नेपालभाषाया हे छगू क्लाय्सिक प्याखँ कथं छाप लाये धुंकुगु संकिपा चाण्डालिकाया च्यारटि शो विश्वज्योति हलय् नं क्यने धुंकुगु खः । थनिं थ्यंमथ्यं निगु दशक न्ह्य हे दयेके सिधयया नं बांलाक्क प्रदर्शन जुइमफुगु प्याखँ खःसां तवि डिजिटाइज भर्सनय् हिइका विश्वज्योति हलय् क्यने ज्या जुगु खः । अाः वयाः थुगु प्याखँ युट्युबय् नं स्वये दये धुंकल ।
टेक्नोलोजिया ल्याखं थुगु प्याखँ डिजिटाइज याःगु तसकं हे बांलागु खँ खः । नेवाः संकिपाः ख्यया छगू अमूल्य सम्पतियात थुकथं संरक्षण यायेफुगु व हाकनं कमर्सियल रूपं पिहांवयेफूगु लँपुं लुइकाच्वंगु दु । थुकीं याना मेमेगु न्हापाया भिडियो प्याखँत नं डिजिटाइज यायेगु खँय् न्हापायाःपिं प्याखँ निर्मातातय्गु मिखा चालेफु ।
नेवाः संस्कृति व पहिचान ल्यंका तइगु थुकथंया प्रविधिं नेवाः पहिचानया मुद्दा ल्ह्वनाच्वंपिंसं नं वाःचायेके माः । छाय्की अझ नं पुलांगु एतिहासिक सँकिपा सिलु लिसें राजमतियात बांलाक्क डिजिटाइज याना संरक्षण यायेफुगु मदुनी ।
राजमति संकिपा लिपा निर्माण जुगु थुगु चाण्डालिका संकिपा खः । थ्व हे हुनिं थुकि राजमतिया छाप छुं भचा किनाच्वंगु नं ताय्फु । बौद्धकालीन बाखं जुगु हुनिं फयांफत्तले सम्झौता मयासे प्याखँया लोकेशनयात कयाः ध्यान बियातःगु दु । प्याखँया स्क्रीप्त नं तसकं हे सल्ल न्ह्यां । प्याखँम्वःया वसतय् नं बिशेष ध्यान बियातःगु हे खनेदु । थनिं निगू दशक न्ह्यः हे निर्माण जुइधुंकुगु थुगु प्याखँनय् थुलि सेल्लाका बिचा यानातःगु तसकं बांलागु खँ खः तर नं प्याखँया मू कलाकार धाय्वं चाण्डालिकाया वसः भचा प्याखँया नकिं पह दु । थुकींयाना चाण्डालिकाया चरित्र निर्माणय् भतिचा अविश्वस्नीयता अप्वइ । छम्ह क्वजातया मिसा कथं न्ह्यब्वया तःसाः मू चरित्रया वसः धाःसा तसकं हे झः झः धाः । प्याखँया स्क्रीप्ट तसकं हे क्वातुसां प्याखँया चरित्र निर्माणय् धाःसा बिशेष ध्यान बियातःगु मदु । प्याखनय् थः जात क्व जात धकाः दु तर थजातं खँल्हाइगु भाय् व क्वजात खँल्हाइगु भाय्लय् छुं अन्तर नं मदु । थ्व ल्याखँ प्याखँया दकलय् कमजोर पक्ष धैगु हे प्याखँया संवाद न्ववाकेगुलिइ निर्देशनया गहिराइ मगागु धकाः धाये छिं । संवादया हे कमि कमजोरी धाय्गु खःसा बजार, भ्रम, चिन्ता थें आधुनिक शब्द उलि पाय्छि मजु । अझ भगवान बुद्धं हे छथाय् न्ववाइबलय् चण्डालिकायात मय्जु धकाः संम्बोधन याइ । जबकी भगवान बुद्धं उपासीका वा छुं मेगु हे सम्बोधन यायेमाःगु ।
प्याखँयात व्यवसायिक यायेगु निंतिं प्याखनय् सिलु प्याखँया क्लाइमेक्सय् थें द्वन्दनं न्ह्यथना तःगु दु । तसकं हे अपुक्क थुगु द्वन्द निर्देशकं दुथ्याकातःगु दु । थुगु प्याखनय् द्वन्द तसकं हे सेल्लाक्क न्ह्यब्वयातःगु दु । द्वन्द पक्ष थुगु प्याखँया तसकं हे सशक्त जू । तर थुगु प्याखनय् द्वन्दया धाःसा आवश्यकता हे मदु । प्याखँयात कमर्सियल याना यंकेगु झ्वलय् जक छ्यलातःगु दु ।
प्याखँया मेगु तारीफ योग्य ज्याखँ धैगु छांयाकन खः । एम एस माइकलया फ्रेमिंगस्त साप हे ल्ववनापुसे च्वं ।
कलाकारय् मय्जु हिराशोभा महर्जन चण्डालिकाया भुमिकाय् पाय्छि जू । आनन्द भन्तेया भुमिकाय् स्वयंभुरत्न शाक्य बांला जू । अथेहे द्यमांया भुमिकाय् नारायण देवी प्रधान दु । नारायणदेवीं प्रधान, सुभद्रा अधिकारी, पल्पसा डंगोल, लमिया भुमिकाय् मदनकृष्ण श्रेष्ठ अले हरिवंश आचार्यं हास्य रस पुवंकु । यक्व हे कलाकार पाहां भुमिकाय् थुकी दु । थौं थुकी म्हितुपिं यक्व हे कलाकार कला क्षत्रय् हे स्थापित जुइ धुंकुगु दु ।
प्याखँया निर्देशक अले छम्ह मू कलाकार मनिष श्रेष्ठया ज्या च्वछाय्बह जु । वय्क भाजु थौंकन्हय् लण्डनय् च्वनाच्वंगु दु । तर वय्कया कलाकारिता सिबें निर्देशन पक्ष यक्व बांलागु ताय्के ज्यु तर अथे धाय्तु वय्क बांमलाम्ह कलाकार धाःसा पक्कां मखु ।
( न्यादँ न्ह्यः हे पेजथ्री पत्रिकाय् पिदंगु थुगु लेखय् इ timeया खँयात सम्पादन यानागु जुल ।)
