“इहिपा” फिल्मया हिरोइन
च्यादँझिदँति न्ह्यः नेवाः फिल्मख्यलय्“इहिपा” नांयागु छगू फिल्म पिहाँ वल । उगु फिल्मया मेन हिरोइन रेश्मी महर्जन खः । थ्व फिल्मय् अनुर मानन्धर नांयाम्ह मेम्ह हिरोइनया नं महत्वपूर्ण भुमिका दु । उगु इलय् रेश्मी व अनूर निम्हेसितं नं नेवाः फिल्मख्यःया आस यायेबहःपिं हिरोइनया चर्चा याःगु खः । “इहिपा” सिबें न्ह्यः रेश्मी महर्जनं “भिन्तुना” थेंज्यागु तसकं बय्बय् जूगु फिल्मय् नं मेनरोल म्हिते धुंकुगु खः । थ्व निगु फिल्म धुंका रेश्मीं “तिन तिक महाबिकः” नं म्हितल । व धुंकां नं छगूनिगु मेगु फिल्म म्हितल । तर व धुंका घरगृहस्थीइ हे तक्यना च्वंगु खनेदु । अनूर मानन्धरं नं मेगु फिल्म म्हितुगु उलि खनेमदु । बरु उपिं निम्हेसिनं हे छुं छुं म्युजिक भिडियो धाःसा म्हितल ।
“इहिपा”व“भिन्तुना” या संजोग
बलिउड धका धयातःगु हिन्दी फिल्म व कलिउड धका धयातःगु खँय् भाय्या फिल्मय् आपालं हिरोइनत इहिपा लिना तनां वंगु खनेदु । नेवाः फिल्मबारे च्युतादुपिं आपासिनं सिउ हे जुइमा की च्यादँति न्ह्यः निर्देशक सुरेश बज्राचार्यं “इहिपा”नांयागु छगु नेवाः फिल्म दयेकुगु दु । थ्व फिल्मया छम्ह हिरोइनया नां रेश्मी महर्जन । छम्ह निम्ह हिरोइनतये चर्चा यायेबले “इहिपा”व“भिन्तुना”नांयागु निगु फिल्मया नांया संजोग चुलाना च्वंगु खनेदइ । गथेकी “भिन्तुना”फिल्मया मेम्ह हिरोइन रेमा महर्जनं इहिपा लिपा फिल्म ख्यलं तापाना वंम्ह हिरोइन खःसा “इहिपा” फिल्मय् रेश्मी म्हितेन्ह्यः भिन्तुना जोशी म्हितिगु खँ जुया च्वंगु खः तर उगु इलय् नकतिनि नकतिनिजक इहिपा याःम्ह भिन्तुनां जोशीं “इहिपा” फिल्मया निंतिं ई फ्याय् मफुबले उगु फिल्मय् रेश्मी महर्जनयात हिरोइन दयेकुगु खः । लिपा वना भिन्तुनां “मनू म्हसीकी”,“मू मदुगु जिन्दगी”,“थ्वला ग्यानापु स्टायल”व“स्वयनगु”फिल्म म्हितलसा “पानबति”फिल्मय् गेस्ट रोल म्हितल । थुलि त्वता मेगु फिल्मय् भिन्तुना जोशीं थ्व च्यादँ दुने मेगु फिल्म म्हितुगु खनेमदुनि ।
आशिष्मा व सनम शाक्य
“पानबति”फिल्मय् हिरोइन जुया नेवाः फिल्मय् खनेदयेक वःम्ह सनम शाक्यं वयां लिपा “वल वल फसिक्वाः”नांयागु फिल्म म्हितल । लिपा वना वयागु इहिपा जुल अले फिल्मं तन । हिरोइनतयेगु इहिपाया चर्चा यायेबले दकलेसकले बय्बय् जुगु इहिपा धइगु आशिष्मा नकःमिया इहिपा खः । आशिष्माया इहिपाया खबर आकाझाकां वःबले गुलिसिनं पत्यातकं