म्युजिक ट्र्याक
भिंतुना, भिंतुना, भिंतुना जागरणया भावना लिसें नेवाः भावना दुथ्याकातःगु म्ये खः । थुगु म्ये शैलस शाक्य बरेजुयाच्वंसां पिदंगु खःसा म्येया संगीत भूपेन्द्र बज्राचार्यं तयादीगु खः । म्ये भूपेन्द्र बज्राचार्य लिसें लसता जोशीं हालातःगु दु । नेवाः जक मखुसे नेपाःमांयात हे भिंतुनाया भाव थुगु म्येय् दु ।
गौतम बुद्ध बुगु निसें शंखधर साख्वाः लिसें प्यम्ह शहीदया जन्म थ्व हे भुमिइ जुगुलिं भिंतुना दु नेपाः मांयात धकाः थुगु म्ये च्वयातःगु खनेदु । म्येया भावयात जक दुवालेगु खःसां नेपाः मामं झीगु देशय् दकलय् न्हापां शान्तिदूत बुद्धयात जन्म बिल, अनं लिपाः देशय् ब्वलनाच्वंगु आर्थिक संकट निवारण यायेगु निंतिं शंखधरयात जन्म बिल, लिपांगु इलय् राणा शासनया विरुद्ध ल्वायेत प्यम्ह शहिदया जन्म थन जुल धकाः नेपाः मांयात भिंतुना बियातःगु दु । देशय् जब जब छुं कथंया संकट वल तब तब नेपाःमां नं सपूतत जन्मबिल धयागु भाव थुगु म्येय् दु । व हे कारण नेपाः मांयात भिंतुना धकाः धयातःगु दु । तर म्येया अन्तय् न्हूदँया भिंतुना धयाः क्वचायेकातःगु दु ।
शब्द
म्येया छगू आधार धयागु हे खँग्वः नं खः । थुगु म्येया शब्दं नेपाः मांयात भिंतुना बियाच्वंगु दु । तर थौंकन्हे नेपाली भाय्या प्रभाव कथं धेरै धेरै शुभकामना धाये थें यक्व यक्व भिंतुना धायेगु प्रभाव थुगु म्येय् खनेदु । जबकी झीसं थःगु भासय् आपलं आपा भिंतुना नं धायेगु याःसा भिंतुना जक धायेगु नं गाः । छम्ह हे मनुखं भिंतुना बियाच्वंगु दु सा वं हाकनं जय जुइ माः धकाः नं धयाच्वंगु दु । म्येया भाव थन थाय् लाक्क अलमल खने दु की थ्व म्यें भिंतुना बिइत्यंगु खःकी भक्ति संगीतकथं जय जयकार यायेत्यंगु धकाः । उकथं हे म्येया भावं नेपाः देय्या विकासक्रमय् बुद्ध, शंखधर व प्यम्ह शहीदया प्रसंग तयातःगु दु । तर म्येया कनक्लुजन धाःसा न्हूदँ हनेगुलिइ क्वचायेकातःगु दु अले झीगु संस्कृति म्वाके धयागु सन्देश बियातःगु दु । शाब्दीक अर्थया ल्याखँ झीगु संस्कार व संस्कृति छु धयागु खँ थुगु च्वसां स्पस्ट याये मफु । म्येया भाव कथं मजुसे थुगु म्ये कविताया भाव दु । कवितात्मकतायात थुगु म्युजिक भिडियों न्ह्यब्वयाच्वंगु खँ स्वल कि तिनि वाः चाइ । म्ये जक न्यन धाःसा न्यंपिं अलमल जुइ की थुगु म्येँ छु धायेत्यंगु दु धकाः ।
संगीत
म्येया संगीतया खँ ल्हायेगु खःसा संगीत कर्णप्रिय जु । नेपाःया पारम्परिक बाजं छ्यलाःतःगु थुगु म्येया संगीत मनमोहक जु । म्येया सलय् भूपेन्द्र बज्राचार्य व लसता जोशीं कुतः यानातःगु दु । तर म्येया म्याग्निच्यूडयात गायन पक्षय् मेगु थप विविध कलाकार दुथ्याकेमाःगु खने दु । जीवनसिबें तःधंगु (larger than life) थुगु म्येया भावयात निम्ह जक कलाकारं पुवंके मफूगु वाः चायावइ । सलय् अझं विविधता दुगु जुसा झन हे मनमोहक जुइफइगु वाः चाइ ।
