लाेकम्ये श्याम सुन्दर बसन्त बेलसया म्युजिक भिडियाे पितब्वज्या जुल । नेपाःया पुलांम्येयात न्हूगु कथं छायाँकन व न्हूगु रेकर्ड याना ८९ दँ दुम्ह म्येहालामि गुह्येश्वरी राज मानन्धरं हालादीगु खः । थुगु म्ये जितेन्द्र महजर्नं निर्देशन यानादीगु खःसा काेरियाेग्राफि स्वजन राघुवंशीं यागु खः । संगीत संयाेजन हरिशरणा साय्मिं यागु खःसा थुकी स्वजन रघुवंशी व आराध्या लक्ष्मी खड्गीया अभिनय दु । थुगु हे ज्याझ्वलय् मानन्धरं हालादीगु ७पु दाफा म्येत सार्वजनिक याःगु खः ।
शताब्दी पुरुष जोशीयालिसें जनकवि दुर्गालाल श्रेष्ठ, वौद्ध विद्वान फणिन्द्र रत्न बज्राचार्य, चर्या गुरु यज्ञमान पति बज्राचार्यं मंकाः रुपमा मानन्धरं हालादीगु दाफा म्येया भच्युअल एल्बमया विमोचन यानादिल । थुगु म्ये फुक्कं हे गुहेश्वरी राज मानन्धरया युट्युब च्यानलय् दु धकाः जानकारी नं ब्यूगु खः। । दक्वं म्येय् संगीतकःमि हरिशरण सायमिं संगीत संयोजन यानादीगु दु ।
वाङमय शताब्दी पुरुष संस्कृतिविद् सत्यमोहन जोशीं देशय् कला व कलाकःमिया नामय् प्रज्ञा प्रतिष्ठान दयेकूसां उगु प्रतिष्ठानं वाद्यवादक, गुरु व कलाकःमितयत म्हमस्यूगु धयादीगु दु । थौं येँय् जूगु छगू ज्याझ्वलय् नवासें शताब्दी पुरुष जोशीं देयया अमूर्त सम्पदाया रुपय् दयाच्वंगु परम्परागत म्ये, संगीतया संरक्षणय् जनस्तरं तःधंगु योगदान दयाच्वंसां राज्यं माःकथं छुं यायेमफूगु धयादिल ।
ज्याझ्वलय् शताब्दी पुरुष जोशी, जनकवि दुर्गालाल, वौद्ध विद्वान फणिन्द्र रत्न, चर्या गुरु यज्ञमान पतिलिसें दाफा गुरुपिन्त दोसल्लां न्ययेकाः सम्मान याःगु खः । नुगः खँ तयेगु झ्वलय् जनकवि दुर्गालाल, वौद्ध विद्वान फणिन्द्र रत्न, चर्या गुरु यज्ञमान पतिलिसें प्रा. डा. सिलु मानन्धर बज्राचार्य व प्रा. डा. पुष्कर बज्राचार्यं नेवाः समाजय् परम्परागत दाफा म्येया महत्व व थुकिया संरक्षणय् म्येहालामि मानन्धरया योगदानया बारे चर्चा यानादीगु खः ।
