येँ महानगरपालिकाया मेयर विद्यासुन्दर शाक्य, उप-मेयर हरिप्रभा खड्गी श्रेष्ठ लिसें कार्यकारी प्रमुख राजेश्वर ज्ञवालीयात गुरुपुन्हि खुन्हु स्थानीय स्कुलय् नेपालभासा ब्वंकाच्वंपिं शिक्षकपिंसं सम्मान यात। येँ महानगरपालिकां निजी व सरकारी स्कुलय् स्थानीय बिषय नेपालभासां ब्वंकेत उकीया पाठ्यक्रम लागू यायेधुंकाः शिक्षकपिंसं सम्मान यात।
सम्मान ज्याझ्वलय् मेयर शाक्यं नुगः खँ प्वंकुसें नेपालभासा नेवाःतय्गु जक भाय् मखु, थ्व राष्ट्रया हे भाय् खः । थुकीयात थपू यायेगु ज्या स्थानीय सरकार याःगु नं खः धकाः धयादीगु दु । नेपालभासा ब्वंकेगु खँय् सकसितं सकारात्मक जुइत व सामाजिक संजालय् अनावश्यक खँ वसां उकियात नकारात्मक लिसः बिइगु वा कुँ मखिनेत इनाप यानादीगु दु । तर्क संगत खँ तयाः स्थानीय विषय अन्तर्गत नेपालभासा ब्वंकेगु वातावरण ब्वलंकेगु झी सकसिया हे भाला जुगु खँ न्ह्यथनादिल ।
