जुजु जयप्रकाश मल्लया पालंनिसें प्रचलन शुरूयाःगु जीवित द्याेःपिं मध्य मुलरूपं येँयाः पुन्हि खुन्हु पुज्याइपिं श्री कुमारी, श्री गणेश व श्री भैरवया राष्ट्रप्रमुखपाखें संकल्प पुजा यात। संकल्प पुजा क्वचाये धुंकाः गणेश व भैरवयात बसन्तपुरया कुमारी छेँ हःगु खः । अले स्वंम्हं जीवित द्याेपिनिगु पुजा कुमारी छेँय् याःगु खः ।
श्री गणेश (संवेग शाक्य) व श्री भैरव (रुजन शाक्य) यात समय परिस्थिति व बर्षया कारण युवा अवस्थाय् थ्यंगुलिं नियमकथं वयकपिन्त विदा याना न्हूम्ह द्याेपिं ल्येत शाक्यतय्गु १६ विहारय् सूचं छ्वया शाक्य कुलपुत्रपिनिगु निवेदन व जातःया आधारलिसें पंचाग निर्णायक समितिया सिफारिस कथं देया अवस्थालिसे ज्वः लाःगु गुणदाेष, लक्षण व नक्षत्रया आधारय् भाष्कर देव संस्कारीत केशचन्द्र कृत पारावर्त महाविहार इतुंबहालया शाक्य कुलपुत्र राेदिन शाक्ययात नव प्रतिस्थापित याःगु खः । श्री गणेशया रूपय् वि सं २०७७ पाैष ३ गते प्रतिस्थापन याःगु खः।
उकथं हे नव प्रतिस्थापित श्री भैरवया रुपय् कीर्तिपूण्य महाविहार क्वहिति बहाया शाक्य कुलपुत्र कर्सनव शाक्ययात वि सं २०७७ पाैष ४ गते विधिवत रुपं प्रतिस्थापन याःगु खः ।
संकल्प पूजाया लसताय् आमन्त्रित सकलसित भ्वय् नं नकूगु खः । थुगु संकल्प पुजाया संयाेजन शाक्य महाविहार संघ येँ पाखें याःगु खः ।
