नेपालभासा म्युजिक भिडियोया बजाःयात व्यवस्थीत यायेगु जिम्मा आः झीगु हे खः । नेपालभासाया म्युजिक भिडियोयात गुगु कथं ब्यवस्थीत यायेफइ धकाः झीसं आः बिचाः यायेमाः छाय्धाःसां झीसं निर्माण यानाच्वनागु म्युजिक भिडियोया लागत स्वल धाःसा औसतय् छगू लख तका दां तुयाच्वंगु दइ । तर म्युजिक भिडियोया बजार धाःसाः गन गथे छु दु वा गथे याना थुकीं लवः कायेगु धैगु खँय् झी अनभिज्ञ ।
दकलय् न्हापां ला झीसं नेपालभासाया म्युजिक भिडियो हे छाय् निर्माण यानाच्वना धैगु खँय् झी स्पष्ट मजू । नेपालभसाया सेवाः यानाच्वनागु खः वा छुं व्यापारिक लाभया निंतिं वा थःगु क्यारीयरया निंतिं वा अन्य छुं कथं धैगु हे झी स्पष्ट मजु । नेपालभासाया मनोरंजनया इतिहासयात विश्लेषण याना स्वयेगु खःसा नेपालभासा ख्यलय् गुलिनं सांगितिक विकास दु व सिइमदयेक आन्दोलनयाया हे छगू रूप कथं न्ह्याकुगु खः । राज्यया भाषिक दमनया विरुद्धय् थी थी श्रष्टापिंसं थःगु जीवन पाना नेवाः संगीत व मनोरंजन ख्यःयात जीवन्त यानावंगु खः । तर राज्य बुलुहुँ उदार जुयाःवःसां नेवाः मनोरंजन ख्यःयात धाःसा उलि धिसिलाक्क न्ह्याका यंकेफूगु अवस्था मदु । थौं नं झीत ताः की झीगु भाय् संगीत वा मनोरंजनया मेमेगु क्षत्रं अझं नं राजनैतिक रूपं हे आन्दोलन याये मानी । थुगु हे स्वरूप दुने च्वना निर्माण जुयाच्वंगु नेपालभासाया म्ये, म्युजिक भिडियो, प्याखँ वा मनोरंजन क्षत्रया मेगु छुं कथंया क्षत्र चकने मफुनि ।
छुं नं उत्पादनया बजार मदुसां झीसं उत्पादन दिकाच्वनागु मदु । थ्व तसकं हे विचित्र खँ खः । न्हिंया न्हिथं लाखौं लख तकाः फुकाः झीसं मनोरंजनया साधनत उत्पादन यानाच्वना तर उकिया बजार झीसं दयेके फयाच्वंगु मदु, लुइकाच्वने फयाच्वंगु मदु । तर अय्नं झी भावनात्मक रूपं न्ह्यांवनाच्वना । झीत झीगु लगानीया ध्यबा लिहां वइ वा मवइ सिबें नं झीसं सन्तुष्टिया सासः ल्हानाः हे मन तयाच्वनागु दु। थुकीया अर्थ आ थ्व नं थुइके मज्यु की झीसं दयेकागु मनोरंजनया साधन फुक्कं ध्याबाया लगानी लिहां हे वयेमाः वा झीसं छुं प्याखँ, म्युजिक भिडियो निर्माण यानां थुकीं छुं आर्थिक वा मौद्रिक लवः काये हे माः मात्र खँ थुली खः की झीसं न्हिंया न्हिथं लाखौं तकाः फुकाच्वनां नेपालभासाया निंतिं धकाः मात्र थ्व आः व्यवस्थीत जुइ माल अले मनोरंजन क्षत्रया बजार निर्माण जुइमाल । उकिं थुकीया निंतिं झीसं छु छु यायेमाली थुकी छक्व बिचाः याये ।
छपू म्ये वा म्युजिक भिडियो वा प्याखँ निर्माण यायेतुं छम्ह निर्माताया ज्या क्वचाइ मखु । वैगु ज्याखँ धैगु थःगु कृति छु उद्देश्यं निर्माण याःगु खः व पुवनेगु कथं जुइमाः । यदि नेपालभासा प्रचारया निंतिं खःसा व हे कथं सर्वसुलभ एवं व्यापक जुइमाल । थःगु क्यारियरया निंतिं खःसा न्हूगु कृतिया प्रचार लिसें थःगु नं प्रचार प्रसार जुइ माल अले व्यापारिक प्रायोजनया निंतिं खःसाः छुं कथं ध्येबा पुला स्वयेगु व्यवस्था कथं ओटिटि प्लाय्टफर्मया निंतिं कन्टेन्ट निर्माण व प्रचार जुयाः वने माः । तर झीसं न्ह्यागु कन्टेन्ट दयेकुसां व युट्युबय् पिदन धाःसा झीसं सन्तुष्टिया सासः ल्हाइ । युट्युबय् पिदने वं हे झीगु लक्ष्य पुवन धकाः ताय्की ।
झीगु कृति वा कन्टेन्टया बजार दयेके मफूगु हे नेपालभासाया मूल समस्या खः । बजार गथे याना दयेकेगु धैगु खँ हे झीसँ थुइके मफूनी । मात्र सुँ छम्ह निर्मातायात हयेका नेवाः प्याखँ वा नेवाः म्युजिक भिडियो दयेकेगु हे जक लक्ष्य झीगु जुयाच्वंगु दु । गुकींयाना नेवाः म्युजिक भिडियो वा प्याखँयात गनं गनतब्य चु लानाच्वंगु मदु । निगु ति दशक न्ह्यः भारतय् साउथया प्याखँ धालकी तसकं हे फन्तुस थें ताइगु । हिरो हिरोनी नं रूप रंग मदुपिं थें ताइगु तर छगू काल लिपा थौं बलिउडं साउथया प्याखँया कपि जक याइगु मखुसे आः रिमेक यायेगु अधिकार तकं न्याना प्याखँ दयेकेगु प्रचलन शुरु जुल । थौं नेपालभासाया संकिपा नं छुं ई न्ह्यःया भारतया साउथ फिल्म इन्डस्ट्री थें हे जुयाच्वंगु दु । मात्र भावनां हे जक प्याखँ निर्माण यायेगु ज्याखँ जुयाच्वंगु दु उकिं थौं नेपालभासाया मनोरंजन क्षेत्रं थी थी देशया मनोरंजन क्षेत्रं गथेयाना बजार दयेकल धैगु खँ अध्ययन याये आवश्यक जु ।
