाःगु न्ह्यागु नं खँ दुथ्यागु संकिपा दयेके जिउगु जुल । अले, थ्व संकिपाय् मचा कलाकार दये हे माःगु जक मखु मचा कलाकारपिंसं नेपालभासं खँ ल्हानातःगु दये हे माःगु धकाः नं क्वःछिनागु दु । थथे दयेका दिइगु चीहाः संकिपा ११४१ कउलागाः आमइ, लक्ष्मीपुजा कुन्हु तक दुने दुतिने माःगु कथं नं क्वःछिनागु दु ।
थुगु चीहाः संकिपाः कासाय् क्राइटेरिया ब्वतिकायेगु निंतिं टेक्निकल पक्षयात बःबियातःगु दु । तर थुकीया लिच्वः धाःसा टेक्निकल पक्षयात बेवास्ता यानातःगु खने दु । थथे खः ला ? भावनात्मक रूपं नेवाः फिल्म फेस्टीभल खःसा भावनात्मक जक क्राइटेरिया तःसा मगाः ला ?
ग्वसाः खलकं नेपालभासा च्वन्ह्याकेगु मनंतुनां थ्व चीहाः संकिपा कासा ग्वसाः ग्वयागु खःसां थुकिइ प्राविधिक खँयात नं उतिकं बः बियागु दु । गथेकि, संकिपा35mbps/sec data rateपाः मजुइकFull HD जुइमाःगु , सः बांलायेमाःगु (जिउसा दबिंग यायेगु ), इंग्लिश भासं sub– tittleतये माःगु । उकथं हे ल्यज्या पुचःया दुजःपिं संकिपाकःमिपिं हे जुइगु जुयाः वय्कःपिंसं गथे यानाः संकिपा दयेकल धयागु खँय् थःथःगु ख्यःया प्राविधिक खँयात नं बांलाक कुलाः स्वयादिइ । उकिं थ्व कासा धात्थेंया हे कासा खः । कासाया निंतिं जक कासा मखु ।
छगू चिहाः संकिपाया निंतिं प्याखँ कथं निर्देशकयात जक हाइलाइट याइगु ज्याः जुयाच्वन, जबकि थुकी कलाकार एवं प्राविधिक पक्ष नं उलि हे सशक्त जुइ माः, तर सिरपाःया सवालय् प्याखँयात जक मखुसे मेमेगु पक्षयात नं पुरस्कृत यायेगु ग्वसाः दु ला ?
थुकथंया थीथी सिरपाः बिइत नं ग्वसाः खलकं कुतः यानाच्वंगु दु ।
कोभिडया इलय् थुगु चिहाः संकिपायात गुकथं एक्जिक्युट यायेगु ग्वसाः दु ?
कोभिद ल्वय्या हुनिं खय्तला ई मल्वः थें हे जुयाच्वंगु दु । अथे खःसां तबि, सरकारं बियातःगु कथंया उजंयात नालाः थुगु कासा क्वचायेकेगु जुइ ।
थुगु फेस्टीभलय् अकसर नियमत हिलाहिला च्वं, गब्लें डेड्लाइन हिलि, गब्लें शो हे फिक्स जुइ मखु, गब्लें टिकट शो धाइ … थथे छिनछिनं नियम हिलाच्वनिगु धैगु आन्तिरिक ब्यवस्थापन शसक्त मजूगु धकाः धाये ज्यू ला ? थुगुसी नं टिकट शो जुइ ला ?
नेपालभासाया संकिपा ख्यः तसकं लिकुनाः वनाच्वंगु इलय् सकसितं छिंक व सकसिनं दयेके फयेमा धकाः हःपाः बिइकथं थुकथंया चीहाः संकिपा कासा ग्वसाः ग्वयागु जुयाः इलय्ब्यलय् छुं भचा नियम उख्येथुख्ये यायेमाःगु नं जुयाबिल । थथे यायेमाःगु धयागु ग्वसाः खलकं थःत छिंकेगु सिबय् संकिपाकःमिपिंत ज्या छिनेमा धकाः यानागु खः । ग्वसाःखलःयात नं थीथी इलय् थीथी कथं वइगु पंगलं यानाः ज्याखँ न्ह्याकेत थाकुयाच्वनिइगु खःसां थुज्वःगु पंगःयात चिइकाः ग्वसाःखलकं मदिक न्ह्यायेगु कुतः यानाच्वंगु दु ।
थुगु चीहाः संकिपा कासा ग्वसाः पुचःया मेवगु आजु धयागु संकिपा दयेकाः कासाय् ब्वति कया दिइपिंत आर्थिक कथं गुकथं ग्वहालि यायेफइ धकाः स्वयेगु नं खः । कासाय् सिरपाः लाःपिंत सिरपाः कथं दां तका लःल्हायेगु जक मखु ब्वति काःगुदक्व संकिपायात तक नं ल्हाः मप्वंक धकाः दांतका बिइगु यानाच्वंगु हे दु। उलि जक मखु, कासाय् दुतिँउ वःगु दक्व संकिपा गुलि फु उलि अप्वः थासय् क्यनाः मुंगु धेबाय् संकिपाकःमिपिंत ६०% व ग्वसाः खलकं ४०% कायेगु यानाः इना बियागु नं दु । थथे थीथी कथं ग्वसाः ग्वयाः ज्या यायेबेलय् गुबलय् गुबलय् धाः थे मजुयाः छुं भचा ज्याखँ पाः वंगु नं दु । थथे मजुइकेगु कुतः नं मदिक जुयाच्वंगु दु ।
प्याखँ क्यनेगु इलय् हे पुरस्कार वितरण याना लिच्वः बिइगु याइ की थुगुसी स्क्रीनिंग अलग्ग अले सिरपाः बिइगु अलग्ग जुइ ?
थुगु चीहाः संकिपा कासाया सिरपाःया नां नेपालभासा न्हिपौ नेपालभासा ताइम्सया नामं नेपालभासा ताइम्स चीहाः संकिपा कासा धकाः तये धुनागु जुयाः नेपालभासा ताइम्स न्हि पतिं ११४२ कछला – थिंला पाखे ग्वसाः ग्वइगु नेपालभासा साहित्य नखः ज्याझ्वलय् सिरपाः लाःगु संकिपाया नां न्ह्यथनाः अन हे सिरपाः लःल्हायेगु ग्वसाः दु ।