मया । वं इहिपा याये न्यालाखुलाति जक न्ह्यः “लाखेभाजु”नांयागु छगु फिल्मया निर्माण ज्या तकं न्ह्याका थः थ्वहे ख्यलय् समर्पित जुइगु धका घोषणातकं याःगु खः । ताः ईतक अमेरिकाय् च्वना लिहाँ वयालिं खस नेपाली फिल्मपाखे पलाः न्ह्याकुम्ह आशिष्मां “मू मदुगु जिन्दगी”नांयागु फिल्म म्हितुगु खःसा वयां लिपा “रश्मी”नांयागु छगु फिल्म नं म्हितल तर थ्व फिल्म धाःसा आःतक पिहाँ वःगु मदुनिसाः इहिपा लिपा अमेरिकाय् हे तिपु जीवन हना च्वंम्ह आशिष्मां लिपांगु इलय् छगु निगु म्युजिक भिडियो धाःसा म्हितुगु दु ।
निकि महर्जन
“तिनतिकः महाबिकः” नांयागु फिल्मं नेवाः फिल्मख्यलय् डेब्यु याःम्ह हिरोइन खः निकि महर्जन । नेवाः फिल्मख्यःया छगूयांछगूजक अवार्ड पेजथ्री पिपुल्स च्वइस अवार्डय् बेस्ट डेब्यू फिमेल एक्टरया अवार्ड तकं त्याकल । उगु ईलय् निकियात नं नेवाः फिल्मख्यःया निंतिं आस याये बहम्ह हिरोइन धका चर्चा यात । म्युजिक भिडियो ख्यलं फिल्मपाखे स्वया वःम्ह निकि महर्जन लिपा “हिसिमति” नांयागु छगू फिल्म म्हितल । वयागु “जातः” नांयागु छगू फिल्म पिहाँवये ल्यंदनि । थ्वहे दथुइ वयागु नं इहिपा जुल । आः शायद वं फिल्म म्हिति मखु जुइमा ।
रजनी खडगी
नेवाः फिल्मख्यःया छम्ह हिसिचादुम्ह हिरोइनया रूपय् कयाःतःम्ह हिरोइन खः । विशेष याना रामकृष्ण खडगी व सुरेन्द्र मानन्धरया ख्यालिइ प्याखँम्वः जुया म्हितिम्ह रजनी खड्गी छम्ह लोकंह्वाम्ह हिरोइन खः । वयागु “ब्याहा यायेम्हा जि”, “पागलपन”, “एक से एक” व “क्या फसाद” फिल्मयात आपासिनं येकुगु खःसा “पागलपन” फिल्मय् मतिनाय् वेँसु चाःम्ह ल्यासेया भुमिकाय् रजनीं काःगु प्याखंपहयात आपासिनं तारीफ याःगु खः । थथे लोकंह्वाना च्वंम्ह रजनीया गथुने लकडाउन जुया च्वंगु इलय् इहिपा जुल । आः वं फिल्म म्हिति वा म्हिति मखु धइगु खँ सीमदुनि ।
बिनु मानन्धर
रजनी खडगी म्हितुगु “ब्याहा यायेम्हा” फिल्मया मेम्ह छम्ह हिरोइन बिनु मानन्धर खः । बिनु मानन्धर धईम्ह नेवाः संगीतख्यलय् तसकं लोकंह्वाम्ह म्येहालामि सरस्वति मानन्धरया म्ह्याय् खः । “ब्याहा यायेम्हा” सिबें न्हापा बिनुं “जिगु मिखाया न्ह्योने” नांयागु फिल्म नं म्हितुगु दु । तर बिनु मानन्धर मयजु इहिपा धुंका थ्व खनेमदया वंम्ह हिरोइन खः ।
इहिपा न्ह्यः तनावंम्ह
