झासँ ! भीआइपि जुयादिसँ

हृदय प्रसाद मिश्र

थौं छायेथें मस्यु जिगु कोपुंगु न्ह्यपु जिं चार्ज मयासां हे रिचार्ज जुयाच्वन वा ऽऽ । थौंकन्हय्या ल्यासे ल्याय्म्हतय् छुं छपाः किपाः वांलात कि हे फेसबुकय् पोष्टयाये हथाये थें जिगु न्ह्यपुं नं सुपः छुयाः हेंग्वाः मजुइगु खँ पोष्ट यायेत होस्ट यानाच्वन धयां । माःगुला का ऽ । तःधंम्ह मनू जुइमाल । भीआइपि जुइमाल हँ । छु याःसा याकन भीआइपि जुइफइ धयागु बिचाःया मुगलं जिगु छयँनय् छ्याात्तु छ्यानाः च्वन धयाँ । छु यायेगु का ऽ । छिकपिन्सं स्यू ला ? छु गथे याःसा सकस्यां मान सम्मान हनावना तयेका भीआइपि जुइ फइ ? न ज्या छुं याये मफुसां जिं थ्व यायेफु व यायेफ धकाः माकफुँइ जक क्यनेमाःगु खः ला ? सखे घेत्ताहा जुयाः फताहा खँं जकं ल्हाना जुइमाःगु खःला ? लाःसा नेपाःया मौलिक राष्ट्रिय पोशाकयात त्वःता पाश्चात्य टाइ सूटय् फीटजकं जुइमाःगु जकं खःला ? मान्चोसा छु याःसा भीआईपि जुइ धयागु खँ सिइके मफयाः होस मदयेक जोश हे पिहाँ वये धुंकल धयाँ जितः हऽऽऽ …
नसा, त्वंसा पुंसा, राशन, भाषण, आश्वासन छुकिइ ध्यान विउसा याकनं भिआइपिया पगडी छाय्पी फइ जुइ । सखे हलू व क्वाःल त्वन धाःसां जकं जिइगु खःला । झी ओली वैद्यजुं ला हलू नलकि डेन्जरसगु कोरोना भाइरसतकं माइनस जुइ धकाः महान भविष्यवाणी यागु दु । मखु–मखु थ्व खँ खइमखु । हलू नयाः न सुं भीआइपि जुइला ? पत्याः मजू जि ला । तर, जूस स्वया तगडागु घूस नःसा धायेमफु । तर थ्व हलू नयाः चैं जिइमखु । ग्वान्छगलं हे फन्टुसगु खँ । न्ह्यागु न्ह्याथे हे जूसां जितः भीआईपिला जुइ हे माःगु दु । छु याःसा एक्सप्रेस नक्सां सुपरम्ह भीआईपि जुइफइगु जुइ ? न नेवाःतय्सं नेवाः भाय् ल्हायेगु त्वःता हःथे नेवाः भाय् त्वःताः मसः मसःसां वाय्स माय्न थ्वाय्स घकाः भुयूचा भाय् ल्हायेमाःगु जकं खःला ? सखे पला पतिकं सेल्फी कयाः व टिकटक दयेका फेसबुकय् पोष्टयानाः यक्वः लाइक कमेण्ट वल कि खःला ? न जाः मक्यंकुसें हे मनूतय्त झंगः लानाः थःगु भंगः जायेके सलकि जकं भीआइपि जुइगु खःला ? छु याःसा भीआइपिजुइगु जुइ ! हे मरु गनेद्य,ः नारांद्यः, माद्यः, सरस्वतीद्यः, नासःद्यः, हारतीमाता, काल भैरब पिता ! थ्व फर्मूला छगू जित मार्गदर्शन यानाः विया विज्याहुँ प्रभूपिं, प्लीज । यदि छलपोलपिन्सं थुकिया मार्गदर्शन याना बिया बिज्यात धाःसा धरोधर्म जिं निर्का वंगु प्यारा लड्डु ज्वना दर्शन याःवये प्रभु । अजं छलपोलपिंके सुगरया टेन्सन दःसा सत्य सुगर फ्री प्यारा लड्डु हे ज्वना वये प्रभु ! उलिं जक मगाः पालुगु नं माःसा बरु जिं पियोरगु लोकल झोल हे ज्वना वयेगु ग्यारेण्टि बिइ प्रभु !

