नेपालभासाया मनोरंजन ख्यलय् इलय् ब्लय् थी थी कथंया विवाद ब्वलनेगु याः । तर छुं नं विवाद गुलि आवश्यक वा गथे याना समाधान यायेगु धैगु खँय् छुं नं कथंया आधिकारीकता बिइगु संघसंस्थाया सेल्लागु उपस्थीति मदु । थुकीं नं सिइदु की नेपालभासाया मनोरंजन ख्यः अझंनं आधिकारीक जुइगु लँपुइ न्ह्यां वनेमफूनी । मनोरंजन ख्यः व्यवसायिक जुइगु निंतिं अझं यक्व हे ई मानी धकाः थुइके माः ।
नेपालभासाया मनोरंजन ख्यलय् गुलि नं प्याखँ, म्युजिक भिडियो निर्माण जुइ व फुक्कं हे व्यवसायिकताया म्हगस ज्वना जक हे निर्माण जुइगु खः । न्ह्याक्व हे ध्यबा खर्चयाना प्याखँ, म्युजिक भिडियो दयेकुसां उकिं लाय् सालाकायेगु निंतिं उचित प्रणाली (सिस्टम)या ब्यवस्थापन मजू । यक्वस्यां हे व्यापारिक दृष्टिं सिबें नेपालभासा ख्यःया उत्थान व बिकास यायेगु निंतिं धकाः सेवाया भावं नेवाः संकिपा, म्युजिक भिडियो निर्माण यानाच्वंगु दु । फयाफत्तले थःगु भाय् गुकथं ल्यंका तये धकाः प्रचारया निंतिं हे निर्माण जुयाच्वनिं । तर हालसालय् छगू म्येया कभर भिडियो विवादं नेपालभासा ख्यलय् तरंग हःगु दु । राजमति कुमति फिमेल भर्सनयानां हाइलाइट्स नेपालय् अपलोड जूगु खःसा काजी प्रोडक्शनं थुगु म्येया कभर भिडियो दयेका थःगु युट्युब च्यानलय् अपलोड याःगु खः । थुगु खँयात कयाः म्युजिक भिडियोया निर्देशक पवन जोशीं थुगु भिडियोयात अनाधिकृत रूपं दयेका युट्युबय् प्रदर्शन यात धकाः वक्तव्य पिकया उगु म्ये लिकायेकल ।
व्यवसायिक रूपं युट्युबय् छुं नं खँ मेपिनिगु कृति खुयाः तये मज्यु । तर युट्युबय् अनेकौं कथंया छपू हे म्येया थी थी भिडियो दयेका तयातःगु तकं क्यं । गुलिं नेवाः म्ये हलिउड व बलिउड म्येया लसय् हालाः नं दयेकातःगु दु । अज्योगु हे म्ये जक हाला नेवाः कलाकार धकाः धस्वनाच्वंपिं दु । तर वय्कपिनि उद्देश्य धैगु उगु म्ये हाला युट्युब पाखें छुं आम्दानी यायेगु मखुसे नेपालभासाया अनुरागी जूगु कारणं हाःगु खः । उकिं हरेक खँयात नकारात्मक रूपं स्वयेगु आवश्यक मजू । छगू होमभिडियो दयेका युट्युबय् अपलोड यायेतुं छुं कथंया बौद्धिक चोरी हे जुइ माः धैगु मदु । न्हूगुपुस्तायात नेपालभासा ख्यः प्रति आकर्षित यायेगु निंतिं थुगु कथंया गतिविधि जूगु बांलागु खँ खः । तर छु थुगु पुस्तां हाकनं छुं नेवाःम्येया भिडियो दयेकेगु कुतः याइ ला ? तर कभर याःपिंसं नं जिमिसं थुगु म्यें कभर यानागु धकाः सोर्स बिइधाःसा मां ।
छुं नं लोकंह्वाःगु म्येग्वः, खँग्वः वा छुं नं नक्कल याना दयेकेगु बौद्धिक चोरी हे खःसा ला राजमति कुमति धैगु शब्द नं नेवाः लोक म्येया हे लिधंसाय् दयेकतःगु म्ये खः । थुकीयात धाःसा गुगु कथं काये माली ले ? छु नेवाः म्ये धाय्वं नेवाः सभ्यता लिसे स्वानाच्वंगु म्येया लिधंसाय् न्हूगू म्ये दयेके दइ ला ? आः तक्क आधिकारीक रूपं लोक म्ये धाःसां रेकर्ड याना तःगुला सेतुरामं हालातःगु राजमति म्ये लुयाः वःगु दु । छु वय्कयाः परिवारयाके उजं कयाः राजमति कुमति धैगु शब्द छ्यःगु खै ला ? वास्तवय् कलाकार जुइ धुंकाः कलाकारया छुं नं कला थःगु जुइ मखु । सकस्यां व नाला काइ । छम्ह कलाकारया कृति ययेका कायेगु धैगु कलाकारया सम्मान खः । झन थज्योगु सम्मान बिल धकाः लयतायेमाःगु थासय् अखतं नोटिस छ्वयेगु धैगु झीगु कलााक्षेत्र अझं नं संकुचित व नेपालभासाया मनोरंजन ख्यः न्ह्यां वनेत अझं ई काइतिनिं धैगु संकेत खः ।
