सकसिगु हे नितिं धइथें आः मनोरन्जनया साधन धइगु स्मार्ट फोन अले सामाजिक संजाल हे जुइधुंकल । न्हापा जूसा न्हूगु फिल्म वलकि हलय् ड्रेस सर्कलय् च्वनाः स्वयेगु शानया खँ जुइगु खःसा लिपा वनाः मल्टिप्लेक्स हलया जमाना नं झीसं स्वया । आः वयाः स्मार्ट फोन ल्हातिइ तयाः भिज्युअल सामाजिक संजालय् यूट्युबया जमाना वःगु दु । संकिपा जुइमा, म्यूजिक भिडियो जुइमा अथवा मोटोभ्लगिङ, ट्राभल भ्लग, कुकरी, लाइफस्टाइल दक्वं स्वयेगु अले ब्वयेगु माध्यम यूट्युब जुयाच्वंगु दु । युट्युब मनोरन्जनया जक मखु, बांलाःगु आम्दानीया नं माध्यम जुइफु । थौंकन्हय् आपाःसिनं युट्युबयात थःगु आम्दानीया माध्यम दयेकातःगु दु । युट्युबया हे माध्यमं बांलाःगु आम्दानी यानाः नां नं दां नं कमे यानाच्वंपिं युट्युबरत यक्व दु ।
नेपालय् ल्याय्म्हतय् दथुइ आइडल थें जूम्ह युट्युबर धालकि सिसन बानियाँया दक्कले न्ह्यःने वइ । अप्वः यानाः ट्राभल भ्लग्स न्ह्यब्वइम्ह सिसनया भिडियोलय् सिनेम्याटीक सटया प्रशंसा अप्वः जू । सन् २००८ सेप्टेम्बर ८ य् दयेकूगु थुगु च्यानलय् ५ लाख ४९ हजार धइथें सब्सक्राइबर थ्यनेधुंकल । सुसन महर्जनया मोटोभ्लगिङ च्यानल क्ःश् य् १ लाख ७७ हजार सब्सक्राइबर थ्यनेधुंकल । तर सुसनं थुगु च्यानलय् भिडियो अपलोड यायेगु त्वःताः SMZ Sama धइगु न्हूगु च्यानल दयेकूगु दु । अप्वः यानाः रियाक्सन भिडियो तइगु थुगु च्यानलया सब्सक्राइबर नं ४७ हजार थ्यनेधुंकल । थुकथंया हे नेपाली युट्युब च्यानलत यक्व दु । साजन श्रेष्ठ, कुशल पोखरेल, साब्या केसी, भाग्य न्यौपाने, आयुष रिमाललिसें अझ यक्वं युट्युबर दनि, सुनां युट्युब च्यानलपाखें नेम व फेम आसिल याःगु दु ।
थज्याःगु लकसयात दुवालाः स्वयेबलय् सेलिब्रेटि जुयाच्वंपिं नेवाः युट्युबरत नं मदुगु मखु । तर नेवाः भासं हे न्ह्याकाच्वंगु व कथंया पपुलर युट्युब च्यानल धाःसा खास हे खनेमदु । नेपालभाषाया हे हलंज्वलंयात प्राथमिकता बियाः न्ह्यब्वयाच्वंगु युट्युब च्यानलया खँ ल्हायेबलय् थुगु पेज थ्री बाःछिपौ पिथनाच्वंगु ई ल्वहँ पब्लिकेशनया हे युट्युब च्यानलया नं नां वइ । ‘Elohan Prakashan – YouTube’ हे नांया युट्युब च्यानलया १७ सलं मल्याक्क सब्सक्राइबर दयेधुंकल सा २ लख ३० द्वः स्वयां अप्वः भ्यूज थ्यनेधुंकल । थुगु च्यानलय् आःतक्कया भ्यूज स्वयेगु खःसा दक्कले अप्वः ‘इन्द्रायणी’ शर्ट मूभीया ९९द्वः भ्यूज थ्यंगु दुसा कं नं स्वां जुइ म्येया कभर म्ये कासां च्यानलया भ्यूज व सब्सक्राइबर थकयाब्यूगु खनेदु ।
नेपालभाषाया हे यूट्युब च्यानलया खँ ल्हायेबलय् ‘newa youtube’ या नां नं त्वःफिकेमज्यू । नेवाः म्यूजिक भिडियो, नेवाः गतिविधिया रिपोर्टलिसें थीथी नेवाः ख्यःया हे गतिविधि न्ह्यब्वइगु थुगु च्यानल नेवाः अनलाइन न्यूजया अफिसियल युट्युब च्यानल कथं न्ह्यानाच्वंगु दु । थुकी आःतक्क स्वद्वः सब्सक्राइबर थ्यनेधुंकल सा भ्यूज नं बांलाः हे खनेदु । आःतक्कया भ्यूज काउन्ट ३ लाख २३ हजार स्वयां अप्वः थ्यनेधुंकल ।
अथे हे, म्यूजिक भिडियो मेकर लिसें सिनेमाटोग्राफर लुःजः सिंहया Lujaw Entertainment य् अप्वः धइथें नेवाः म्यूजिक भिडियो हे अपलोड जुयाच्वंगु दु । थुगु च्याललय् ११ सः स्वयां अप्वः सब्सक्राइबर दयेधुंकल सा भ्यूज ३ लाख स्वयां अप्वः दयेधुंकल ।
