च:मति सँकिपा: प्रोडक्सनया निर्माणय् न्हूगु नेपालभाषाया संकिपाः तुयूया शुभ मुहूर्त येँ महानगरपालिकाया मेयर विद्या सुन्दर शाक्यं मार्खुया डी लेकसाइद सिम्लाङ हाेटलय् यानादिल।
नेपाया पुलांम्ये सिलुया आधारय् दयेके त्यंगु थुगु प्याखँ खः । झीगु समाजय् सिलु तीर्थय् वनां म्वःल्हूवंसा धाःसा धर्म लाइ धैगु जन विश्वास दु । उकथं हे मिस्त सिलु तीर्थय् वने मज्यु धैगु नं जन विश्वसा दु । थुगु हे जनविश्वासया आधारय् व सिलु म्येया लिधंसाय् थुगु तुयू प्याखँ दयेकेत्यंगु खः ।
फिल्मया शुभ मुहुर्तया निंतिं चःमति निसें चित्लाङ तक्क ‘तुयू’ प्याखँया कलाकर्मि थ्यंकःवंगु खः । निर्माण पक्षपाखें शुभ मुहुर्त लिपा ऐतिहासिक नगर चित्लाङया आन्तरिक पर्यटन प्रवर्द्धनया निंतिं नगर भ्रमणनं याकुगु खः ।
‘सिलु म्ये’ मिजं पात्र व मिसा पात्र दथुया संवाद खः । झीगु पुलांम्येया हे आधारय् पूर्णकाजी ज्यापूं प्याखं दयेकेत्यंगु खः। प्याखँया म्ये, बाखं व संवाद पूर्णकाजी ज्यापूं हे च्वःगु खःसा सोहन मानन्धरं छायाङ्कन लिसें प्याखंया पटकथा व सम्पादन नं यायेत्यंगु खः । जुलग डंगोलया संगीत थुगु प्याखनय् दुसा प्याखँया निर्देशकय् पूर्णकाजी ज्यापू व अनुज डंगोल दु।
याकनं हे प्याखंया छायाङ्कन सुरु जुइगु निर्माण पक्षं धाःगु दु । थुकी रेशमी महर्जन, योगेन महर्जन व राजेन्द्र महर्जनया मू कलाकार कथं ल्ययातःगु दु ।
