छुं नं धटनां विना योजना अथें भाइरल जुइ मखु । सामाजिक संजालया प्रवृति स्वल धाःसा छुं नं खँ भाइरल जुइगु निंतिं युट्युवरतय्सं अनेक प्रपंच छ्यला भाइरल यानाच्वंगु दइ । वा छुं कथं सामाजिक संजालया अनलाइन न्यूज पोर्टलतय्सं ‘अज्योगु’ बुखँ ग्वाका हे च्वंगु दइ । सामाजिक संजालय् स्वल धाःसा हत्या, वलात्कारया बुखँयात नं प्याखँया नां थें थी थी क्याप्सन बियाः बयबय् यानच्वंगु हे दइ । तर थज्योगु बुखँ धैगु छन्हु वा निन्हुं लिपा हे तनावनिं । तर गुलिं गुलिं इश्यू दयाच्वनी, गुगु गब्लें पुलां जुइमखु । थज्योगु इश्यू सामाजिक संजालय् अनलाइन न्यूज पिकाइपिं अले युट्युवरतय्सं बांलाक्क हे स्यु ।
युट्युवर व अनलाइन न्यूज पोर्टलतय्गु मू आम्दानीया श्रोत धैगु हे भ्यूज व क्लिक्स खः । गुलि आपास्यां थज्योगु समाचार स्वइ, ब्वनिं उकिं झन आपा व्यापार याइ । थज्योगु हे भ्यूजया निंतिं भारतय् न्ह्याब्लें न्यूज च्यानलय् हिन्दु मुस्लिमया डिबेट यानाच्वनिं, भारतयात भिं धकाः क्यना भारतया जःखः देय् पाकिस्तान, चीन व नेपाः मभिं धकाः क्यनाच्वनि वा निम्ह मनूया खँ नं (व्यक्तिगत खँयात नं जातीगत खँय् स्वाकाः जनरलाइज यानां यंकी)। पत्रकारीताया थुगु पद्दतियात भारतीय पत्रकारीताया स्टाइल धकाः थुइके माः । छुं छकूचा मछिंगु घटना जुइ सातकं सम्पूर्ण समुदाय हे मभिं धकाः क्यनेगु व निगु पक्षयात सामाजिक संजालय् ल्वाकाः हाकनं वं थथे धाल वं अथे धाल धकाः रिएक्शन पत्रकारीता यायेगु थ्व भारतीय पत्रकारीताया प्रभाव कथं थुइके माः ।
नेपालय् भारतीय् सिनेमा, न्यूज, सिरियल व आपा हे भारतीय प्रभाव लानाच्वंगु खँ गनं सुचुके माःगु मखु । तर सरस्वती प्रधान व रूपा सुनारया घटना धाःसा सुनियोजित लिसें भारतीय पत्रकारीताया प्रभाव दु धकाः अपुक्क थुइका कायेफइ छाय्धाःसां थुगु मुद्दायात नं छगू ग्लामरस नां बिया प्रधान मर्सेज सुनार धकाः ग्लाएमराइज यानाच्वंगु दुसा छुं छगू घटना जुइसातकं हे थुकीया रिएक्शन न्यूज मद्दिक्क पिहांवयाच्वंगु दु । लिसें थुगु धटनां गुगु कथं राजनीतिक मोड काःगु दु व मोडनं तसकं हे नाटकीय खने दयाच्वंगु दु ।
हरेक पार्टिं छगू पक्ष लिनां वक्तव्यवाजी यानाच्वंगु दुसा राजनैतिक रूपं विरोध याये मफयाच्वंगु इलय् हरेक पार्टियात सरकारया विरोध यायेत नं छगू त्वह लुयाच्वंगु दु । थुगु हे त्वह दुने थौं नेवाःतय्सं थुइका कायेमाःगु दु कि – झी नेवाः त संसारया न्ह्योने सम्पदा प्रेमी, मिलनसार, संस्कार दुपिं व स्वनिगःयात छगू मेल्टिंग पट धकाः धयाच्वंसां स्वनिगः वासीयात मेपिंसं गथेयाना स्वयाच्वंगु दु धकाः वाः चायेके माःगु दु । झी विचलित जुइमज्यू । यथार्थ न्ह्याबलें यर्थाथ हे जुयाः ल्यना च्वनी ।