थथे इहिपा लिपा तनावंपिं हिरोइनत ला आपालं दु । तर सुमिका बज्राचार्य नांयाम्ह छम्ह हिरोइन धाःसा इहिपाया न्ह्यःहे तनावंम्ह हिरोइन खः । सर्गमिला व हाकु सुपायँ थेंज्यागु फिल्मया हिरोइन सुमिका बज्राचार्ययात उगु ईया साप हे बांलाम्ह हिरोइनया रूपय् काःगु खः । तर “सर्गमिला”म्हिताच्वंगु इलय् हे उगु फिल्मया हिरो राजेश महर्जनलिसे मतिना जुबले फिल्म ख्यः त्वता एअर होस्टेसया ज्या याम्ह सुमिका बज्राचार्यं खुदँति लिपा वना तिनि राजेश महर्जनलिसे औपचारीक रूपं इहिपा याःगु खः ।
देश त्वता वंपिं
इहिपा लिपा देश त्वतावंपिं हिरोइनत मध्ये छम्ह सिन्तिया सेन ताम्राकार खः । “सत्य धरोधर्म”,“यलेबाथ”व “तुतां” थेंज्यागु फिल्म म्हितुम्ह सिन्तिया सेन ताम्राकारयात नं उगु ईया छम्ह बांलाम्ह हिरोइनया रूपय् काःगु खःसां आकाझाकां इहिपा याना थ्व ख्यःजक मखसे देश हे त्वता वन । इहिपा लिपा देश त्वता वंपिं मेपिं हिरोइनय् दिपा शाक्य छम्ह नं खः । “जिपिं बदमाश मखु”फिल्मया हिरोइन दिपा शाक्य इहिपा लिपा विदेशय् वना च्वंवंगु खःसा आः थौंकन्हे पोखराय् तिपु जीवन हना च्वंगु दु । दिपा शाक्यला विदेशं नेपाल वल तर “भिन्तुना”या हिरोइन रेमा महर्जन इहिपा यायेत छक्वः नेपाल वल इहिपा यात अले हाकनं अमेरिकाय्तुं वना छ्वत । अथेहेतुं विदेशय् च्वना च्वंम्ह मेम्ह हिरोइन धइम्ह मीरा मालि नं खः । “छहे मदुसा”, “निफ्वःस्वां”, “थःम्हं म्हुगु गाः”फिल्मया हिरोइन मीरा माली नं इहिपा लिपा विदेशय् च्वना च्वंम्ह हिरोइन खः । “निफ्वःस्वां”या हे छम्ह मेम्ह हिरोइन गीता शाही नं विदेशय् हे च्वना च्वंगु दु ।
इहिपा लिपा अझ अप्वः व्यस्तपिं
थुकथं स्वयेबले नेवाः फिल्म ख्यलय् च्वंपिं आपालं हिरोइनत इहिपा लिपा थ्व ख्यलं तापान वंगु खनेदतसा छम्ह निम्ह हिरोइन अज्यापिं नं दु गुम्हेसिनं इहिपा लिपा कलाकारिता ख्यलय् अझ अप्वः सकृयता क्यना वया च्वंगु दु । अज्यापिं मध्ये दकले चर्चित नां धइगु हिसिला महर्जनया नां खः । नीन्यादँति न्ह्यः “राजमति”जुया थ्व ख्यलय् वःम्ह हिसिला महर्जनं उगु ईलय् “चाण्डालिका” नांयागु छगु फिल्म बाहेक मेगु फिल्म म्हितुगु मदु । अनं लिपा हिसिलाया राजमति फिल्मया हे हिरो मणिराज लवटलिसे इहिपा जुल । छखे मेपिं हिरोइनत इहिपा लिपा कलाकारिता ख्यलं तापाना वंगु खनेदुसाः हिसिला धाःसा इहिपा जूगु छुं ई लिपा थःहे जहान मणिराज लवटलिसे छुं छुं म्युजिक भिडियोखय् खनेदयेक वल । म्युजिक भिडियोपाखें कलाकारिता ख्यलय् लिहाँवःम्ह हिसिलां लिपा वना “त्याग”नांयागु