आयाम् फिल्म्स, यलया ब्यानरय् नेपालभाषाया कलात्मक संकिपा आसकुतिया ट्रेलर लिसें आसकुतिया टाइटल ट्राय्क पूच्व यलय् च्वंगु एम्बियन्स रेष्टुरेन्टय् जुल । आसकुति संकिपा बुलाल महर्जनया निर्माणय् जूगु खःसा नेवाः पत्रकार राष्ट्रिय दबु यल कचाया संयोजनय् थुगु ज्याझ्वः जूगु खः ।
संकिपाया निर्देशक सुरेन्द्र तुलाधरं थःगु नुगः खँ तसें प्याखँ जीवन्तया रुपय् दयेकागु दावी याःसें थुगु संकिपायात कलात्मक प्याखँया रुपय् न्ह्योब्वयागु खँ कन । कलाकार सुरज व्यन्जनकारं थःगु क्षमता पूवंक छ्यलागु खँ कनादील ।
प्याखँया प्रचार याये माः धकाः प्याखँया ड्रिस्टिब्युटर नेवाः प्याखँयात अा सिनेमा हलय् नियमित क्यनेगु खँय् जाेड बियादील ।
संकिपाया निर्माता बुलाल महर्जनया सभापतित्वय् जूगु थुगु ज्याझ्वलय् वरिष्ठ संकिपा पत्रकार विजय रत्न असंबरे पाखें नं थुगु संकिपा बारे थःगु खँ तयादीगु खः । आयाम फिल्म्सं आसकुति संकिपा पारिवारिक मार्मिक बाखंया लिधंसाय् निर्माण जूगु संकिपा खःसा थुगु संकिपा सुरेश शाक्यं च्वयादीगु खः ।
थुगु प्याखनय् कलाकार कथं सुरज व्यञ्जनकार, कृष्णा श्रेष्ठ, रोजिना सुवाल, सुरज नापित, रामराजा भाम, रंजना सिथिखु, रोहन प्रजापति, बुलाल महर्जन, सविनरत्न शाक्य, कृष्टिना शिल्पकार, सुजन बज्राचार्य लिसेलिसें पाहाँ कथं कृष्णभक्त महर्जन, सुनिता श्रेष्ठ, नगिना जोशी व अकल महर्जनपिन्सं अभिनय यानातःगु दु ।
आसकुति संकिपा वइगु चैत्र २१ गते शनिवाः सीटीसी मल सुन्धारा येँय् विशेष शो कथं क्यनेज्या जुइगु दु ।
