थन कोरोना ! अन कोरोना ! ! स्वस्वथाय् कोरोना ! ! ! यानिकी संसार हे दक्वथाय् कोरोना हे कोरोना जुया च्वंगु दु । उकीं थ्व संसार कोरोनामय् जुया च्वंगु दु । जूसा जुल का कोरोना ! खितुङ्गा का ! झी थाय् दुहे दुनि करुणामय् । वसपोलं हे रक्षा याइका ! उकीं मदु झीत कोरोनाया भय ! वयाकें थुयाके दया च्वंगु दु थ्व ल्वय् ! मत्वःतु सुयातं थ्व ल्वचं ! तर ग्यायेम्वाः झीत थिइमखु थ्व ल्वचं । करुणामयं बियातःगु झीत बचं । बचं नं बचं, चिधंगु मखु तधंगु हे बचं । यानिकि अभिषेक बचं मखु अमिताभ हे बचं । बचं न्ह्यागु हे कथंया थमजुइमा ! होश याना दिसं कोरोनां पुना महयेमा ! उकिया निंतिं थःगु पावर बल्लाका दिसं । पावर नं पावर ला चानचुने पावर मखु, इमिगु निंति पावर बल्लाका दिसं । कोरोनायात त्याका दिसं !
छिके शेरेया पावर दुसां मजिउ । प्रचण्ड पावर दुसां मगाः ! इमिगु पावर झीगु निंतिं ज्या वयेफू तर इमिगु निंतिं ज्यावइ मखु । इमिगु निंतिं माःगु पावर धइगु इम्युनिटी पावर खः । थ्व दत कि इपिंलिसे ल्वाय् फइ, इमित बुके फइ ! थुल मखुला छिं ! थ्व पावर बल्लाकेत करुणामय्याके फ्वना दिसं शक्ति ! याना दिसं प्रचण्ड शेरया भक्ति ! करुणामय् थःगु हे शक्ति मगाना च्वन । वसपोलया सः न्यनिपिं मगाना च्वन । झीगु सः अले सुनां न्यनि ? न्यंसां मन्यंसा झीसं कना च्वनेमा । अले जक भाषा ल्यना च्वनि । भाषाया निभाः जल्ल थिना च्वनि ।
करुणामय् झी आराध्यदेव खः । झीत रक्षा याना च्वनेमा ! थ्व संसारयात कोरोनामय्या ख्याच्वलं बचे याना च्वनेमा ! प्रार्थना झीगु थ्वहे खः ! करुणामय् भर्सेस कोरोनामयया थ्व धेंधें बल्लाखय् करुणामय् सदां त्याना च्वनेमा ! धयां छु यायेगु ? करुणामय्यात थन थाकुया च्वंगु दु । नेतातय्त सत्ता माकुया च्वंगु दु । कुर्सिइ च्वने खँपिन्त सत्ता चाकुया च्वंगु दु । ओलियात धाःसा थ्व फाकुया च्वंगु दु । करुणामय्यात थन थाकुया च्वंगु दु । वसपोलया जात्राय् पंगः वयाच्वंगु दु । पंगः थने खना सिडिओ दंग जुयाच्वंगु दु । जात्रा न्यायेके मखंपिनि म्हगस भंग जुया च्वंगृु दु ! करुणामय्यात थन थाकुया च्वंगु दु !
थाकुइत ला थन नेवाः फिलिमयात नं थाकुया च्वंगु दु ! फिलिम क्यने मखना ख्वाः हाकुया च्वंगु दु ! कोरोनाया कारणं फिलिम लिउने लाना च्वंगु दु । फिलिम लिउने लाःसा लातका फिलिमय् म्हितिपिंला न्ह्यने लाना च्वंगु दु नि ! लक्ष्मीयात आराध्यदेवी धायेखना च्वंगु दु नि ! म्युजिक भिडियोपाखें जूसां लक्ष्मीयात लय्तायेके दया च्वंगु दु । भ्यूज यक्वः दत धकाः लसता प्वंके खना च्वंगु दु । वहे लसताय् भिन्तुना देछाय् दया च्वंगु दु ।
भिन्तुना देछाय् दयां छु याये ? भिन्तुनाया खानी भिन्तुना नानी हे तापालय् वना च्वंगु दु ! तापालय् हे च्वना लक्ष्मी लय्ताया च्वंसा थन सतिक सु वइ ? वाउँगु वाउँगु डलर कमाय्याये धकाः सिन्हः तिया वंम्ह मय्जु जुइमा वा कृष्णलिसे मतिना ब्याके मखंम्ह मीरा हे छाय् मजुइमा ! इमि अन हे न्ह्याइपु । थन झीसं कपाः स्याकां छु याये ? इमिसं डलर मुन धकाः नुगः मुइकां छु याये ? बरु थन झीसं लक्ष्मीया आराधना याये ! आराधनाया भक्ति व आराध्य शक्ति बल्लापिनिगु धुकुतिइ थन लक्ष्मी हे लक्ष्मी !
