न्ह्यःखँ
“आसकुति” छगु तसकं बय्बय् यानातःगु न्हूगु नेवाः फिल्म खः । कलात्मक नेवाः फिल्म धकाः बय्बय् जूगु थ्व फिल्मया निर्देशक सुरेन्द्र तुलाधर खः । “याकः म्ह्याय्” फिल्मया सह निर्देशक व च्वमि या नापनापं कलाकारया रूपय् नेवाः फिल्म ख्यलय् दुहाँ वःम्ह सुरेन्द्र तुलाधरया निर्देशनय् “अंश”, “जिपिं बदमाश मखु”, “जिगु मिखाया न्ह्योने”, “मू मदुगु जिन्दगी” व “पानबति” लगायतया बागु दर्जनं मल्याक नेवाः फिल्म पिदने धुंकूगु दु । “आसकुति” वय्कःया न्हूगु फिल्म खः । आःतक पिदंगु सुरेन्द्र तुलाधरया फिल्म स्वयेबलय् विशेष याना मनोरन्जनमूलक यानि कि फिल्मी भासं धायेगु खःसा कमर्शियल फिल्मत खः । आः वया “आसकुति” यात छगू कलात्मक फिल्म धका प्रचार याना यानातःगु दु । कलात्मक फिल्मयात आर्ट फिल्म धका धाइ । आः थ्व आर्ट फिल्म धइगु छु खः ? धइगु चर्चा थन मयाये । संसारया फिल्मया ट्रेण्डयात नं दुवाले मखु । भारतया छगूनिगु हिन्दी फिल्मया जक दसु बिइगु कुतः याये ।
हिन्दी फिल्मया ख्यलय् सन् सत्तरीया दशकय् पिदंगु भुमिका, मन्थन निसें कया अर्ध सत्य, आक्रोश, अल्बर्ट पिण्टोको गुस्सा क्यों आता है, जाने भि दो यारों अले एक्कासौं शताब्दिया शुरु जुइ धुंका पिदंगु फिल्मय् अमिताभ बच्चन व दिपिका पादुकोने दूगु “पिकू”, आयुष्मान खुरानाया बधाई हो, विकी डोनर, तापसी पन्नु व भुमि पेंडेकरया साँड कि आँख, मिस टनकपुर हाजिर हो, वेलडन अब्बा व अक्षय कुमारया ट्वाइलेट एक लभस्टोरीयात आर्ट फिल्मया दसु कथं कायेजिउ । आः “आसकुति” गन थाय् लाक्क ला धका नं चर्चा मयाये ।
बाखं
“आसकुति”यात प्रचार याना तः कथं छम्ह मिसां ध्येबाया निंतिं आसकुति जुया थःगु हे परिवारपाखें गथेजुया बायेमाल धकाः क्यनेगु कुतः याना तःगु खनेदु । सुरेश शाक्यं च्वयादीगु बाखं कथं छम्ह मध्यम वर्गीय परिवारया म्ह्याय् मचा (कृष्णा श्रेष्ठ)या इहिपा नं छगू मध्यम वर्गया परिवारया कायमचा (सुरज व्यन्जनकार)लिसे हे जुइ । इमिगु मतिनाय् छुं हे कथंया मगाःमचाः मदु । उमिगु मतिनाया चिं कथं काय् छम्ह अले म्ह्याय् छम्ह नं दु । मगाःमचाःया दथुइ नं जीवन न्ह्याना हे च्वंगु दइ । उमिगु मतिनां जाःगु जीवनय् छन्हू अजाम्ह पात्र (सुरज नापित) दुहाँ वइ, गुम्ह पात्रया प्रवेशं फिल्मया पर्दाय् भुखाय् ब्वइ । वहे पात्रया मोहजालय् लाना कृष्णा आसकुति जुइ । तर उम्ह पात्र भिंम्ह पात्र मखया च्वनि । वयागु हे कारणं उम्ह मिसाया जीवन स्यनि । अझ फिल्मयात टुवीस्ट बिइत छम्ह वकिल मिसा व छम्ह पुलिस मिजं पात्रयात नं फिल्मय् मू पात्र कथं न्ह्यब्वयातःगु दु । आः थुलि च्वये धुंका फिल्मय् छु छु जुइ थन च्वये मखु । फिल्म स्वया हे सिइका दिसं ।
सुरेन्द्र तुलाधरया खँ