नुगलय तःधंगु आज्जु भीआइपि जुइगु मिशन ज्वनाः एकचित्त नक्सां न्ह्यज्याना च्वनागु मखनय् थ्यंबलय् याद मदयाः धाय्ला होश मदयाः धाय्ला आसामरुचा नाप ध्वदुक्क नाप लातं, नापं हे जिं मखन खनि । जिं सरी धाये मलावं हे जिगु कमजोरीया फाइदा कासें वं धाल,‘चिनःम्ह खाथें छ्ँय क्वछुकाः छु पहलं लँय् वया च्वनागु आम ? माकः सिमां कुतुं वलकि भुग्लुं च्वनि, मनू खातां कुतुं वल कि पुग्लुं च्वनि धाइ । छ नं अथे हे का । छु जुल ? कलाः नाप ल्वापु जुलकि छु ? आसामरुचाया खँ न्यनाः आकाझाकां जिगु तँया भोल्टेज् बढे जुयाः जिं हे मचायेक जिगु म्हुतुं विस्फोट जुल, ‘छु म्वाः मदुगु खँ ल्हाना च्वंगुजुइ ! चि नःम्ह खा थें छ्यँ क्वछुका च्वन हं ! छं खां चि नःगु गुबसं खं ला ? जिं ला खा, हँय्, चखुंचा, बखुंचां सुनानं थौं तक चि नःगु थौंतकं मखं । अले जिं छ्यँ थस्वका च्वनागु नं मदु, क्वस्वका च्वनागु नं मदु । मेमेंबलय् गथे खः अथे हे स्टेण्डर्ड पोजिशनय् छ्यँ तयाः हे न्यासि वयाच्वनागु खः । उकिसं कलाः नाप ल्वापु जुलकि छ्यँ क्वछुइ हे माः धकाः संविधानय् च्वयातगु दु ला ? नुगलय् भिषणगु मिशन दुगुलिं डाइरेक्ट जिगु बिचाया घःचाः चाःहिला च्वगुलिं छन्त मखन धायेवं हे थपाय् हाकयेक डाय्लग नकेमाःला ? जिं जा नयाः वयेधुन छं डाय्लग नकेम्वा जितः । जोश पिहां वइ दः ऽऽऽ ।

जिगु जोश भचा अप्वः हे एक्शापोज जुल ला थें मस्यु, आसामरुचां लाखामरिथें छाःगु थःगु सःयात छत्थुं हलुवा थें नाइकाः धाल, ‘मखु–मखु तं चाये मते रे भाइ । छंगु ख्वालय् थौ छाय् लोड्सेडिङ धकाः न्यनागु जक खः । छ व जि ला कटटु्यार धकाः खः । कोरोनाथें कडा व भयावह जुगु स्वयेमते रे । छाय् छु जुल छन्त धा रे भाइ ।’

आसामरुचिया आत्मियतां जिगु तं अटोमेटिकं हे नाया वन । अय्नं छु याःसा भीआइपि जुइ धयागु खँ धायेला मधायेला धयागु खँय् जिगु नुगः गोलमाल व अलमल जुल । जिगु पहः खनाः आसामरुचां धाल,‘छंगु नुगलय् छु टेन्सनं डेरा कया च्वन धा धयागु का । छंगु ख्वाःया रियाकश्नं जक ला फुक खँ थुइ मखुनि । छं मधायेकं सिइकेत अन्र्तयामि ला मखु नि । जिं स्यूसा धकाः थःम्ह फुगुचागु ग्वहाली यायेफइ । का चुकू मदुगु म्हुतु खुरुक्क चायेकि सा ।’

