असोज २३ गते पेजथ्री अवार्डया घोषणा
कार्तिक १४ गते तक्क नां दुथ्याइ,
पुष १० गते नामांकन ज्याझ्वः
पुष २४ गते पेजथ्री अवार्डया मू ज्याझ्वः
पेजथ्री बाःछिपौया न्ह्यब्वया पेजथ्री पिपल्स च्वोइस अवार्ड ११४२या घोषणा विशालबजार स्थीत बेन्टो लाउन्ज एण्ड बारय् जुल । अवार्ड अन्तर्गत न्हापा थें हे नेपालभासाया मनोरंजन ख्यः कथं संगीत ख्यः, संकिपाः ख्यः व म्यूजिक भिडियो ख्यःयात कःघाना अवार्ड बिइगु जानकारी पेजथ्री अवार्डया कजि दर्शनवीर शाक्यं प्रेस सम्मेलन याना बियादिल ।
२०७४ साउन २० निसें २०७८ कार्तिक १४ गते तक्कया नेपालभासाया संकिपा, म्युजिक भिडियो व संगीतया कृति दुथ्याइ
पेजथ्री पिपल्स च्वइस अवार्डंं ११४२य् पेजथ्री अवार्ड ११३७या संस्करण लिपा निसें ११४१ कौलागा चौथी अर्थात विसं २०७४ साउन २० निसें विसं २०७८ कार्तिक १४ गते तक्कया नेपालभासाया संकिपा, म्युजिक भिडियो व संगीतया कृति दुथ्याइगु जानकारी नं ब्यूगु खः । थुगु हे ई दुने दर्ता जूगु कृति पाखें हे ज्युरी प्यानलं नामांकन ल्यइगु व उकियात हे भोटिंगया आधारय् पिपल्स च्वोइस अवार्ड ल्यइगु खँ नं जानकारी ब्यूगु दु ।
ज्याझ्वलय् पेजथ्री अवार्डया मेम्ह दुजः अर्विन्द्रमान सिंपाखें अवार्डया नियम व फारम भरेयायेगु बिषय जानकारी बियादीगु खः। १६ वडा यलया अध्यक्ष निर्मलरत्न शाक्य व बिजयरत्न असंबरे पाहां कथं अवार्डया घोषणा ज्याझ्वलय् उपस्थीत जुयादीगु खः । निर्मलरत्न शाक्यं पाखें आ पेजथ्री अवार्ड राज्य स्तरं हे न्ह्याकेमाःगु खँतयादिल । वरिष्ठ सिने पत्रकार विजयरत्न असंबरें अवार्डयात विवादित मयासे झी न्ह्यां वनेमाः धकाः सन्देश बियादिल । ईलोहं प्रकाशनया प्रबन्ध निर्देशक नरेशवीर शाक्यं मनोरंजन ख्यःयात हःपाः बिइगु निंतिं ईलोहं प्रकाशनं पेजथ्री अवार्ड यानाच्वनागु खँ धयादिल । ज्याझ्वःया अन्तय् अन्तरक्रियात्मक न्ह्यसःलिसः नं जूगु खः ।
थुगु संस्करणय् स्वतां ख्यः पाखें मुक्कं ३७गू पिपल्स च्वोइस अवार्ड बिइगु धाःगु दुसा कृति दुथ्याःगु आधारय् न्हूगु विधाः नं थप जुइ । पेजथ्री संगीत अवार्डय् भजन संगीत व पुचः म्ये नं विधा कथं दुथ्याकेगु धाःसें थुगुसी विशेष रुपं ज्यूरी अवार्डनं दुथ्याइगु जूगु दु । थुकीया निंतिं ज्युरी पाखें हे निर्णय यायेफइगु ग्वसाः नं ग्वयातःगु दु । लिसें लाइफटाइम एचिभमेन्ट अवार्ड मनोरंजन क्षत्रय् योगदान याःम्ह व्यक्तियात नं लःल्हाइ ।
अवार्डय् दर्तायायेगु निंतिं छपू म्ये वा म्युजिक भिडियोया निंतिं १०००तका क्वछिनातःगु दु । १००० तका पुलेवं उकिया कलाकार एवं प्राविधिक फुक्कं हे दुथ्याइगु खःसा नेपालभासाया प्याखँया नितिं धाःसा मुक्कं ३५०० तका क्वछिनातःगु दु । पेजथ्री पिपल्स च्वोइस अवार्डया संकिपा विधा कथं
१. उत्कृष्ट मिजं कलाकार मू भुमिकाय्
२. उत्कृष्ट मिसा कलाकार मू भुमिकाय्
३. उत्कृष्ट मिजं कलाकार सहायक भुमिकाय्
४. उत्कृष्ट मिसा कलाकार सहायक भुमिकाय्
५. उत्कृष्ट कलाकार हास्य भुमिकाय्
६. उत्कृष्ट कलाकार खल भुमिकाय्
७. उत्कृष्ट स्क्रीनप्ले
८. उत्कृष्ट संवाद
९. उत्कृष्ट क्यामरा पर्सन
१०. उत्कृष्ट सम्पादन
११. उत्कृष्ट कोरियोग्राफर
१२. उत्कृष्ट ओरिजिनल साउण्ड ट्राय्क
१३. उत्कृष्ट फिल्म
१४. उत्कृष्ट निर्देशक
पेजथ्री पिपल्स च्वोइस अवार्डया म्यूजिकभिडियो विधा कथं
१५. उत्कृष्ट मिजं मोडल कलाकार
१६. उत्कृष्ट मिसा मोडल कलाकार
१७. उत्कृष्ट म्युजिक भिडियो
१८. उत्कृष्ट क्यामरापर्सन म्युजिक भिडियो
१९. उत्कृष्ट कोरियोग्राफर म्युजिक भिडियो
२०. उत्कृष्ट निर्देशक म्युजिक भिडियो
२१. उत्कृष्ट सम्पादन म्युजिक भिडियो
२२. उत्कृष्ट मेकअप
२३. उत्कृष्ट वसः
पेजथ्री पिपल्स च्वोइस अवार्डया संगीत विधा कथं
२४. उत्कृष्ट मिजं सः
२५. उत्कृष्ट मिसा सः
२६. उत्कृष्ट संगीत
२७. उत्कृष्ट शब्द
२८. उत्कृष्ट संगीत संयोजक
२९. उत्कृष्ट म्येचाः
३०. उत्कृष्ट मिजं सः आधुनिक
३१. उत्कृष्ट मिसा सः आधुनिक
३२. उत्कृष्ट संगीत आधुनिक
३३. उत्कृष्ट शब्द आधुनिक
३४. उत्कृष्ट संगीत संयोजक आधुनिक
३५. उत्कृष्ट ज्वः म्ये सः
३६. उत्कृष्ट नव प्रतिभा मिजं
३७. उत्कृष्ट नव प्रतिभा मिसा
पेजथ्री अवार्डया घोषणा असोज २३ गते जुगु खःसा, कार्तिकया १४ गते तक्क नां दुथ्याइ, अनं पुषया १० गते नामांकन ज्याझ्वः जुइ अले पुषया २४ गते पेजथ्री अवार्डया मू ज्याझ्वः जुइ ।