कन्सेप्ट व चरित्र
म्युजिक भिडियोया कन्सेप्ट सामान्य ढंगं न्ह्यब्वयातःगु दु । म्येया भावं छु छु माग यानातःगु दु व हे कथंया दृष्य थुकी दुथ्याकातःगु दु । बुद्धया जन्म जुल धायेवं बुद्धया ल्यू ल्यू भिक्षुपिं वनाच्वंगु क्यनातःगु दु । तर थुकी क्यनेमाःगु धयागु बुद्धं दुःखपाखे गथे उद्धार यात धयागु खँ वा शान्तिया प्रतिक कथं बुद्धं गुकथं शिक्षा विल, दुःखंमुक्त यायेत ज्ञान इनाविल धयागु खँ दयेमाःगु खः । मात्र बुद्ध न्यासिवनां क्यंगु जकं थौंया इलय् पर्याप्त मजुइ धुंकल । उकथं हे शंखधरयात न्ह्यब्वयातःगु छगू बांलागु न्ह्यब्वया खनेदु । आः तक्क थुलि पत्याः याये बहम्ह शंखधर वा स्वयेबलय् हे शंखधर थें छबि खनेदुम्ह मदुनिं, यद्यपि आः तक्क सुना नं शंखधर गथे च्वं धकाः धाये मफुनिं । उकथं हे प्यम्ह शहीदया परिकल्पना तयार यानातःगु बांला जू । थुलि मछि चरित्र न्ह्यब्वयाः म्यूजिक भिडियो दयेके धयागु अःपुगु खँ नं अवश्य नं मखु ।
म्युजिक भिडियो
छगू म्युजिक भिडियोया स्वरूप गुकंथं जुइ माः धयागु खँय् अनय् तनय् खँ वयाच्वं । कमसेकम प्याखँया म्ये व छगू म्युजिक भिडियोलय् गुकथंया भिन्नता दइ धयागु खँय् छम्ह म्युजिक भिडियो निर्देशकनिं स्पष्ट जुइ माः । म्युजिक भिडियोया ल्याखँ थुगु म्ये स्वयेगु खःसा थुकी प्याखँ सिबें यक्व हे तत्व थ्व म्युजिक भिडियोलय् दु थुकी छगू म्युजिक भिडियोया ल्याखं स्वयेगु खःसा नं म्युजिकल मेमोरी कथं न्ह्यब्वयातःगु दु । म्युजिक भिडियोया छायाँकनय् नं रवि साय्मि स्वयमं हे यानादीगु खः ।
थुकी म्युजिकल पार्ट व ड्रामाटाइज यानातःगु छाँयाकन टेक्सचर पाकातःगु दु । म्युजिक भिडियोया लोकेशन कथं थी थी थाय् छ्यलातःगु दु । छगू म्युजिक भिडियोया मूख्य हाथ्याः धयागु हे लोकेशन जुइ । लोकेशनयात पुवंक छ्य् ले फुगु खनेमदु । किपूया लोकेशनय् ड्रोन शट माःगु सिबें आपा हे छ्यलातःगु दु । ड्रामाटाइजया निंतिं ल्ययातःगु लोकेशनय् मेहनत यानातःगु खनेदु । कलाकार कथं नं थुगु म्येय् चरित्र कथं ल्वःपिं छ्यलातःगु दु । तर थी थी कलाकार कथं न्ह्यब्वयेत स्वःगु इलय् क्यामरा हे स्वये मसःपिं व लिप्सिंग तकं बिइ मफूपिं छ्यलातःगु दु । छम्ह निर्देशकं थज्योगु सम्झौता छाये याये माःगु धयागु न्ह्यसः थुगु म्ये स्वपिंसं न्यनेफु ।अझ छम्ह जक मखु निम्ह जक मखु, सुनां सुनां लिप्सिं बियाच्वंगु इलय् इमिसं म्येया भावकथं जागरणया भाव बिइत सफल जूगु खने मदु ।
तथ्यगत गल्ति
