छगू न्ह्यसः नेवाः म्युजिक भिडियो ख्यलय् लुयाच्वनिगु खः कि सामाजिक संजाल, युट्युबय् छपू नेवाः म्येया औसत भ्यूज गुलि दु ? थुगु विषयया निंतिं छुं कथंया अनुसन्धान यानानं स्वये फइ । सामाजिक संजालय् अनेकौं व्यवसायिक युट्युब च्यानलस दु । थुज्योगु हे च्यानलय् नेवाःम्येत अपलोड नं जुयाच्वनेगु याःसा गुलिं ब्यक्तिगत च्यानलय् नं नेवाः म्ये अपलोड यानातःगु दु । व्यसायिक च्यानलय् आपा भ्यूज वइ धकाः म्युजिक भिडियो निर्माण याःपिंसं थज्योगु हे व्यवसायिक च्यानल मालाः थःगु म्ये तइगु खःसा गुलिं गुलिं व्यक्तिगत च्यानलय् व्यवसायिक च्यानल सिबें आपाः भ्यूज वयाच्वंगु नं दु । उकिं छता खँय् झी प्रस्ट जुइमाः की नेवाः म्ये पिकायेतुं हे व्यवसायिक च्यानलय् पितबिइवं हे आपा भ्यूज दइगु मखु ।
युट्युबय् झीसं नेवाः म्येया दकलय् आपाः भ्यूज दुगु धकाः मालास्वल धाःसाः दकलय् आःपाः भ्यूज दुगु नेवाः म्ये धैगु हे इमर्ज ब्याण्डया मैंचा म्ये लुया वइ । थुगु म्ये दच्छि न्ह्यः पिदंगु खःसा थुगु म्येया भ्यूज मुक्कं ४७ लाखया हाराहारी दु । नेवाः म्येया खँय् मैंचा लिसे वृजेश श्रेष्ठया ओ मैंचा म्ये नं लोकंह्वाःगु हे म्ये खः तर थुगु म्ये धासा पूवंक नेवाः म्ये मखुसे छुं छुं झ्वः जक हे नेवाः म्येया दु । उकिं थ्व पूवंक हे नेवाः म्ये खः धकाः झीसं धायेथाय् मदु ।
थुकथं हे भ्यूजया आधारय् नेवाः म्ये मालास्वल धाःसा मेगु म्ये सिरसाया हेकु म्ये खः । सरीता मालाकारं हालातःगु थुगु म्ये नं थ्यं मथ्यं ३० लाखया हाराहारी दु । हाइलाइट्स नेपालया च्यानलय् दुथ्याकातःगु थुगु म्ये सन २०१५य् अपलोड यानातःगु खः । उकथं हे भ्यूजया ल्याखं मेगु लोकंह्वाःगु म्ये देविका बन्दना व राजेश महर्जनया जिगु वैशं धाल म्ये खः । थुगु म्ये २० लाखं आपा भ्यूज दु । थुगु म्ये मन्त्र दिव्य च्यानलय् अफलोड यानातःगु करीब ६ बर्ष दयेधुंकल ।
भ्यूजया ल्याखँ नेपालभासाया म्ये स्वल धाःसा छसि कथं ४० लाख, ३० लाख व २० लाखया हाराहारी न्हाप ल्यू व लियांल्यूया स्थीतिइ दु । तर भ्यूजया ल्याखँ धायेगु हे खःसा नेपालभासाया म्येया भ्यूजया पानाच्वंगु ल्याः १० १० लाख हे पानाच्वंगु दु । उकिं थुगु ल्याःया आधारय् धायेगु खःसा नेपालभासाया म्येया भ्यूज सन्तोष जनक मजू । छगू म्ये व मेगु म्येया भ्यूज पानाच्वंगु कारण छु खः व छाय् नाप नापं वा धाय् १, २ लाखया जक फरक खने दयेमाःगु मदुगु तर थन धाःसा दसौं लाखया फरक खनेदयाच्वंगु दु ।
उकथं हे नेपालभासाया भ्यूजया आधारय् लोकंह्वाःगु म्ये हरीमाया नेवाः दोहरीया म्येया भ्यूज १७ लाख दु । मदन कृष्ण श्रेष्ठ व हरिवंश आचार्यं स्टेजय् हालादीगु थुगु म्ये महसंचारया युट्युबय् दुथ्याकातःगु दु । नेपालभासाया म्येया भ्यूजय् एकरूपता थुगु म्ये निसें वयाच्वंगु दु । थुगु म्ये धुंकाः नेवाः म्येया भ्यूज कथं आः छसि कथं हे एकरूपता खने दु । बुद्ध भजन, जयनमः श्री बुद्ध भगवान, १६ लाखया हाराहारी दु । बज्रादया नामं न्ह्याकातःगु थुगु युट्युबय् खः । उकथं हे बज्र क्रियशनया युट्युबय् तयातःगु पानवती संकिपाया म्ये व छु गल्ली, थ्व छु गल्ली म्येया भ्यूज नं १२ लाखया, कन्हे निसें न्वत्तुइ मखु.. हाइलाइट्सय् तयातःगु म्ये १२ लाख, आः वइवु स्वाँया पुन्हि म्ये ११ लाखया हाराहारी दु । उकथं हे यो मां हारती .. म्ये नं ११ लाख भ्यूज पुले धुंकूगु दु ।
थनंलिपाया म्ये धाःसा १० लाख भ्यूज सिबें म्हो जक हे दु । जामाचो वा वल – सानुबाबु महर्जनं हालातःगु थुगु म्येया भ्यूज ८लाख ४५ हजारया हाराहारी दु । थुगु म्ये न्यादँ न्ह्यः पोष्ट याःगु खः । ८ लाख २० हजारया भ्यूज दूगु बुइँ वनेत्यनाला कविन महर्जनया युट्युब च्यानल दु । राजमति कुमति संकिपाया म्ये ८ लाख १० हजार भ्यूज दु । उकथं छसि कथं शरण महालक्ष्मी (७४७ k), दिपक बज्राचार्यया मन मगन नेवाः भर्सन (७३१k), मदनकृष्ण श्रेष्ठया सलय् तुयुमति संकिपायाः हथाय् चाये मते (७०४k), सिरसाया हेकू रक भर्सन (६३३k), बसन्त द सिजन अफ जोय् (६३३k), मदनकृष्ण श्रेष्ठया चौ खमुलय् (६११k), सुं मदुगु ताक स्वया वा (५८९ k), स्वस्ती महर्जनया अन्ति पना (५५५ k), फागु पुन्हिया होली (५१८k), मुसुमुसु न्हिला (५०५ k), हाइ हाइ रे कान्छी मैंचा (५०१ k) दु ।
नेवाःतय्गु जनसंख्या तथ्यांक स्वयेगु खःसा नेपाः दुने १२ लाख दु । विश्वन्यंक नेवाः त गुलि दु धैगु खँय् आधिकारीक रूपं गनं मदुनी । संगीतयात परिभासा गनं निश्चितता मदु । उकिं थुगु खँ आ झीसं वाःचायेके माःकी विश्व मंचय् नेवाः संगीतया उपस्थीति तसकं हे न्यून वा म्हसिका थने फूगु अवस्था मदुनि । छाय् धाःसां नेवाः म्येया दकलय् आपा छगूयां छगू जक म्ये धैगु इर्मज ब्याण्डया मैंचा म्ये छपू जक जुयाच्वंगु दु । नेवाः संगीत ख्यलं आः युट्युबयात दृष्टिकोणय् तयाः ज्याः न्ह्याकेमाःगु खने दु ।