आसामरुचिया खँ न्यनालिं जिगु म्हुतुं हितिं लः हाइथें खँ हाया वल । खँ छु धाःसा आसामरु, थौंकन्हय् झीगु देशय् सिम्पल साधारण नर्मल मनू जुयाः म्वाये साप हे थाकुल । सरकारं छुं याइला धकाः स्वःसा खालि कर–कर यानाः कर पुजक धाइगु । मेगु छु हे भरमदु । उकिं थ्व वेसाभाः थिकेगु व महँगीया हालिमुहाली जुया च्वंगु इलय् छु याःसा गथे याःसा समाजय सम्मानीत प्रतिष्ठित भीआइपि जुयाः म्वायेफइ धयागु पिरं नुगलय तीरं थे झ्वाःझ्वाः च्वाच्वा याना सुयाच्वन । धात्थें छु याःसा भीआइपि जुयाः म्वायेफइ जुइ स्यू ला छं ? स्यूसा कना ब्यू रे । प्लीज धाये ।’

जिगु खँ न्यनालिं खितितिति न्हिलाः जितः खिसी व थःत किसी यायां आसामरुचां म्हुतु चायेकल, ‘धत्तेरीका ! जाबो थुलि माइनर खँय न कपाः झ्यातुका च्वनागुला छं ? थौंकन्हय् थन बांलाक म्वायेत सुद्धि जक दयां मगाः बाउ, न्ह्यपुइ बुद्धि चुली वयेके फुसा धकाः न्ह्यागुं सिम्पल जुइ । टेक्नीक सल धाःसा चप्पल छाप मनू तकं खर्वपती जूगु व म्हिगः तक तुति गयाः बेकारे जुइपिं मनूत थौं सान्दारगु कार गया जूगु ला छंगु हे मिखां खँ जुइनि, कि मखँ ? टेक्नीक सल धाःसा समाजय् इज्जत शान शौकत मान सम्मानं ला अथें तुति भागी याः वइका । प्याखँ ल्हुइ मसःम्हेसित दबू वाराक्वारां सँ धाःथेंया खँ ल्हायेमते रे ! थःगु बुद्धियात खतं नकां जिइला ? न चुलेथें चुत्तुचुला स्व ले । अले वइका भीआइपि जुइगुया मोस्ट इम्पोर्टेण्ट फर्मूला । अथें अथें भाजनय् कःनि मुइथें बेकारय् म्हुतुं मुइकां जक जिइ ला ?

आसामरुया गतिलागु स्यल्लागु बिचाः न्यनाः जिगु नुगलय् करेण्ट म्वायेकं हे आसाया मत च्यानाः सः पिज्वल ‘ओहो ऽ छु याःसा नां दां कमें यानाः भीआइपि जुइ फइ धयागु खँ छं बांलाक्क हे स्यूगु थूगु जुयाच्वन खनि । बरु जितः नं छक्वः कनाब्यु रे भाइ, कोटि बिन्ति धाये छन्त । छंगु थ्व गुणयात जिं जिन्दगी गुब्सं हे ल्वमंके मखु ।’ जिगु खुसामदि व चाकडीया पहः खनालि थःगु न्हाय्यात पोलःचा यायां आसनामरुचां धाल, ‘स्वैतं कनेमते न्हे सा ?’ जि ‘हस’ धयागु पाकः भासं छ्यँ संकाबिया । ‘का बांलाक्क न्यं न्हैसा’ धयालिं छम्ह सच्चाम्ह गुरुं पक्काम्ह चेलायात दीक्षा बिइथे भीआइपि जुइगुया मूल मन्त्र सुरुयाना हल ।