छगु नेवाः फिल्म म्हितलसा वःधुंका हिसिला थःगु मातृभुमि कीपुया इतिहास न्ह्यब्वयातःगु नेपाली फिल्म“कीर्तिपुर ः द लिजेण्ड अफ कीर्तिलक्ष्मी” नं म्हितल । खय्तला हिसिलां “तुयुमति”फिल्मय् थःहे जहान मणिराज लवटनापंजाना गेस्ट रोल म्हितुगु दु । तर थौंकन्हे धाःसा छगु निगु म्युजिक भिडियो बाहेक मेगु फिल्मय् म्हिता च्वंगु खनेमदु ।
इहिपालिपा कलाकारिता ख्यलय् थःगु सकृयता अप्वयेकुम्ह छम्ह हिरोइन रोजिना सुवाल नं खः । “चन्द्रमान”व“थ्वला ग्यानापु स्टायल”थेंज्यागु फिल्म म्हितुम्ह रोजिना सुवालं इहिपा लिपा थ्व ख्यलय् थःगु सकृयता अझ अप्वयेकुगु दु । छम्ह संगीतकारया रूपय् नांजाम्ह मोहित मुनाललिसे इहिपा याःम्ह रोजिनां इहिपा लिपा आपालं म्युजिक भिडियो म्हितलसा “तिनतिकः महाबिकः”लगायत मेमेगु फिल्म नं म्हितलसा थौंकन्हे कलाकारिताया थीथी ख्यलय् रोजिनाया सकृयता न्हियान्हिथं अप्वया वया च्वंगु दु । “थ्वला ग्यानापु स्टायल” या हे छम्ह हिरोइन सिर्जना महर्जन नं इहिपा लिपा थ्व ख्यलं तापाना वंम्ह हिरोइन खः । थौंकन्ह नेपालभाषा प्रशिक्षण जुया भाषा स्यनेगुलिइ लगे जुया च्वंम्ह सिर्जना महर्जनं छुं छुं म्युजिक भिडियोया नापनापं “बाखंचा” नांयागु टेलिसिरियलय् म्हितल ।
दकले लिपा
“गोखुन”व“मतिनाया कलि”नांयागु फिल्मय् म्हितुम्ह मधु शाही नं फिल्म ख्यलं तनावंम्ह हिरोइन खः । गुलिखे हिरोइनत इहिपा लिपा तनावनसा गुलिखे हिरोइन इहिपा लिपा नं थःगु पलाः न्ह्याका हे च्वंगु दनि तर छम्ह हिरोइन अज्याम्ह नं दु , गुम्हेसिया फिल्मी यात्रा थःगु न्हापांगु पलाः न्ह्याये न्ह्यःहे दिना वन । थथे तनां वंम्ह छम्ह हिरोइन सचि राजोपाध्याय नं खः । “थः कतः कतः थः”या हिरोइन सचि राजोपाध्यायं वहे फिल्मया निर्देशक जितेन्द्र राजोपाध्यायलिसे इहिपा याना तिपु जीवन हनावयाच्वंगु दु । हिरोइनया रूपय् थःगु पलाः न्हयाये न्ह्यःहे पलाः दिकुम्ह हिरोइनया नां सम्झना श्रेष्ठ खः । नांजाम्ह ख्यालिम्वः श्रीकृष्ण अणुया निर्देशनय् दयेकेज्याः न्ह्याःगु “सितुलानी”नांयागु टेलिफिल्मया हिरोइन सम्झना श्रेष्ठया रूप व अभिनय गुणयात उगु ईलय् आपासिनं तारीफ याःगु खःसा “सितुलानि”पिहाँ वल की सम्झनाया थाय् नेवाः फिल्म ख्यलय् छम्ह लोकंह्वाम्ह हिरोइनया रूपय् न्ह्यःने वइ धका तकं धायेगु याःगु खः तर उगु फिल्मया ज्या पूमवन । अले छम्ह हिरोइनया पलाः न्ह्याये न्ह्यःहे दित ।