म्युजिक भिडियो निर्माणया दौरान अनेकौं गल्ति जुयाच्वनिं । हरेक म्युजिक भिडियोस छुं तःधंगु वा चिधंगु दयाच्वनिं । थुगु म्युजिक भिडियोया शुरुवातय् हे थुगु संकिपा सार्वजनिक रूपं उपलब्ध जानकारीया लिधंसाय् दयेकागु खः धकाः जिम्मेवारी कयामतःगु disclaimer दु । संकिपा दयेकागु निंतिं घटना काल्पनिक व नाटकीयपन दुथ्याकातयागु दु धकाः च्वयातःगु दु । तर थुगु म्युजिक भिडियोस छुं छुं तथ्यत क्यनातःगु दु गुगु थुगु म्युजिक भिडियोया मर्म विपरीत वनाच्वंगु दु ।
दकलय् न्हापां ला थौं तक्क नं भगवान बुद्धयात प्याखनय् क्यनिबलय् गुकथं न्ह्यब्वयेगु धकाः बलिउड व हलिउडया निर्देशक तकं ग्याः । छाय्कि बुद्ध धयाम्ह ला ३२ लक्षणं युक्तम्ह धयागु मान्यता दु । अथे ३२ लक्षण क्यनेगु निंतिं ३२ लक्षणम्ह कलाकार लुइके मफूनी । तर थुगु भिडियोलय् बुद्धया ल्हाः छपाः फोकस याना क्यनातःगु दु । उगु ल्हातय् लुसि तकं चाका मतःसे तसकं हे ध्यान मतःसे बुद्धया ल्हाः क्यनातःगु दु ।
उकथं हे प्यम्ह शहीद धकाः गुगु क्यनातःगु दु, चरित्र कथं फयांफत्तले क्यनातःगु खःसां ऐतिहासिक तथ्य कथं शुक्रराज शास्त्रीयात बहिनि फाँसी ब्यूगु खः, गंगालाल श्रेष्ठ व दशरथ चन्दयात नापं खुसी दथुइ गोलिं कयेका स्याःगु खः अले धर्मभक्तयात न्हापां निक्व तक्क फाँसी बिया स्याःगु खः । तर निर्देशकं थुगु खँयात बेवास्तायाःसें थःम्हं हे न्हूगु इतिहास दयेकाः क्यंगु दु । इतिहासय् दुगु तथ्ययात ऐतिहासिक प्याखँ वा म्युजिक भिडियो दयेकुसिनि तथ्ययात स्यंके दइ मखु । फयांफत्तले परिस्थीति ज्वः लाक्क क्यनेमाः । थुगु घटनाया ऐतिहासिक दस्तावेजत दुगु कारण न्ह्योनलाःथे क्येने मज्यु । disclaimer छगू बियाः थःगु जिम्मेवारी पाखें थुगु गलत ऐतिहासिक तथ्य न्ह्यब्वयाः लिचिलेगु पाय्छि मजू ।
मेमेगु खँ
नेवाः म्ये नं थौंया इलय् मतिना जक केन्द्रीत मजुसे थी थी विधाय् चकनाच्वंगु बांलागु खँ खः । थुगु म्यें नं नेपाः मांया भिंतुना धकाः छगू सकारात्मक खँ खः । म्येयात छगू न्हूगु सवाः बिइत स्वःगु नं तसकं हे च्वछाय् बहगु कुतः खः । मुख्य त नेवाः म्येयात निंतिं नं प्रोड्युसर दुुगु धयागु छगू सेल्लागु पलाः नेपालभासा ख्यःयात जुयाच्वंगु दु । म्येया प्रोड्युसर गोपालकृष्ण महर्जनयात थुकीया श्रय बिइ हे माः । म्येया प्रचारया निंतिं नं बहनी प्रिमियर प्रोगाम तयाः न्हूगु आयामय् साथ बियाच्वंगु नं च्वछायेबहगु खँ खः । नेपालभासाया म्युजिक भिडियो ख्यः आः चकनाच्वंगु स्थीति दु । थुगु खँयात झी सकलें वाः चायेके माः । थुलि मछि कलाकार मुंकाः चरित्र न्ह्यब्वयातःगु व म्येयात जीवन्त यायेगु निंतिं याःगु कुतः च्वछायेबह जू ।