अथे हे, नेपालभाषा अप्वः छ्यलाच्वंगु दक्कले लोकंह्वाःगु युट्युब च्यानल आशुतोष बाराहीयागु खनेदु । अप्रिल ११ २०२० य् चायेकूगु AashutoshBrh नांया आशुतोष बाराहीया युट्युब च्यानलया सब्सक्राइबर ल्याः ला ४२ द्वः पुलेधुंकल सा टोटल भ्यूज ला ३५ लख धइथें थ्यनेधुंकल । विशेष कथं भाइन्स भिडियो अथे धायेबलय् ख्यालिन्हिलां जाःगु हलंज्वलंतनापं भ्लग नं दयेकाः न्ह्यब्वइगु थुगु च्यानलय् आशु व बाःया खँल्हाबल्हा ला पूवंक हे नेवाः भासं हे जुयाच्वनी सा यक्व थासय् नेवाः भाय् हे छ्यलाच्वंगु खनेदु । थुकिया विषयवस्तु नं ई कथं नेवाः जात्रापर्व, नखःचखः हे जुयाच्वंगु दइ । थुगु च्यानलया पात्र बाःया थेगो ‘धाःसा धाल धाइ’ ला यक्व ल्याय्म्हतय्त तसकं यःगु थेगो जुयाच्वंगु दु । थुगु हे युट्युब च्यानलपाखें आशुतोष बाराही छम्ह लोकंह्वाःम्ह युट्युबर अले सेलेब्रिटी हे जुइधुंकूगु दु ।
ल्याय्म्हतय् दथुइ तसकं लोकंह्वाःगु मेगु युट्युब च्यानल ‘Gwajya :P’ नं खः । पुजल बज्राचार्य व प्रवीण खरेलया थुगु युट्युब च्यानलया सब्सक्राइबर ६द्वः स्वयां अप्वः दुसा भ्यूज ल्याः ५ लख पुलेधुंकल । थ्व च्यानलय् अप्वः धइथें भाइन्स भिडियो हे न्ह्यब्वयेगु यानाच्वंगु दु । थुगु च्यानलया भिडियोजय् पुजल व वया अबु हिसिलालया पात्र पुजलं हे म्हिताच्वंगु दुसा प्रवीण व वया अबु मणिरामया भूमिका प्रवीणं म्हिताच्वंगु दु । थुकी नं पुजल व हिसिलालया खँल्हाबल्हा नेवाः भासं हे जुयाच्वंगु दइ । अझ गनं गनं ला प्रवीण व हिसिलालया खँल्हाबल्हा तकं नेवाः भासं तयातःगु दयाच्वनी ।
सुनिता डंगोलया युट्यूब च्यानल नं ल्याय्म्हतय् दथुइ खुब लोकंह्वाः । नेपालभाषा स्यनीगु ट्युटरियल भिडियोत न्ह्यब्वयाः सुनिता डंगोलं न्ह्याकाच्वंगु युट्युब च्यानल Sunita Dangol या सब्सक्राइबर ३ हजार सिबें अप्वः दुसा भ्यूज नं ७६ हजारया न्ह्यःने थ्यनेधुंकल ।
युट्युबया ट्रेन्डयात स्वयेगु खःसा कि मखुसा कन्टेन्टं हे भ्युअर सालेगुलिसें सब्सक्राइबर अप्वयेकूगु खनेदुु । ग्वाज्य पि अथवा आशुतोषया च्यानलयात स्वयेबलय् थुकी कन्टेन्टं भ्युअर सालेगुलिसें सब्सक्राइबर थकाःगु खनेदु । भ्युअरयात ख्यालिन्हिलां जाःगु भिडियो स्वयेयःगु खनेदत । उकिया नापं थुगु निगू च्यानलया कन्टेन्टत लकडाउनया इलय् नं अपलोड जूगु दु । सर्ट कमेडी भिडियो अथवा भाइन्स चीहाकलं थः याकःचा च्वनाः अथवा प्रविधिया सदुपयोग यासें चित सट छ्यलाः नं भिडियो दयेकाः अपलोड जुयाच्वंगु दु । इमर्ज ब्यान्डया युट्युब च्यानलया नां नं थनथाय् न्ह्यथनेबहःजू । लकडाउनय् हे मैंचा म्ये दयेकाः अपलोड यायेधुकाः थुगु म्यें भ्युअरयात बांलाक हे सालाकाःगु खः । थ्व कन्टेन्टया खँ जुल । थुकिया नापं च्यानलं बीगु प्रोग्रामपाखें नं सब्सक्राइबर थकायेगु फइगु खनेदु । ईल्वहँ पब्लिकेशनया युट्युब च्यानलया सब्सक्राइबर कभर म्ये कासां थकायाब्यूगु खनेदुसा लुःजः सिंहया च्यानल लुःजः इन्टरटेनमेन्टय् नं मोबाइल फोटोग्राफी कन्टेन्टं धाये अथवा प्रोग्रामं सब्सक्राइबर थकयाब्यूगु खनेदछ । बांलाःगु कन्टेन्ट अथवा सहभागीतामूलक ज्याझ्वलं मनूतय्त आकर्षित याइगु फर्मूला नेपालया मेमेगु युट्युब च्यानलं ल्यूगु खनेदु । थ्व हे कथं छगू योजना अले भिजन दयेकाः नेवाः भाय्या, नेवाः हलंज्वलंया युट्युब च्यानलत न्ह्याकावंसां थुकिं नेवाःतय्सं नं नां व दां नितां कमे यायेफइगु खः ।
