निगलं जलासेँ स्यनां वासः याकाच्वनादीम्ह नेपालभासा एवं नेपाः न्यंक हे लाेकंह्वाःम्ह कलाकार पल्पसा डंगाेलया उसाँय् सुधार जुयाच्वंगु खँ वय्कया किजा अज्जु डंगाेलं पेजथ्रीयात जानकारी बियादीगु दु । लिसें किड्नी डाेनर नं दयेधुंकुगु खँ व याकनं हे किड्नी ट्रान्सप्लान्ट जुइगु संभावना दुगु खँ नं कंगु दु ।
ताः इ न्ह्याे निसें हे पल्पसा डंगाेलं थःके थज्याेगु राेग दु धकाः स्युसां सुयातं हे मकंसे थःम्हं हे वासः याकाच्वंगु खः । तर छुं इ न्ह्याे निसें पल्पसा डंगाेलया उसाँय् मभिनेवं हे अस्पताल हे भर्ना याये माःगु अवस्था वल ।
निगलं जँलास्ये स्यनेवं जँलास्येँ हे ट्रान्सप्लान्ट यायेमाःगु अवस्थाय् छम्ह डाेनर मदयाः पल्पसा डंगाेल वाथा वाथा कनाच्वंगु भिडियाे तसकं भाइरल जूगु खः । जँलास्येँ ट्रान्सप्लान्ट यायेगु निंतिं थः निम्हं म्ह्याय्पिं तयार जुसां म्ह्याय्पिनिगु उमेर वाधक जूगु व ला हिया स्वापू दुपिंसं जक जँलास्ये बिइ माःगु नेपाःया कानूनं तसकं हे मछिनाच्वंगु खः । तर आ लसताया खँ खः की पल्पसा डंगाेलयात जँलास्येँ बिइत वय्कया थःथितिपिं नं न्ह्यचिलाः वःगु अवस्थाय् याकनं हे किड्नी ट्रान्सप्लान्ट जुइगु लक्ष्ण खने दुगु खः।
तर किड्नी ट्रान्सप्लान्ट यायेगु निंतिं स्वयम पल्पसा डंगाेलया उसाँय् उलि बांला मजूनी । तर आशा याये बहगु खँ छु धायेबलय् आ पल्पसा डंगाेलया डायलासिस सुरू जुइ धुंकुगु दु सा खाना नं म्हुतुं हे नयाच्वंगुलिं याकनं हे किड्नी ट्रान्सप्लान्टया समस्या ज्यनिगु खँय् सकलें आशावादी जुयाच्वंगु दु । लिसें पल्पसा डंगाेलया किड्नी ट्रान्सप्लान्ट नं थनया हे टिचिंग हस्पितलय् हे जुइगु नं जानकारी अज्जु डंगाेलं बियादीगु दु ।
