छम्ह शिक्षाविद् कथं सकस्यां म्हस्युम्ह लक्ष्मण राजवंशी सर । लक्ष्मण राजवंशी सर जिगु निंतिं नं छम्ह शिक्षाविद् हे खः । वय्कः लिसे जिगु स्वापू छम्ह शिक्षक व विद्यार्थि हे जक खः । ८६ बर्षय् नर्भिक हस्पितलय् वय्क वाःसः याकु याकुं मन्त । छम्ह शिक्षाविद्या ल्याखं वय्कलं सिद्धार्थ बनस्थली इन्स्टिच्यूतया स्थापना याना अनगिन्ती ब्वनामिपिनित थःगु तुतिइ चुइफइगु कथंया वातावरण दयेकाब्यूगु दु । व हे वातावरणय् ब्वलंम्ह जि नं छम्ह ।
न्हापांगु क्लास
आखः ब्वनेगु ल्याखं जि छम्ह कमजोरम्ह ब्वनामि । आखः ब्वनेगु खँय् मचाबलय् जितः यक्व रुची मदु । जि छम्ह सामान्य विद्यार्थी जक । म्हितेगु ध्यान आपाः । थःगु हे सुरय् च्वनेमाःम्ह । न्हापा जि अंग्रेजी माध्यमं ब्वंकीगु स्कुल आइ जे पायनियरय् ब्वनाच्वनागु । ४ कक्षाय् छन्हु स्कुलं छगू नोटिस बियाः हल । मेगु बर्षय्नं थुगु स्कुलय् ब्वनेगु खः की मखु धकाः । जिं थुगु नोटिस खने सातकं हे निर्णय याना की जि मेगु स्कुलय् हे ब्वने । गन स्कुल धकाः जिं बिचाः मयाना । स्कुल अंग्रेजि माध्यम जूगुलिं जिं अपाय्सकं मथू हे धायेमाः, शायद । उगु स्कुल धुंकाः जिं सिद्धार्थ बनस्थली स्कुलय् ब्वनेगु खँ क्वजित छाय्धाःसां जिमि निनिं नं उगु हे स्कुलय् ब्वंकिगु । उगु इलय् स्कुलया एस एल सि बोर्डय् प्राय सिद्धार्थ बनस्थलि स्कुलया बर्चस्व दइगु ई खः । जि थें जाःम्ह ब्वनामि उगु स्कुलय् लायक जुइ की मजुइ धकाः मेमेपिंसं न्ह्यसः थनिगु । तर जिं थःगु निर्णयलय् अडिग जुयाः, छम्ह ४ कक्षायाम्ह मचां । इन्ट्रान्स बियाः । पास जुल । तगिं ५ निसें जिं सिद्धार्थ बनस्थली स्कुलय् ब्वना ।
सिद्धार्थ बनस्थली स्कूलय् थुलि ब्वनामि दु की स्कुलय् पासापिं ला छु नकतिनि १ मिनेट न्ह्यः खँ म्ह सुं ब्वनामि तकं लुइके थाकु। अनगिन्ती .. ल्याखाय् थाकुइ कथं ब्वनामि दुथाय् बुलुहुँ थुल की जि दकलय् कमजोर बिद्यार्थि मखु खनिं । जि सिबें ब्वनेमफुपिं ला यक्व हे दु खनिं । जिं मचां निसें हे छगू हे जक खँय् मन तये मफू । छगू हे इलय् छगू सिबें यक्व खँय् मन वं जितः । छन्हु जिमिगु कक्षाय् नेपाली बिषयया मिस मवःगु । कक्षाय् हल्ला जुयाच्वन । व इलय् छम्ह मनू कक्षाय् दुहांवल । हल्ला शान्त जुल । खासखुस सलं धाल । हेड सर… । लक्ष्मणराज वंशी सर । बल्ल म्हसिल वय्क हे खनिं लक्ष्मण राजवंशी सर ।
स्कुलय् भर्ना जुइ धुंकाः न्हापांगु एसम्बली ल्यूने पाखे दनाच्वनागु । सु सु धकाः सुं नं म्हमस्यु । सायद अबलय् नं लक्ष्मण राजवंशी सर न्ह्योने हे दु जुइ तर छम्ह ४ कक्षाया मचां छु हे सिइ । अथे तुं ५ कक्षाय् सिद्धार्थ ईंग्लिस धकाः नं ब्वने माः । उगु सफू चाहिं लक्ष्मण राजवंशी हे च्वयातःगु लुमं जु । छम्ह अंग्रेजी सफू च्वयातःम्ह मनुखं थौं नेपालीया क्लास काःयेगु शुरु यात । पाठ ला लुमं मजु तर व नैतिक शिक्षा सम्बन्धिया कविता खः । वय्कलं नैतिक शिक्षा सम्बन्धि कविता छगः छगः आखः थुइक ब्वंकादिल । आः तक्क नं लुमं की वय्कलं झीसं भ्mयालं ई फाये मज्यु धकाः ब्वंकादीगु । मनूतय्गु छ्यनय् लाइ । धकाः ब्वंकुगु । कक्षा सिधयेका सर वन तर मनय् दुविधा अबलय् .. अंग्रेजी सफू च्वम्हेस्यां नेपाली ब्वंकुगु मिले जू की मजू धकाः । अबलय्या मचाः दिमाग ला खः.. सु सर खः वं व हे जक बिषय बांलाक्क ब्वंके फइ । मेगु विषय ब्वंके फइ मखु तर मत्तिइ थ्व नं दु की वय्क ला हेड सर खः .. छुं भचा ला स्यु हे जुइ नी ।
