ईलोहं प्रकाशनया न्ह्यब्वया भाषा अनुरागी एवं नेपालभासाया साहित्यकार मोक्ष बहादुर अमात्यया हाइकु सफू तिकि–तिकि सफू येँया सासा बैंक्वेट विशाल बजारय् जुल। मू पाहां कथं वरिष्ठ साहित्यकार मोहन हिमांशु थापा, नेपालभाषा एकेदेमीया भाइस चान्सलर यज्ञ रत्न धाख्वाः, वरिष्ठ साहित्यकार डा पुष्पराज राजकर्णिकार, नेवाः हाइकु ख्यःया कजि सुरेश प्रधान, साहित्यकार ध्रुव मधिकःमि लिसें ईलोहं प्रकाशनया प्रवन्ध निर्देशक नरेशवीर शाक्यं तिकि–तिकि सफूया बिमोचन यानादीगु खः । ईलोहं प्रकाशनया मू व्यवस्थापक दर्शनवीर शाक्यं लसकुस यानादीगु उगु ज्याझ्वलय् नेपालभासाया अनुरागी एवं निस्वार्थ भावनां नेपालभासा ख्यलय् योगदान यानाच्वंपिनिगु ग्वाहलिया निंतिं ईलोहं प्रकाशन प्रा लि सदां ग्वाहलि यायेत तयार दु धैगु सन्देश न्ह्यब्वयादीसें साहित्य ख्यलय न्हापा नं विद्रोही कवि बुद्ध साय्मिया विद्रोहया सः, नातिबज्रया बिशेषांक नःलि अंक इत्यादि पिकनागु खँ लुमंकादिल।
नुगः खँ तयेगु झ्वलय् डा. पुष्पराज राजकर्णिकारं मोक्ष बहादुर अमात्यया हाइकुया बिषय समाज, विकृति जक मखुसे न्ह्यइपुेक माःम्ह कथं नं दु धकाः बिश्लेषण यानादील सा हाइकुया भाव भाग्यवादय् तक्यनाच्वंगु खँ नं कुलादील । मेम्ह पाहां सुरेश प्रधानं सफू दुने सुनां छु छु धयातःगु दु धैगु खँया मू मू बुदाँ न्यंकादील ।
ज्याझ्वलय् मूपाहां डा. मोहन हिमांशु थापायात अभिनन्दन नं याःगु खःसा वय्कलं च्वमि मोक्षबहादुर अमात्य व ईलोहं प्रकाशनयात सुभाय् देछानादीगु खः । पाहां ध्रुव मधिकमिं साहित्य गुलि चिहाकः जुइ उलि हे महत्वपूर्ण जुइ धाःसें मोक्षबहादुर अमात्यया हाइकुइ वय्कयाः जीवनया अनुभव नं उतिकं दुथ्यानाच्वंगु खँ न्ह्यब्वयादील । पाहां शाक्य सुरेनं मोक्षबहादुर अमात्यया सिद्धिदास अमात्य लिसे हिया हे स्वापू दुगु कारण वय्कः साहित्य पाखे नुगः क्वसाःगु खँ कुलादिल ।
ज्याझ्वया विशेष पाहां यज्ञरत्न धाख्वालं सफू व म्ये सिडि पिदंगु लसताया खँ धाःसें नेवाः म्येहालामिपिनिगु नं छगू हू इज हू थें जाःगु सफू पिकायेगु आवश्यकतायात कुलादिल।
मोक्षबहादुर अमात्यया हे च्वसा लिसें थीथी संगीतकार व म्येहालिमि दुथ्यानाच्वंगु छ व जि म्येचाः पितब्वज्या नं ज्याझ्वलय् जूगु खः। म्येचाः पितब्वज्या यायेगु निंतिं म्ये सिडिइ संलग्न सकसिनं हे म्येचाःया बिमोचन याःगु खः । थ्व झ्वलय् ज्याझ्वयाः सभापति नरेशवीर शाक्य, विशेष पाहाँ यज्ञरत्न धाख्वाः, पाहाँ अमर राज शर्मा लिसें म्ये हालामि एवं संगीतकारपिं जुजुकाजी रंजित, प्रवेश मान शाक्य, मनराजा नकःमि, सानुबाबु महर्जन, सुलिन्द्र शाक्य, राम कुमार साय्मि, सरस्वति मानन्धर, जीवित जल्मी व शतिश महर्जनं सिडि उलेज्या यानादीगु खः।
म्येचाःया बारे समीक्षा वरिष्ठ संगीतकार अमरराज शर्मां यानादीसें झीगु मौलिक संगीतया महत्व बारे कुलादील । ज्याझ्वःया मू आकर्षण अर्थात च्वमि मोक्ष बहादुर अमात्यं थुगु ज्याझ्वःलं थः तसकं हे लयतागु खँ कँसें सफू व सिडि पिकायेत ग्वाहलियानादीपिंत सुभाय् देछानादिल ।
ज्याझ्वलय् मतिनायाचिं लःल्हाःगु खःसा सभापति नरेशवीर शाक्यं थौंया दिं एतिहासिक धासें ३–५–३या धारय् न्हापां खुसिइ सफूया रूपय् मोक्ष बहादुर अमात्यया हाइकु पिदंगु खँ कुलादील।