‘का, दकले न्हापां, छ्ेँय्नंं निसें हे स्टार्ट यायेका न्है । थन स्व, छेँय्् बँय् मूलपति थ्यानाः भ्यातः कँे नाप स्वारा स्वारां पाल्हातिं जा नयेमाःसां मेंपिन्थाय् अर्थात पासाभाइ थःथिति पिन्थाय् नये मालकि टेबुलय् च्वनां काँटा चम्चां नयेगु वानिं, ल्हातिं ला नेयेसःगु हे मखतका ऽ धकाः ल्हातिं जा नये मसः थें यायेगु । थथे यातकि आहो ऽ थ्वला भीआइपिम्ह मनू धकाः लाना च्वन बा ऽ धकाः मात्तुमालासां चम्चा बिइहइ । तरकारी तिरकारी न्यावनेवलय् नं थःम्हं दंगु तरकारी छुं दइला जगतया जुइमा जय । फिलिमख्यःया जुइमा याकनं विजय ! ! ! धकाः चाचाःहिलाः वजारय् माला च्वनागु इलय् सुं नापलात धाःसा तुरुन्त हे “न्हूगु तरकारी छुं वःगु दु ला ? धकाः चाः चाःहिला च्वनाःगु बजाः छगुलिं चाःहिले धुन, गनं हे न्हूगु तरकारी मखंका ऽ । न्हिछिं ला जक ननं वाक्क हे जुइधुंकल, छक्वः म्हुतु फेरेयाये घकाः कुरिलो स्वः वयागु गनं हे मरू का ऽ धकाः धायेमाः । अजं जिउसा बजारय् खने मदुगु दकले थिकेगु तरकारीया नां कायेमाः । खवरदार ! यथे तरकारी न्यावनेबलय् ल्वःमनानं खनेदइगु पारदर्शी झोला यंके मज्यू । जित्तले खने मदइगु कापःया झोला ज्वना वनेमाः । छाय्धाःसा निन्हु स्वन्हु बासीगु दंगु पाछैचा न्याना यंकागुला सुनानं खंके मजिलनि सा । अथेहे नकतिनि–नकतिनि अँ वयेत्यंगु सीजन जूसा बांलाःगु बांलाःगु अँ वल ला धकाः स्वःवयागु, गनं हे मदुका ऽ । अँ छकू – दःसा जा कुहाँ वनीगु । छु याये धाक्वः धेबाः पुले धयां हे न्यायेगु मदु का ऽ धकाः धायेगु । थये याताक छंगु महानता बढे जुयाः अटोमेटिक हे छ भीआइपि जूवनी ।

गनं पार्टी पिर्टीइ वनेबलय् न गोम्पय् गुन्द्रु क्वचिने थें जियां जित्तले मेपिन्स मखंक प्वाथय् स्नाय्क्स क्वचिनेगु यायेमाः । होशियार ! तर छथासं च्वनाः नये मज्यू खँ ला । गुबले उम्ह नापलाये थे – गुबलें थुम्ह नापलाये थें यानाः थाय् फेरे–फेरे यानाः प्वा तन्न मजूतले स्नाय्क्स पेले यायेगु । अले लिपा डिनर कायेबलय् फयाफत्तले भ्वय् थुवाः न्ह्योने दुगु ई लाकाः छगू चम्चाति पुलाव, नलूला निकूति व मेंमेंगु घासात कयाःगु खःला खःजक यानाः कायेगु । अले भ्वय् थुवाःनं मजिल–मजिल छुं हे कयामदी का ऽ थुलिं गनं प्वाः जाइ धकाः मेगु भचासां कयादिसँ धालकि ‘जि नयेगु सदां थथे हे खः । थुलि दःसा गाः जितः’ धकाः धायेगु । न्हाचः निन्हु यात गाक्क स्नाय्क्स पेले यागु ला भ्वय् थुवाः नं मस्यूनिसा । अले कर–कर यानाः भ्वय् थुवाः थम्हं हे थ्वला भीआइपिम्ह मनू खनिं धकाः थम्हं हे नलू निकूसां कयाः तने हइ । अले मति–मति काइदाया फाइदा जुल धकाः मख्ख जुइमाःसां पिने म्हुतुं मयल – मयल का ऽ छु यानाः दियागु थ्व ? प्वाथय् न्ह्यनी हे मखुत धयाः, आः वांछ्वये धाःसां नुगः स्याः, उकिसं छि थपायेच्वं माया यानाः तयेहःगु, मनःसा न पाप हे लाइगु जुल’ धाधां खँ सयेकु सयेकुं मज्जां फुक्कं नलुला माक्कुक च्वायेगु यायेमाः ।

