अनलाइनपाखें यौन दुर्व्यवहार जुइगु खँ छुं न्हूगु विषय बस्तु मखये धुंकल । अय्नं अनलाइनय् छु छु जुल धाःसा व दुर्व्यवहार जुइ धैगु खँ स्वयंम दुर्व्यवहारया शिकार जूपिंसं नं मथू अले गुलिं खँ थःम्हं हे अनलाइन यौन दुर्व्यवहार जुयाच्वन धैगु खँ झीसं नं सियाच्वंगु दइ मखु । नेपालय् नं अनलाइन पाखें यौन दुर्व्यवहार यायेगु घटना न्हिंया न्हिथं अप्वयाच्वंगु दु ।
सिविन नेपालया रिपोर्ट कथं धायेगु खः सा झीथाय् सुं नं मचा च्यादँ पुले धुंकल अले वैत इन्टरनेट छ्यलेत छुं रोकतोक मदुसा व मचा अपुक्क हे अनलाइन पाखें यौन दुर्व्यवहारया शिकार जुइ फु । थ्व तसकं हे ग्यानापूगु लिसें खायुगु सत्य खँ खः । थुकी सुं गरीव वा धनी, आःखः ब्वनातःपिं वा ब्वनामतःपिं छुं कथंया विभेदकथं जुइ मखु । न्ह्याम्हं हे अनलाइन दुर्व्यवहारया शिकार जुइ । विशेषत थौंया स्थीतिइ कोभिडया कारण नेपालय् अधिकांश धैथे पढाइ अनलाइनय् जुइगु जुयाः थः मस्तय्त अथें मोबाइल लिसें म्हितेत मोबाइल बिइगु धैगु तसकं हे रिस्कया खँ खः ।
अनलाइन यौन दुव्यवहार जिमि मस्तय्त गथे याना जुइ धकाः झी मां अबुपिं ढुक्क जुयाच्वनी । छाय्की झीसं इमित छगू कथं मोनिटरिंग हे यानाच्वंगु नं दइ । तर झीगु मोनिटरिंग धाःसा उलि शसक्त जुइ मखु । मस्तय्त धकाः झीसं युट्युबय् मचा म्ये, मचा प्याखँ तयाब्युसां थी थी कथंया वयस्क सामाग्री थम्बनेल कथं पिज्वयाच्वंगु दइ । छाय्की व युट्युब एकाउनट व्यस्क मनूतय्गु जुयाच्वनिं । युट्युबय् झीसं छक्व छु कन्टेन्ट स्वल वं ल्यत्तु ल्ययाः ज्वःलाःगु सामाग्री न्ह्यब्वयाच्वंगु दइ । अले गुलि थज्योगु कन्टेन्ट स्वइ उलि हे युट्युबं सजेस्टेड भिडियो धकाः न्ह्यब्वयाच्वनिं ।
थथेहे तुं याना मस्त सुम्क च्वं धकाः इमित थीथी कथंया मोबाइल गेम म्हितका तयेगु इलय् गेम सिधयेधुंका अनेकौं कथंया पप्अप विज्ञापन वयाच्वनिं । अकसर थज्योगु गेमय् बिज्ञापन पप्अप जुइगु धैगु इन्टरनेटय् छिं गज्योगु सामाग्री स्वइ वहे कथंया बिज्ञापन वा पप्अप् ब्वलनाच्वनिं । थज्योगु खँ झीसं वाः चाइ मखु । तर इन्टरनेटं धाःसा फुक्कं कथंया डाटा मुंकातःगु दइ । मस्तय्सं थुकथं अनुचित सामाग्री वा ई मत्यकं स्वइगु थज्योगु खँ इपिं मानसिक रुपं नं तयार मजुइनिगु व याउँक हे अनलाइनया माध्यमं यौनशोषणया शिकार जुयाच्वनिं ।
अनलाइन यौन दुर्व्यवहारया मेगु छता ग्यानापूगु प्लाय्टर्फम धैगु अनलाइन वार गेम्सनं खः गन कासा म्हितु म्हितुं छम्ह लिसे मेम्ह नं याउँक खँ ल्हाये ज्यु । थज्योगु कासाया कारण मस्तय्त साइबर बुलिंग नं जुइगु याःसा अपशव्द निसें अनैतिक शब्दया नं सामना याये माली । उकिं अनलाइन पाखें मस्त अःपुक्क हे झीसं बिचाः हे मयाना कथं यौन दुर्व्यवहारया शिकार जुयाच्वंगु दु ।
