येँ महानगरपालिकां न्ह्याकाच्वंगु नेपालभासाया पाठ्यक्रमया बिषय यक्वसिया मिश्रित कथंया बिचाः पिदनाच्वंगु दु । महानगरपालिकां न्ह्यथनांच्वंगु थुगु पाठ्यक्रम पूर्ण रूपं हे सहि निर्णय खः धकाः सत प्रतिशत रूपं झी नं पत्याः जुइ मफूनि । गुलिस्यां थुगु पाठ्यक्रम लागू याःगु बांला धकाः धाःसा गुलिस्यां थुगु पाठ्यक्रम ऐच्छिक बिषय कथं जक तयेमाःगु, अनिवार्य मयाये माःगु धैगु खँ नं तायेदु । नेवाः नेवाः दुने हे नेपालभासां अध्यापन यायेमाःगु बिषयलय् बैचारीक मतभिन्नता दु । तर थुगु बिषयलय् मेपिं स्पस्ट मजुसां झी नेवाःत वा अझ धाये स्वनिगःवासी निं स्पस्ट जुइ माः की येँ महानगरपालिकां न्ह्यब्वःगु येँ देय् म्हसिके पाठ्यसफू सुं छम्ह व्यक्ति विशेषया महत्वकांक्षा प्रोजेक्ट वा म्हगस धाःसा मखु ।
विसं २०४७या संविधानय् दुगु मातृभाषाया प्रावधान अर्थात राष्ट्रिय भाषाया व्यवस्था यायेगु हुनिं २०४७ सालय राष्ट्रिय शिक्षा आयोगया गठन जुल । थुगु हे आयोगं २०४९ सालय् नेपाः बहुभाषा बहुजातया आधारय् त्रिभुवन विश्वविद्यालयया केन्द्रीय भाषा विभाग निसें ब्वनेकुथिइ दुने मातृभाषा ब्वने दैगु व्यवस्था यानातःगु दु । थ्व हे कथं न्हापांगु शिक्षा पाठ्यक्रम २०६२ व २०६५स प्राथमिक तगिं १ निसें ५ तक्क स्थानीय बिषय\मातृभाषा बिषययात पाठ्यभार ४ व पूर्णाङ्क १०० याःगु जुल । अथे हे २०७६ आधारभूत शिक्षा पाठ्यक्रम कथं आधारभूत तहलय् २०७७ निसें कार्यान्वयन जुइगु स्थानीय पाठ्यक्रमं छगू तगिं निसें च्यागू तगिंया निंतिं कार्यान्वयन यायेगु खः। थुगु ऐन कथं १ निसें ८ तगिंया समयावधि मध्ये स्थानीय तहया समन्वयलय् ब्वनेकुथिइ मुक्कं ई मातृभाषायात अथवा छुं ई मातृभाषायात व मेगू छगू स्थानीय विषययात नं बी फु ।
उकथं हे स्थानीय सरकार सञ्चालन ऐन कथं २०७४या दफा ११ (ज)(४)य् मातृभाषां शिक्षा बीगु ब्वनेकुथियात अनुमति, अनुगमन व नियमन सम्बन्धि व्यवस्था यानाः स्थानीय पाठ्यक्रमया कार्यान्वयन यायेगु खँ न्ह्यब्वयातःगु दु। थुगु ऐनया हे दफा ११ (ज)(१८)य् स्थानीय स्तरया शैक्षिक ज्ञान, सीप व प्रविधिया संरक्षण, सम्वर्द्धन व स्तरीयकरण यायेगु खँ नं च्वयातःगु दु ।
सन २०१६ निसें २०२२ तक्कयात हःगु विद्यालय क्षेत्र विकास योजनां सीप स्यनेगु खँय्, परम्परागत व स्थानीय ज्ञानया छ्यलाबुला गुकथं जुयाच्वंगु दु धकाः माला स्वयेगु व मातृभाषा, राष्ट्रिय भाषा व अन्तराष्ट्रिय भाषायात ब्वंकेगु माध्यमया रूपय् त्रैभाषिक नीति छ्यलेगु व्यवस्था याना स्थानीय मातृभाषायात म्वाकातयेगु व छ्यलाबुलाय् हयाः सम्वर्द्धन यायेगु धकाः उल्लेख यानातःगु दु ।