कापः किपः, लाकांलिका न्यायेबलय् नं मेपिन्सं मखंक सेलय् तयातःगु न्यायेमाःसा छक्वः निक्वः ततःधंगु कापः व लाकां पसलय् वनाः तच्वकं थिकेगु सूटसाट, लाकालिकां स्वयेगु यायेमाः । वरु, थथे वनेबलय् थः पासापिं वा थःथितिपिं न्ह्याम्हसां ब्वनाः वनेगु यायेमाः। कापः लाकां छु स्वयागु खः, व स्वयेधुंकाः लास्टय् रंग बांमलाः बुट्टा यः मताः, लाकांया डिजाइन भचा बांमला धकाः छता न छता कुँ खिनालि अन मदुगु रंग वा बुट्टाया कापः वलकि अन मदुग डिजाइनया लाकां वल कि जितः फोन यानाःदिसँ, धेबाया मतलव मदु, सामान बांलायेमाःका जितः धकाः कंगालपतिम्ह जूसां थःत अरबपति प्रमाणीत यायेगु कुतः यायां मोबाइल नम्बर न त्वःता थकेगु यायेमाः । कथंकदाचित लिपा उम्ह पसल्यां फोन हे यानाः हसां ग्याये नं म्वाः । थः डिल्ली वजारे बालंजक च्वनच्वनागु जूसा जि दिल्लीइ दु थौंकन्हय्, आम्कन नेपालय् थ्यनकि वयेका धकाः धायेमाः । कन्हय् उम्ह पसल्यां थःत गनं चाहिला च्वनागु इलय् खन हे धाःसां जिगु पसलय् छाय् मवयागु धकाः मुद्दा तये फइगुला मखुनि मखुला ? थथे यातकि थ्वला धाक्वः धेबाः पुलीम्ह गाँठवाल भीआइपि खनीका धकाः समाजय् छंगु प्रेस्टिज ला बेसाः भाः थें छत्थुं ह्वात हे थहाँ वनाः धरहराया च्वकाय् हे थ्यंवनी ।

अनं गनं थःथिति पासाभाइपिनिगु छेँय् वनबलय् नं मौका लाःसा च्यागः लालमन् च्वाइम्ह जूसां मिल्क टि कि ब्लाय्क टि धकाः न्यन धाःसा चिनी मदुगु ब्लाय्क जूसा बांलाका धायेमाः । अले ब्लाय्क टि हइबलय् नं रंगभचा कडा जुल धकाः बच्छि जक त्वनेगु यायेमाः । गफगिफ यायेबलय् नं थः सतक छाप रोडपति जूसां करोडं क्वय्यागु खँ भुलेजुयाः नं ल्हायेगु स्वयेमते । बरु, साइत स्वयाः राईट जुइकथं थयेक दंगुदिंगु छेँ छखा न्यायेमदुला धकाः न्यनेगु यायेमाः । अले गुलि ति वंगु धकाः न्यन धाःसा आःयात आपाः वंगुला न्याये मफु, अथे आठ दश करोड ति वंगु जक दःसा गाः धकाः धायेमाः । थथे यातकि थ्यला गजबम्ह भीआइपि खनीका धकाः समाजय् छंगु मर्यादाया ट्याँकि पूmल जुयानं – ओभर फ्लो जुइ ।