थ्व “आसकुति” फिल्मयात दकले न्हापांगु नेवाः आर्ट फिल्म धका धयातःथें दकले न्हापां बीग स्क्रनय् क्यंगु अले भि आइ पि शो याःगु नेवाः फिल्म धका नं धाःगु दु । थुके छुं धाये थाये मदु । सुरेन्द्र तुलाधरयात नेवाः फिल्म व कलाकारिता ख्यःया छगः थीगु नगु कथं कयातःगु दु अले उगु नगुं नेवाः फिल्म ख्यलय् व कलाकारिता ख्यलय् माःकथं जः ह्वला वया च्वंगु दु । विशेष याना सुरेन्द्र तुलाधर छम्ह निर्देशक खः अले छम्ह अभिनेता यानि कि कलाकार नं खःसा छम्ह फिल्म च्वमि नं खः । छम्ह फिल्म च्वमिया रूपय् हे थ्व ख्यलय् दुहाँ वःम्ह सुरेन्द्र तुलाधरं आपालं नाटक प्याखनय् ज्या याये धुंका टिभि सिरियल “ख्वताबजि” इ प्रवेश यात । छम्ह च्वमि व कलाकारया रूपय् प्रवेश जूम्ह सुरेन्द्र तुलाधर छुं ई हे लिपा “ख्वताबजि”या निर्देशक जुया नं पिलूवलसा व धुंका “याकः म्ह्याय्” फिल्मया नं च्वमि व कलाकार जुया पलाः न्ह्यात । थ्व फिल्मया वय्कः सह निर्देशक नं खःसा लिपा वना “अंश” फिल्मपाखें थःगु निर्देशनया पलाः क्वातुका यंकल ।
प्रोडक्शन भ्यालु
फिल्मया च्वज्याय् थःगु पलाः क्वातुगुम्ह सुरेन्द्र तुलाधरं दकले न्हापांखुसी छम्ह मेम्ह हे च्वमि सुरेश शाक्यया बाखंयात ल्यःगु “आसकुति” यात नेपालभाषाया फिल्मख्यःयात स्तरिय व ब्यावसायिक रूपं विकास यायेमागु थौयां आवश्यक पूवंकेगु कुतः कथं निर्माण जूगुु धका धयातःगु दु । विविध कारणं नेवाः प्याखं मुक्कं च्यारिटी शोलय् जक लिकुना च्वनेमाःगु थौंया अवस्थायात आशिंक रूपं चिइका वनेगु नापं ब्यवसायिक सफलता चूलाका वनेगु मू तातुना खः । नेवाः प्याखं स्वया नेवाः नुगः ब्वयादीपिं सकल स्वकुमि भाजु मयजुपिनीगु ग्वाहालि व हःपाः चूलाइगु व याउँक हे लगानी दुहां वइगु विश्वास नं “आसकुति” या निर्माण पक्षं यानातःगु दु । थ्व फिल्मया प्रोडक्शन भ्यालु स्वयेबले फिल्म झःझः धाः ।
अभिनय
नेपालभाषाया फिल्मख्यलय् अतिकं सक्रिय व बहुमुखी प्रतिभा दुम्ह निर्देशक÷कलाकार सुरेन्द्र तुलाधरं निर्देशन याःगु नेपालभाषाया फिल्म “आसकुति”या निर्माता बुलाल महर्जन खः । बाखं सुरेश शाक्यं च्वयादीगु खःसा आयाम फिल्मस्या थुगु प्रस्तुतिइ मू भूमिकाय ल्वकंह्वाम्ह कलाकार सुरज ब्यञ्जनकार या नापनापं न्हूम्ह कलाकार कृष्णा श्रेष्ठ मयजुया मेन रोल दुसाः रोजिना सुवाल, सुरज नापित, रामराजा भाम, रञ्जना सिथिखु, रोहन प्रजापति, बुलाल महर्जन, सबिनरत्न शाक्य, कृष्टिना शिल्पकार, सुजन बज्राचार्यपिन्सं नं थीथी रोलय् अभिनय यानाःगु दु । अथेहे पाहां कलाकार कथं कृष्णभक्त महर्जन, सुनीता श्रेष्ठ, नगिना जोशी, अकल महर्जन, हरिमान दिवाकर व मानकृष्ण वावा नं दुथ्याना च्वंगु दु । अभिनयया ल्याखं मू आसकुति मिसा कथं खनेदयेक वःम्ह कृष्णा श्रेष्ठ नेवाः फिल्मख्यःया निंतिं न्हूम्ह हिरोइन खःसा वयात बियातःगु रोलय् वं बाँलाक्क हे ज्या याना सकसिगु नुगः त्याकेत ताःलागु