किपुलिइ दँय्दसं हे चैत २० खुन्हु किपुया शहिद दिवस हनाच्वंगु दु । थुगु हे दिंया लसताय् इन्द्रेणी सांस्कृतिक समाजं चैत २१य् सांस्कृतिक श्रद्धाञ्जली ज्याझ्वः यागु दु । थुगुसी किपुया कृष्ण क्याटरिङ्गय् जूगु थुगु ज्याझ्वःस मू पाहां कथं नेपाल संगीत तथा नाट्य प्रज्ञा प्रतिष्ठानया कुलपति नारायण भक्त श्रेष्ठ (रायनं) उद्घाटन यानादीगु खः । ज्याझ्वलय् पाहांकथं श्याम श्रेष्ठ, बदन शर्मा, माधव प्रधान, राजेन्द्र महर्जन झायादीगु खः ।
किपुया शहीदपिनिगु किपाय् स्वां देछाना मौन धारण याना संगीत, म्ये, कवितापाखें सांगीतिक श्रद्धाञ्जली देछाःगु खः । वरिष्ठ कविपिं डा. बिन्दु शर्मा, मात्रिका पोखरेल, लोककवि राजभाइ जकःमि, राजेन्द्र कुमार ‘पुता’, अर्जुन ‘नेपाःमि’, सुवर्ण महर्जन व रामभक्त ‘रमझम’ पिंसं कविता ब्वना न्यंकादीगु खः । ज्याझ्वःलय् म्ये लिसें कुमारी प्याखं, गीतिनाटक नं न्ह्यब्वःगु खः।
सांगितिक ज्याझ्वस सुरेन्द्र श्रेष्ठ, जिवित जल्मि, गुजे मालाकार, रानीशोभा महर्जन, रत्नशोभा महर्जन, दिपा महर्जन, मीना महर्जन, प्रमिला महर्जन, माधव प्रधान, शैलेश प्रधान, रोजी श्रेष्ठ, रीता महर्जन, सतिश महर्जन व बिश्व नेपालिं म्ये हाःगु खः ।
नृत्य पाखे नृत्य निर्देशक जमुना महर्जन, शीलकुमारी महर्जन व रेखा भंसारी पिंन्सं स्यनादिइगु हुला प्याखं नं न्ह्यब्वःगु खःसा शहीद स्मारक कलेजया ब्वनामिपिंसं गीति नाटक नं न्ह्यब्वःगु खः।
वि.सं. २०४६ चैत २० गते तत्कालिन तानाशाही पञ्चायती व्यवस्थाया विरुद्ध जूगु जनआन्दोलनया झ्वलय् किपुलिइ जूगु आन्दोलनय् लनबहादुर महर्जन, हिराकाजी महर्जन, राजनमान माली व राजेन्द्र महर्जनयाना ४म्ह मदुगु खः । थुगु हे न्हिंया लुमन्तिइ दँय दसँ इन्द्रेणी सांस्कृतिक समाजं सांस्कृतिक श्रद्धाञ्जली ज्याझ्वः हनावयाच्वंगु खः ।