थुकथ हे ज्याजि मदयाः मनीप्लाण्ट सुखूगंगु जक मखु, पुकू यायेत हे मदयेक मनीप्लाण्ट सीना वनाः तरकारीया खँय् छेँय् कलाः नाप ल्वानाः व भुजिं ख्यानाः न्हिं छ्याना च्वनेमाःसां म्हगसय् तकं हे ल्वमना नं सुयातं हे जि फुर्शद दु, ज्या मदयाः अथें सुम्क च्वनेगु यानाच्वना धकाः सुयातं नं कनेगु यायेमते । न्हिच्छि हे व्यस्त, मलाः बिजी धयागु आभाष सकसितं याकेमाः । ट्वाइलेटय् च्वनागु ईलय् सुयागुं फोन वःसा तकं हे जि छगू अर्जेन्ट मिटिङ्गय् ब्यस्त दु धकाः धायेमाः । फोन वइगु इलय् नं छगू निगू घण्टिइ हे काचाक्क फोन ल्ह्वनाः ‘हलो’ धायेगु याये मज्यू । झण्डै पुरा घण्टी वयेका फोन ला ल्ह्वनेगु, तर काचाक्क हलो मधासें फोन यानाः हःम्हेस्यां तायेक मेम्ह नाप खँ ल्हाना च्वनाम्ह थें यानाः “ज्यू, धया ज्यू, जि पाँच करोडया शेयर न्याना बिइ धाये धुन नि” धकाः धायेगु । गुब्ले गुब्ले थथे फोन वइबलय् ‘ओहो ! संसारय् हे न्यागः जक दुगु गाडी ? का सा का अय्सा छगः जिगु नामय् नं का, काहुँ । जिगु नापं संसारय् खुगः गाडी दतका छुपाइ धकाः । अस्सि करोड सा अस्सि करोड का । सीबलय् यनेगु छु दु धकाः । फुक्कं त्वःता हे वने मानिगु खः थे’ धकाः दार्शनिक पहलं खँं ल्हायेगु अले तिनि फोनय् हेलो धायेगु यायेमाः । छायधाःसा न्ह्याबलें छता हे जक खँ मल्हासें म्हालाकाय्चा रंग हिली थें हिला हिला खँ ल्हायेगु हे भीआइपि मार्गया दकले तःधंगु मार्ग दर्शन खः ।

थुकथं हे न्हिं च्याक्वः झिक्वःति फोन यानाः थें हावाय् फोनयानाः जलाःखलाःपिन्सं तायेक ‘.. ऐ मन्त्रीजु ला, नेताजु ला डिआइजीला जरसाहेवला धकाः ततःसलं हालाः खँ ल्हाना थें यायेगु । छेँय् थःथिति, पासा भाइपिं वया च्वंगु इलय् झं ततःधपि उद्योगपति ब्यपारी राजदूत मेयर इत्यादिपिंतान खँ ल्हानाः च्वनागु थें यानाः मौकाय् चौका ह्वानाः लौका खायेगु सिद्धान्त यात नं जन्तरचा थें सदां हे नुगलय् घानाः तयेगु यायेमाः । थथे यात कि छंगु भीआइपि पनला मान्चोसा सगरमाथा च्वकाय् हे मथ्यंनी मखु का । का आः ला छंगु जासिइ जा बुत मखुुला ? का आःयात जि वन धाधां छतिं हे विस्तार मयासें तुति स्टार्ट यानाः ब्वानां हे छ्वत । जितः नं जीवनय् प्रवल व सफल मन्त्रया सूत्र प्राप्त जुल । अले श्रदाभक्ती तयाः आसामरुं धाःगु नियमत पालना याना न्ह्यज्याना । थौं सकासनं भीआइपि मनू धायेकाः समाजय् प्रतिष्ठित जुया मान सम्मानकथं म्यावेत सफल जुल जि । उकिं छिकपिं न अभाव समस्या दुःख कष्ट गरिबी इत्यादि हुनिं समाजय् तिरस्कृत अपहेलित, अपमानित जुयाः म्वाये मालाच्वंगु दःसा आवलि आसामरुचिया थ्व मूमन्त्र छ्यलाः झंगःलाना जुइमा ध्वं लानाः जुइमा, न्ह्यागु कर्म यानाःनं थःगु भंगः जक जायेकेगु स्वयादिसँ । दिन दुगुना रात चौगुणा प्रगती उन्नती यानाः धान्तराय्न धायेक भीआइपि जुयादिसं । विलम्व छाये ? आः हे पला न्ह्याका दिसं । झासँ भीआइपि जुयादिसँ ।