दु । व धुंका भतिचा मभिंम्ह पात्र कथं खनेदयेक वःम्ह सुरज नापितया रोल उलि ताहाक मजूसां वं थःगु रोलयात न्याय याःगु दु । लिड रोलय् म्हिता च्वंम्ह सुरज व्यन्जनकार छम्ह बाँलाम्ह कलाकार खः अले बाँलाक हे ज्या याना क्यंगु दुसा रोजिना सुवालयात बियातःगु रोल नं चिहा जूसां वं नं थःगु ब्व बाँलाक पूवंकुगु दु । पुलिस जुया म्हिताच्वंम्ह रामराजा भाम भतिचा लाउड खनेदु वया तिरीमयजु वकिल जुया म्हिता च्वंम्ह रन्जना सितिखु बरु बाँलाजू । थ्व फिल्मय् धयातःकथं यापिं आसकुति अर्थात लोभय् लाःपिं पात्र थुपिं खः, कृष्णा ला परिबन्दया जालय् लाना जक आसकुति खनेदुगु खः ।
थीथी पक्ष
थ्व फिल्मय् कलाःभाःत दथुइ ल्वापु इस्टाएब्लिस यायेत इमि जलाःखःला दथुइ जुइगु हुइनाभुइनाया लु, कलाः व भाःत या अफिसय् जुइगु व्यवहारया लुया ग्वाहालि कायेछीं तर कयातःगु मदु । क्यामेरा÷सम्पादन अमर चित्रकार, संगीत नील शाक्य, संगीत संयोजक भुपेन्द्र बज्राचार्य, रेकर्डिष्ट सुरेन्द्र श्रेष्ठ, सः सतिस महर्जन, निशा देसार, दिपा महर्जन, कोरियोग्राफर निशिला शाक्य, सहायक निर्देशक सबिनरत्न शाक्य, निर्माण नियन्त्रक मञ्जिल शाक्य, मेकअप पूजा शाही, पोष्ट प्रोडक्शन सिनेजोन बागबजार, डबिंग सुजन बडाल जुपिन्सं थःथःगु जिम्मेवारी बाँलाक्क हे पूवंकातःगु खः । क्यामेराया ज्याया चर्चा यायेबलय् अमर चित्रकारं थःगु न्हापांगु फिल्म जुयानं ज्या बाँलाक हे याना क्यंगु दु तर उगु फिल्म क्यंगु हलया कारणं खला फ्रेमिङ्ग धासा गनं गनं काटेजू अले अमर चित्रकारया सम्पादन गनं गनं बाँलासां छुं छुं लु चिहा यायेथाय् दु । फिल्मया क्लाइमेक्स कथं न्ह्यब्वयातःगु बज्रबाराही जंगलया लु तसकं बाँला । मनय् थिउ । थ्व लु छगू आकर्षण खः फिल्मया । थ्व लुया मू आज्जु धइगु मू पात्र सुरज व्यन्जनकारं छुं छुं लुमंके पह याइगु व भ्वय्ब्वः बिउवंम्ह केंहे. व वया तताया लु खः तर निता खँ क्यनेत ताउत तक द्यः भागिया वंगु लु अले भ्वय् नयेगु तयारी याना च्वंगु लु अप्व । थुकियात अझ क्वातुसे च्वंकेगु थाय् सम्पादकं त्वफिकल धका धायेमा । अथेहेतुं हिरो थः पासाया थाय् मोटरसाइकल त्याये कायेत वंगु लु नं चिहा याये जिउ ।
दकले लिपा
कलाकःमि सुरेन्द्र तुलाधर छम्ह बाँलाक अभिनय याइम्ह कलाकार अले फिल्म च्वइम्ह फिल्मकःमि जुया नं थुुके थ्व नितां ज्या धाःसा व थःम्हं मयागु धइगु नं छगू च्वछाय् बहगु पक्ष खः । थ्व फिल्म प्रचार यानातःथें कलात्मक फिल्म जुल वा मजुल धइगु बिस्कं खँ खःसा थ्व छगू स्वयेबहगु नेवाः फिल्म जुुुया पिदंगु खँय् धाःसा शंखा यायेथाय् मदु । थ्व फिल्म स्वपिं स्वकुमिपिन्सं तसकं हे येकुगु धइगु हे थ्व खँ या दसु खः कि आसकुति छगु मनोरन्जनात्म अले अप्वः लोभ याये मजिउ धइगु शन्देश ह्वलातःगु नेवाः फिल्म खः धका धायेमा ।
