लकडाउनया इलय् नेपालभासाया मनोरंजन ख्यःयात छुं कथंया गतिशीलता बिइगु कथंया ज्याखँ न्ह्यानाच्वंगु दु । नेपालभासा ख्यलय् छुं न्हूगु संकिपा हलय् रीलिज यायेगु संभव मदु । तर नं नेपालभासाया अनेकांै प्याखँत थौं सामाजिक संजालय् थी थी माध्यमं पिदनाच्वंगु दु । न्हूगु प्याखँत हलय् क्यनेगु वा हल हे पियाच्वनेगु अवस्था मदुसां थी थी नेवाः प्याखँ युट्युबय् थ्व निशेधाज्ञाया ई दुने पिदनाच्वंगु दु ।
मुख्यतः नेपालभासाया संकिपा पिदनाच्वंगु निता उद्देश्य नाले फइ । छगू ला नेपालभासाया सेवाः हे खः अले मेता थःगु लाय् लित सालाकायेगु । थौंया स्थीतिइ नेपालभासाया संकिपा क्यनां लाय् लित सालाकायेगु स्थीति मदु । थ्व हे कारण नेपालभासाया न्हू न्हूगु संकिपा अनलाइनय् स्वयेगु व्यवस्था यायेफइगु स्थीति मदुसां न्हापा हे निर्माण जुइ धुंकुगु नेवाः संकिपा थी थी हुनिं हाकनं प्रदर्शन मजुयाच्वंगु बुलुहुं आ सामाजिक संजालय् खने दयावयाच्वंगु दु । अवश्यन नं नेपालभासाया संकिपाः स्वयेगु इच्छा सकल नेवाःतय्के दु ।
युट्युबय् दुगु नेवाः प्याखँ
युट्युब छगू अमेरिकन अनलाइन सामाजाकि संजाल खः गन प्याखँ, संगीत स्वयेगु दइ । न्यनेगु सिबें थीथी स्वयेगु माध्यमत थन मुंकाःतःगु दइ । थःत माःगु कथंया प्याखँ वा भिडियो वर्गिकृत यानातःगु दइ । छगू की–वर्ड टाइप याना स्वल धाःसा थःतः माःगु वाः थःम्ह धाःगु थें जाःगु भिडियोया धलः वइ । थः अझ स्पेसिफिक जुयाः माला स्वल धाःसा थःम्ह धाःगु हे भिडियो संकिपा लुइ । युट्युब सन २००५ निसें शुरु जूगु छगू अनलाइन प्लाय्टफर्म खःसा थन हरेक मिनेट सयौं भिडियो प्याखँ त अपलोड जुयाच्वनिं । युट्युब छगू टेक्निकल प्रणाली जूगुलिं युट्युबं छुं नं विषय वर्गिकृतयाना की–वर्ड (मू शव्द) निर्माण यानातःगु दइ । व की–वर्ड टाइपयातकी की–वर्डलिसे स्वापू दुगु प्याखँत क्यनी ।
लकडाउनया करण हे जक झी नेवाःत नं आ युट्युब पाखेभचा सकृय जुयाच्वंगु खँ वाः चायेके माः । युट्युब शुरु जूगु थौं १६ वर्ष दयेधुंकल गुकिंयाना नेवाः प्याखँयात युट्युबं छुं छुं कि वर्ड बियातःगु दु । थुपिं की–वर्ड कथं नेवारी धैगु खँग्वः यक्व प्रचलनय् दु । उकिं नेवाः प्याखँत स्वयेगु निंतिं युट्युबय् झीसं नेवारी मुभिज धकाः टाइप याना स्वल धाःसा नेवाः प्याखँ लुयावइ धकाः सकस्यां स्यु । तर थ्व बाहेक नं नेपालभाषा मूभिज वा नेपाल भाषा मूभिज धकाः माला स्वल धाःसा नं नेवाः प्याखँत लुयावइ ।
नेवाः प्याखँया कि वर्ड युट्युबं दयेकीगु मखु । थज्यागु की–वर्ड युट्युबं हे सर्चया आधारय् छगू पद्धति दयेका तइ । सुनां छु की–वर्ड सर्च याइ व वं गज्यागु छु प्याखँ स्वइ धकाः पद्धती निर्माण याइ अले व हे कथं प्याखँया की–वर्ड निर्माण जुइ । उकिं सन २००५ निसें शुरु जूगु युट्युबं नेवारी मुभिज धकाः लुयाच्वंगु खःसां थौं भाषिक चेतना वा भाषिक अनुरागया कारण नेपालभासा मूभिज धकाः माला स्वःसां नेवाःप्याखँ उतिकं हे क्यं ।
