नेपालभासा ख्यलय् शोकाकुल लकस ब्वलनाच्वंगु दु । अझ नेपालभासा ख्यः जक मधाःसे देय् न्यंक वा अझ हलिं न्यंक हे न्हिंयान्हिथं मनूत पाः जुयाच्वंगु दु । थौंया स्थीतिइ न्ह्याम्ह न्ह्याथे याना मदुगु खःसां प्रेमध्वज प्रधान मत्यवं मदयेवं नेपालभासाया संगीत ख्यः धाःसा तसकं हे अस्तव्यस्त दु धयागु खँ आ प्रस्त जु । गोल्डेन भ्वाइस अफ नेपाल धकाः उपाधी बियातःम्ह प्रेमध्वज प्रधानं नं थुगु अनित्य संसार त्वताः वन तर वय्कःयात छगू अन्तिम श्रद्धाञ्जलि वा बिचाः हायेका तकं बांलाक्क सुनां बिइ मफूत ।
नेपालभासा ख्यलय् बिशेष रूपं नेपालभासाया संगीतयात छगू न्हूगु मोड बियादीम्ह व्यक्तित्व खः प्रेमध्वज प्रधान । नेपालभासा ख्यलय् न्हापा लोकम्ये जक जुयाच्वंथाय् दबू प्याखँया प्रभावं हिन्दी लसय् म्ये हालेगु जुयावल तर थुगु प्रयोगयात बिस्कं हे मोड बिइगु कथं प्रेमध्वज प्रधानं नेवाः म्ये मोर्डन संगीतया प्रभाव बियाः मौलिक नेवाः पहया म्ये हालादीगु खः । प्रेमध्वज प्रधानं नेपालभासा ख्यलय् दुथ्याकुगु रक एण्ड रोल म्ये अझं नं थौंया युवा पुस्तायात उतिकं प्रभाव लाकेगु यानाच्वंगु दु । थथे प्रभावशाली व्यक्तित्व खःसां थौंया इलय् नेपालभासा ख्यलय् छगू सांगीतिक प्रतिस्ठानया अभावं नेपालभासाया सांगीतिक श्रस्तापिं अवमूल्यन जुयाच्वंगु वाः चाइ ।
छगू संस्थागत रूपं प्रभावशाली सांगीतिक व्यक्तित्वपिनिगु दस्तावेज लिसें योगदानयात संस्थागत याये मफयेवं हे नेपालभासाया सांगीतिक क्षेत्र गुलि दरिद्र जुयाच्वंगु दु धकाः वाः चाइ । थौंया स्थीतिइ प्रेमध्वज प्रधानया ग्वपू नेवाः म्ये दु धयागु तकं झीसं यकीन यानां धाये मफूनिं । वय्कलं गन गन लाइभ म्ये हालादिल वा वय्कलं थीथी म्ये हालातःगु क्यासेट चक्का वा सिडि दु धयागु तकं आधिकारीक रूपं तथ्य बिइ मफूनिं । संगीतयात व्यवसायिक मयासे शौखया रूपं जक झीसं कयाच्वन धाःसा थज्योगु अवस्था न्ह्याब्लें हे ब्वलनाच्वनिं । प्रेमध्वज प्रधानया योगदान नेपालभासा ख्यलय् गज्योगु दु धयागु तकं झीसं वाः चायेके मफूनिं ।
नेपालभासाया संगीत क्षत्रय् व्यवसायिक रेकर्डिंगया इतिहासं गज्योगु ह्यूपाः वःगु दु धयागु विश्लेषण याये ल्यं दनिंसा थुकीया श्रेय प्रेमध्वज प्रधानयात गुकथं बिइगु धयागु चर्चा थौंया नेपालभासाया संगीत क्षत्रं बिचाः याये हे माः । झीके दुगु थी थी संघसंस्था प्रेमध्वज प्रधानयात कयाः बिशेष स्थान बियाः बिचाः हायेका तकं ब्यूगु खने मदु । नेपालभासा ख्यः थ्व हे कारण ल्यूने लानाच्वंगु खः । सुं छम्ह मनू सिइधुंकाः तकं वय्कःया योगदानयात गुकथं संस्थागत याना यंकेगु धयागु खँय् झीसं गुब्लें बिचाः हे मयाः । केवल सुं छम्ह व्यक्ति विशेषयात देवत्वकरण यानायंकेगु जक खँ जुइ ।
उकिं नेपालभासा ख्यलय् आः दकलय् महत्वपूर्ण खँ धयागु छगू सांगीतिक प्रतिष्ठान दयेकाः श्रष्टातय्गु कृति दकलय् न्हापां तथ्यांक विवरण दयेकेगु जुइमाःगु दु । झीथाय् सफू, पत्रपत्रिका, प्याखँ इत्यादिया निंतिं थी थी संघ दु तर संगीत क्षत्रयानितिं धाःसा अज्योगु छुं हे कथंया विशेष रुची क्यनाच्वंगु संस्था मदु । संगीत नं मनोरंजनया हे छगू ब्वः खः धकाः थी थी संघसंस्थां थःगु बिधानय् भतिभति न्ह्यंकातःगु दुसां थ्व बारे छुं ज्या धाःसा उल्लेख यायेबह जुइक जूगु मदु । उकिं आः न्ह्यलं चायेके माः ।