निक्वगु क्लास
एस एल सि क्वचाये धुंकाः जिं सिद्धार्थ बनस्थलीया हे साइन्स कलेजय् ब्वना, छाय् धाःसां जि फस्र्ट डिभिजन वल । फस्र्ट डिभिजन वलकी साइन्स ब्वेनगु धैगु अबलय्या चलन खः । सेकेण्ड डिभिजन वलकी कर्मस अले थर्ड डिभिजन वलकी आर्टस् । साइन्स कलेजय् आइ एस सी ला ज्वाइन याना तर छु छु ब्वनेमाः खनिं । न्ह्यपुइ ला छुं हे दुहां मवं । कलेजय् इन्टरनल एसेसमेन्ट काइगु । जिमिगु सेक्सनय सुयां हे बांलागु नम्बर मवः । रिजल्ट ला वल । थः पासापिं नं फेल । थः नं फेल । जिमि पासा हे पास मजुसा जि जक गन पास जुइ धैगु मत्तिइ । रिजल्टया निन्हु स्वन्हु लिपा हाकनं छक्व लक्ष्मण राजवंशी क्लासय् वल । छाय् वल धकाः नं मस्यु । अले रिजल्टया बारे चर्चा यात । जितः लक्ष्मण सरं म्हस्यु । जि नरेशवीर शाक्यया काय् धकाः नं स्यु । शायद जितः हे थनां जिगु रिजल्टया बारे न्यनी धकाः छ्योँ क्वक्वछुना च्वना । मिखा तकं ल्वाके मफूत ।
लक्ष्मण राजवंशी सरं अबलय् धयादीलकी जिपि बिद्यार्थिपिं धैपिं आया इलय् वासः याकाच्वंपिं विरामी खः । विरामीयात वासः याकेत अपरेशन थियटरय् यंकी । अन यंके धुंकाः डाक्टरं अपरेशन याइ । छिपिं मसंसे च्वने माः । अपरेशनया दौरान छिपि वालवाल सनाच्वन धाःसा न्ह्याक्व हे बांलाम्ह डाक्टरं अपरेशन याःसां व सफल जुइ मखु । कि डाक्टर बांमलाम्ह खःसा जिमित धाये माल । वय्कःपिं ला यक्व बर्षया अनुभव दुपिं खः । तसकं हे डिप्लोम्याटिक ढंगं वय्कलं जिमिके एकचित्त मजूगु खँ वाः चायेकाबिल । छगू पुरा कक्षा जिमिट मोटिभेशनलय क्लास कयादील । तर क्लास कायेसातकं नं छु हे जुइगु खः धकाः। साइन्सया फाय्कल्टी जाँचबियां नं सेकण्ड इयरय् मेजर प्यंगू बिषलय् फेल जुल । अनं लिपा जिं साइन्स त्वःता हाकनं सर्टिफिकेट लेभलय् पब्लिक युथ क्याम्पसय् आइ कम ब्वना । तर जिं आइएससीया ४गू ब्याक नं बिया अले आइ कमया ५गू नियमित नं बियाः । थ्व पाले धाःसाः जिं ९ गू बिषय निगू फरक फाय्कल्टी पास याना । गन नं गनं लक्ष्मण राजवंशी सरया अपरेशन यायेगु इलय् थः सने मज्यु धैगु खँ बांलाक्क मथुसां अन्तरमनं धाःसा थुइका काःगु खने दु ।
दकलय् लिपा नापलानागु
दकलय् लिपा लक्ष्मण सरयात नापलानागु धैगु नेसं ११३९ बछलागा पारु खुन्हु ईलोहं प्रकाशन पाखें च्वसापासाया न्हूगु ज्यासना पुचःयात भिंतुना देछानागु ज्याझ्वलय् खः । वय्कः अन पाहां कथं झायादीगु खः । उगु इलय् जिगु नं कामशास्त्रया सफू नागरसर्वस्व सफू पिदंगु खः । उगु हे सफू जिं वय्कयातः लःल्हाना । जिगु सफू स्वया वयेक तसकं हे लयताया दिल अले धयादिल की थुगु बिषयलय् झीगु सफू तसकं हे म्हो । थुकी निरन्तता बिइमाः । उबलय् नं जि छम्ह सरया हे विद्यार्थि कथं छ्योँ ल्हुकु ल्हुकु संकाः जक हे च्वना ।
ॐ नमः भगवते सर्व दुर्गती परिशोधन राजाया तथागताया अर्हन्ते सम्यकसम्बुद्धाय ।। तद्यथा ।। ॐ शोधने शोधने विशोधने विशोधने सर्वपाप विशोधने शुद्धे शुद्धे विशुद्धे विशुद्धे दिवंगत लक्ष्मणराज वंशी नाम सर्वकर्मावरण विशुद्धे स्वाहा ।।
