कोभिडया निगूगु लहरं हाकनं छक्वः झीत मिखा कंकः वःगु दु । सु गरिब, सु धनि, सु मिजं सु मिसा न्ह्याम्ह जुसां थुगु इलय् कोभिडया ल्वचं कःपिं वासः याकेत दक्वं हे वाथावाथा कनाच्वंगु दु । जीन्दगीया थ्व दौडय् झीसं यक्व हे ह्यूपाः खने धुनागु दु । झीगु पुस्तां असंख्य रूपं राजनैतिक, धार्मिक, समाजिक, टेक्नोलोजिकल ह्यूपाःत खनेधुन । आर्थिक रूपं नं झी न्हापा सिबें तसकं हे स्यल्लाये धुंकल । तर थौंया यथास्थीति धायेगु खःसा कोरोना ल्वचं कयेवं हे अपार बैंक ब्यालेन्स, बंगला, मोटर, नानां कथंया सम्पत्ति थःत सर्वेसर्वा तायेकीपिं नं हस्पितलया खाता छगू चुलाके मफयाः वाथावाथा कनाच्वंगु दु। झीसं चच्छि न्हिच्छि, न्ह्यःपाः याना नःसें मनःसें कमे यानातइगु ध्यबां नं वासः याकेत अस्पतालया खाता छगू चुलाके मफूगु अवस्था वयाच्वंगु दु । थुकीं झीत छक्व बिचाः यायेत वाध्य याइ की आखिर छु खः ले सा झीत माःगु ।
स्कूलया तह निसें हे झीत हेल्थ इज वेल्थ, अर्थात स्वास्थ्य हे सम्पत्ति खः धयागु खँ झीत लुमंके थाकु । झीसं उसाँय्या ख्यः बाहेक हरेक खँय् तिब्र विकास याना यंका तर उसाँय्या क्षत्रयात सरकारं नं उलि प्राथमिकता बियाच्वंगु मदु सा झीत नं उलि च्यूता मदु । झीसं नं थःगु उसाँय्यात कयाः छुं नियमित रूपं व्यायाम वा शरीर स्वयाः खानपान यानाच्वनागु मदुसा सरकारं स्वास्थ्य क्षत्रयात सिबें मेमेगु क्षत्रयात प्राथमिकता बियाच्वंगु कारण थौं कोभिडं सकल नेपाःमिपिंत त्राशया वातावरणय् तयातःगु दु । विशेषत नेपाः सरकारया केन्द्रीय तह राजनैतिक समिकरणय् तक्यनाच्वंगु अवस्थाय् मनूत अक्सिजनया हाहाकार जुयाः प्राण त्याग यानाच्वंगु अवस्था नं दु ।
थौंया अवस्थाय् झीके अस्पतालया हालात तसकं नाजुक दु धयागु वाः चायावःगु दु । नेपालदुने मुक्कं ३करोड जन्ताया निंतिं १८,९१७गू खाता जक उपलब्ध दु धयागु डिसिनेपाल डट कमय् बियातःगु दुु । स्वास्थ्य क्षत्रय् थुकथंया डेटां नेपालय् छुं नं महामारी वःसा वासः मदइगु सिबें नं उचित उपचार केन्द्र मदयाः मनूत सिइ धकाः निश्कर्ष बियाच्वंगु दइ । उकथं हे नीजि अस्पतालय् नं वासः व सुविधा सम्पन्न सिबें थिकेगु उपचार रकमं झन हे मनूत सिना वनिं थें तायेकाच्वंगु दु।
कोभिड छुं ई लिपाः हे क्वचाइ धयागु झीगु विश्वास दु । तर कोभिडया निगूगु लहर क्वचाये धुंकाः स्वंगूगु लहर वा मेगु हे छुं न्हूगु ल्वय् वल धाःसा झी गुकथं तयार जुइगु धयागु खँय् झीसं वाःचायेके लिबाये धुंकल । उकिं सरकारया प्राथमिकता आः स्वास्थ्य क्षत्रय् जुइमाः धकाः झीसं नं दवाव बिइगु पाखे ध्यानवने माः ।
