बिष्णुमाया ब्यञ्जनकारया न्हूगु म्ये जितः ख्वयेका छ वने फइ मखु.. थाैं जूम पाखें छगू ज्याझ्वः याना न्ह्यब्वल । संगीतगुरू पद्मज्याेति बज्राचार्यया मूल रचनायात बिष्णुमाया ब्यञ्जनकारं हाकनं हालादीगु खः । थुगु म्यय् न्हापां खुशी संचारकःमि अनुप शाक्य व राेजीना सुवाल भुमिकाय् दु । लिसें थुकी सुष्मा बज्राचार्यं नं साथ बियाच्वंगु दु ।
थाैंकन्हेयाम्ह छम्ह व्यस्त निर्देशक सुरज नापितं थुगु भिडियाे निर्देशन यानादीगु खःसा थुगु म्येया सम्पादन लिसें छायाँकन अमर चित्रकारं यानादीगु दु ।
जूम मार्फत जूगु थुगु भच्युअल ज्याझ्वलय् कलाकारपिंसं थःथःगु नुगः खँ तःगु खः । पाहां कथं वरिष्ठ सिने पत्रकार विजयरत्न असंबरें म्युजिक भिडियाेया तारीफ याना दिल । पेजथ्री पत्रिकाया सम्पादक एवं थीथी म्युजिक भिडियाेलय् संलग्न जुयादीधुंकुम्ह दर्शनवीर शाक्यं म्येया शैली कथं भिडियाे भचा माेर्डन जूगु खनेदुसां भिडियाेया कलाकार एवं छायाँकन बांलागु खँ कनादील ।
पत्रकार बिराजकाजी राजोपाध्यायं म्यूजिक भिडियोय् पात्र जीवन्त जुलकि तिनि निर्देशक सफल जुइगु बिचाः तयादिल ।
ज्याझ्वलय् कलाकार सुरज ब्यंजनकार, स्वतन्त्र संसार महर्जनं नं थःथःगु बिचाः तयादीगु खःसा म्यूजिक भिडियोया संगीत संयोजक जुगल डंगोल, मोडलत अनुप शाक्य, सुषमा बज्राचार्य, रोजिना सुवाल, क्यामेरा निर्देशक व भिज्युअल एडिटर अमर चित्रकार, निर्देशक सुरज नापितं थःथःगु अनुभव न्यंकादीगु खः ।
मदुम्ह मन्त बज्रं च्वयादीगु म्येया म्युजिक भिडियोया बाखं सत्य घटनाय् आधारित जूगु खँ म्ये हालामि विष्णुमाया ब्यंञ्जनकारं कनादील ।
