वंगु फागुन २२ गते निसें २९ गते तक्क येँ महानगरपालिकां स्थानीय पाठ्यक्रम ब्वंकेगु निंतिं प्रशिक्षण सहायक पदय् नियुक्तीया निंतिं काःगु प्रयोगात्मक परीक्षाया लिच्वः पिथन । सोमवाः बहनि येँ महानगरपालिकाया शिक्षा विभागं थुगु लिच्वः पिथंगु खः ।
मुक्कं ५१६ म्हेसिनं आवेदन ब्यूगु थुगु प्रयोगात्मक परीक्षाय् ४०४ म्ह उत्तीर्ण जूगु दु । उत्तीर्ण जूपिनि अन्तर्वार्ता चैत १२ गते निसें १८ गते तक न्हिं ५०–५० म्ह यानाः काइ ।
उत्तीर्ण जूपिं पाखें हाकनं अन्तर्वार्ता कयाः १७२ म्ह प्रशिक्षण सहायक ल्यइ । थुपिं प्रशिक्षण सहायकपिंसं येँ महानगरपालिका दुने लाःगु सरकारी स्कुलय् येँ महानगरपालिकां तयार याःगु पाठ्यक्रम कथं कक्षा १ निसें कक्षा ८ तक स्थानीय भाषा नेवाः भासं आखः ब्वंकी ।
येँ महानगरपालिकां स्थानीय भासं आखः ब्वंकेगु निंतिं तयार याःगु पाठ्यक्रम कथं येँ देय् म्हसीका पाठ्यसफू नं पिकायेधुंकूगु दु । थ्व सफू कक्षा १ निसें कक्षा ८ तक येँ महानगरपालिका दुने लाःगु सामुदायिक व निजी स्कुलय् अनिवार्य कथं ब्वंकी ।