कि–वर्ड
युट्युबया कि वर्डयात थी थी विश्लेषणात्मक इन्जिनं विश्लेषण याना स्वये ज्यु । थज्याःगु हे छगू सर्च इन्जिन ट्युब वड्डीया विश्लेषण स्वयेगु इलय् नं थौंया इलय् नेवारी मूभिज धकाः युट्युबय् सर्च याइगु की–वर्डया औसत १५ क्यनाच्वंगु दु । अर्थात थुगु शब्दया तौल वा थुकीया छ्यलाबुलाया असर धैगु १००य् १५ जक मनुखं छ्यः । वाः १००य् १५ जक थुकीया प्रभावकारीता दु ।
उकथं हे नेपालभासा मूभिज धकाः युट्युबय् सर्च यनास्वल धाःसा थुकीया तौल १७ क्यनाच्वंगु दु । अर्थात १००म्ह मनू मध्ये १७ म्हं थुगु की–वर्ड छ्यः वा थुगु की–वर्डया प्रभावकारीता १०० पूर्णांकय् १७ जक दु ।
तर युट्युबय् नेपाल भाषा धकाः आखः छुटे याना सर्च यायेगु अर्थात झीसं नेपालभासा गुगु जोडेयाना च्वयेगु यानाच्वन, उकियात फायाः नेपाल अलग्ग व भाषा अलग्ग च्वयाबिल धाःसा युट्युबं थुगु आखःया औसत ४६ क्यनाच्वंगु दु । नेपालभासाया की–वर्डयात मात्र छगू स्पेश कि तियाः मालेबलय् थुकीया प्रभावकारीता दोब्बर जुयाच्वंगु दु । नेपाल भाषा धकाः युट्युबय् सच्छिइ ४६ म्हं टाइप याइगु जुयाच्वन धाःसा थुगु शब्दया प्रभावकारीता १००य् ४६ दु ।
छुं नं नेवाः प्याखँ वा नेवाः म्ये जक झीसं अपलोड याना मगाः । व भिडियो स्वकुमिथाय् तक्क गथे थ्यंकेगु धैगु चिन्तन झीगु नं जुइमाः । मात्र नेवाः प्याखँ अपलोड याना नेवाःतय्सं सितिकं प्याखं स्वये दइ वा स्वये खनिं धकाः मनय् तयेगु खँ जुइमखु । न्हापां नेवाःतय्त वा नेवाः प्याखं स्वये चाहे जुपिनिगु सर्च इन्जिनय् उगु की–वर्ड नं लुइमाः । वा पहुँच सरल जुइमाः । थुकीया नितिं नेपालभासाया संकिपाः अपलोड याइगु च्यानलं नं चलनचल्तिइ दुगु कि–वर्डस छ्यले माः ।
उकथं हे नवाः प्यानय् अपलोड यानातःगुलिइ छु की–वर्डस् छ्यलातःगु दु धकाः नं अपलोड यानातःगु भिडियोलय् माला स्वये ज्यु ।
थ्व बाहेक नं कि–वर्डस्या छ्यलाबुला गुकथं यायेगु धैगु बिषयलय् ज्ञान आवश्यक जु । स्वःसा निगः आखः थें च्वं तर की–वर्डस् थौंया इलय् तसकं हे महत्वपूर्ण बिषय खः ।
लिपांगु खँ
थुकीं छु सिइ दु धाःसां की–वर्ड गुगु झीसं निर्माण याना तयेगु खः व ह्यास ट्याग मार्पmट युट्युबया विवरण (डिस्क्रिप्शन) व टाइटलय् सिइदयेक उल्लेख जुयाच्वने माः ।
स्वयेगु प्याखँया बारे जक मखुसे थःगु युट्युब च्यानलया बारे नं की–वर्ड निर्धारण यायेगु आवश्यक जू । थःम्हं दयेकेत्यनागु की–वर्ड गुलि सेल्ला धैगु थी थी कथंया विश्लेषणात्मक औजार इन्टरनेटय् लुइके फइ । व की–वर्डया तौल लिसे ल्वयेक थःगु नं प्याखँया वा भिडियोया की–वर्ड निर्धारण यायेगु पद्यतीयात थुइके माः ।
