नेपालभासाया न्हूगु मिनि मुभी आसकुतिया प्रिमियर येँया सिटिसि मलय् थौं सुथय् जुल । आयम फिल्मसया न्ह्यब्वया व सुरेन्द्र तुलाधरया निर्देशनय् तयार जूगु थुगु प्याखँ खःसा थुगु प्याखँया निर्माता बुलाल महर्जन खः। प्याखँया बाखँ च्वमि सुरेश शाक्य खःसा छायाँकन व सम्पादन अमर चित्रकारं याःगु खः । प्याखँया संगीत निल शाक्यं बियादीइगु खः ।
प्याखँया न्हापांगु शो सुथसिया ८ बजे याःगु खःसा भिआइपि शो धकाः बिशेष १००० तका वंगु टिकटया मू तयाः क्यंगु खः। प्याखनय् कृष्णा श्रेष्ठ मू भुमिकाय् म्हितादीगु खःसा सुरज ब्यंजनकार, रोजीना सुवाल, सुरज नापित, रामराजा भाम, रञ्जु सितिखु नं दु । सिटिसि मलय् जूगु प्रिमियरय् आपलं नेपालभासा ख्यःया कलाकारं प्याखँ स्वःवःगु खः ।
प्याखँया बिषयबस्तु कथं भाःत त्वता मेम्ह हे मिजंथाय् वंम्ह छम्ह मिसाया दुर्दशाय् केन्द्रीत यानातःगु दु । सम्पत्तिया लोभं थः भात त्वताः वनकी गज्योगु दशा फयेमाली धकाः प्याखनय् न्ह्यब्वयातःगु दु ।