लक्ष्मी साले फया इमिगु धुकूया शोभा अप्वःया च्वंगु दु । शोभाया यौवनय् धाःसा ध्वः छध्वः रेखां किउगु दु । लक्ष्मीया जय जुइमा । लक्ष्मीया कृपा सदां दया च्वनेमा । व हे कृपां सोहन पापडी नये दया च्वनेमा । थ्व पापडी साः नं साः । बाँ नं ला । माःबलय् माःथाय् छ्याय्फ्वाय् याये नं अपु । उलि दसिं मगाला धया !
सोन पापडी थेंज्यागु साः साःगु नसाः नये दइला धकाः थन आसाकुति जुया च्वंपिं यक्वः दु । आसाकुति जुइगु बाँला । आसाकुति जुइ मसःपिं द्यांला ! द्यांला धया द्यांला, सत्य धरोधर्म द्यांला ! साःगु भिंगु नयेगु खःसा फिलिम दयेकेगु हे बाँला ! फिलिम बाँमलाना स्वकुमि द्यांला ! निर्देशकया धाःसा खल्ती ताःला ।
फिलिम दयेकुम्ह निर्माता धाःसा आशां द्यात खनि । बाँलागु फिलिम स्वये धकाः आसाकुति जम्ह दर्शक नं आसां द्यात खनि । द्याःसां द्यत का । सुयात छु पात धकाः ! आशां द्याःपिं द्यानां तुं च्वनि । नेवाः फिलिमया घःचाः धाःसा न्ह्यानां तुं च्वनि । फिलिम दयेकेसःसां मसःसां दयेकां तुं च्वनि । व ख्वाः थ्व ख्वाः मवंम्ह नं हिरो जुयां तुं च्वनि । दां प्वः तइम्ह हिरो अले दां धेब्छ हे मकाइम्ह हिरोइन । क्या फसाद ! आः मेपिन्सं छाय् कपाः स्याकेमाःगु धयागु नि ! फिलिम दयेके सि हे सिधल । आः हा वयां छु यायेगु ? लिबाय् धुंका छु हालेगु ? बाज्याया कय्ता छाये सालेगु ?
वाःया दुने जाकि दु धका सकसिनं सिउ । फिलिम बाँलाक दयेके थाकु धका सुनां मसिउ । थन बाँलाक फिलिम दयेकेगु कुतः कम जुया च्वंगु दु । फिलिमय् दुने दर्शक सालेगु दम मदया च्वंगु दु । बाँलागु फिलिम दयेकेत दम तइपिं माला च्वंगु दु । धात्थें धायेगु खःसा आः हिसिमति मखु राजमति माला च्वंगु दु । दु हे मदुसा तुयुमति छम्हसां मदयेक मगाना च्वंगु दु ।
फिलिम दयेकिपिं थन जिगु मिखाया न्ह्योने हे च्वना जिपिं बदमाश मखु धका हाला च्वंगु दु । फिलिम दयेकुपिं थम्हं म्हूगु गालय् कुतुं वना च्वंगु दु । बाँला मयजु छम्हेसिया सकसिनं आस । तापालय् जुल वयागु बास । आः हिरोइन जुइपिं मदु सुं खास । झन प्यखेरं कोरोनाया त्रास । फिलिम गथे याना क्यनेगु ? हे करुणामय् ! लं क्यन बिज्याहुँ । थ्व कोरोनाया त्रासं पार लगे याना बिउ ! थन वइन च्वापुफय् । सुयांगु मजुइमा विनास । याकनं लुया वयेमा निकास । करुणामय भर्सेस कोरोनामय्या थ्व धेंधें बल्लाखय् कोरोनामय्या जुइमा पराजय । । याकनं कोरोना न्हना वना जगतया जुइमा जय । फिलिमख्यःया जुइमा याकनं विजय ! ! !
