शाहरूख खान, आमिर खान, सलमान खान, अक्षय कुमार व अजय देवगन थेंज्यापिं बलिउडया गुलिखे हिरोतय्गु उमेर फिफ्टी प्लस जुइ धुंकलसा इपिंलिसे म्हितिपिं हिरोइन तय्गु उमेर थर्टी प्लस हे मजूगु दसु यक्व दु । बलिउडय् आः जक मखु न्हापानिसें अथे । राजेन्द्र कुमार, राजेश खन्ना, देव आनन्द, अमिताभ बच्चनपिन्सं नं थः फिफ्टी प्लस जुइ धुंका थर्टी प्लस हे मजूनिपिं हिरोइनत फिल्म म्हितुगु दसु आपालं दु । नेपालय् अथे जू । छुं ई न्ह्यःतिनि पिहाँ वःगु “एउटा यस्तो प्रेम कहानी” नांयागु फिल्मय् सिक्स्टी प्लस् हिरो शिव श्रेष्ठया जोडी कथं थर्टीया जःखः लाःम्ह हिरोइन प्रियङ्का कार्कीलिसे म्हिता तःगु दु ।
फिल्मख्यलय् थथे थकालिम्ह हिरो व क्वकालिम्ह हिरोइन जुइगु धइगु छुं न्हूगु खँ मखुथें च्वं । बलिउड धकाः धयातःगु हिन्दी फिल्मया दसु ला झीसं बिइ धुन । आः नेवाः फिल्मय् अज्यागु दसु दु ला धइगुयात कया चर्चा याये । थथे चर्चा यायेबलय् दकले न्ह्योने लाःवइगु नां जय श्रेष्ठया खः । दकले न्हापांगु नेवाः फिल्म “सिलु” या हिरो जुया छगु गौरव या चिं जूम्ह हिरो जय श्रेष्ठ फिफ्टी प्लस जूगु तःदँ दत । उमेर वंसां वैंश मवंम्ह हिरो धका धायेका च्वंम्ह जय श्रेष्ठ थौंकन्हे छुं नं फिल्मय् म्हिता च्वंगु ला मदु धाःसा छुं छुं म्युजिक भिडियो म्हिता च्वंगु अज्यागु म्युजिक भिडियोलय् नं जय श्रेष्ठया हिरोइन थर्टी प्लससिबें कमपिं जक हिरोइन चूलाना च्वंगु दु ।
अङ्कल धायेमाम्ह जय श्रेष्ठ
“सिलु” या हिरो जय श्रेष्ठं दकले लिपा हिरो जुया म्हितुगु फिल्म धइगु “बाँला मय्जु” खः । थ्व फिल्म पिहाँ वःगु झिदँति दयेधुंकल । उगु इलय् हे जय श्रेष्ठ फिफ्टी प्लस जुइ धुंकुम्ह हिरो खः । “बाँला मय्जु” फिल्मय् मेलिना मानन्धर व भिन्तुना जोशी वया अपोजिट हिरोइन जुया म्हितुगु खः । हिरोइन निम्हं हिरोसिबें यक्वःहे क्वकालिपिं जुगुलिं आपासिनं चित्तबुझे मयागु खँ थनथाय् लुमंके बहजू । थ्व फिल्म दयेकेगु ग्वसाः जुयाच्वंगु इलय् छगु रोल म्हितेया निंतिं आशिष्मा नकःमियात नं इनाप याःगु जुया च्वन सा आशिष्मां थःम्हं अङ्कल धयावया च्वनाम्ह मिजंलिसे गथेयाना हिरोइन जुया म्हितेगु धकाः अस्वीकार यागु जुया च्वन । खय्तला भिन्तुना जोशीं नं छुं छुं अज्यागु हे खँल्हागु खः । थुगु खँय् असन्तुष्ट हे जुसां वय्कलं धाःसा “बाँला मय्जु” फिल्म म्हितादिल ।
धिरेन शाक्य नाप ल्यासेपिं हिरोइन
धिरेन शाक्य नेपाःया फिल्मख्यःया छम्ह नांजाम्ह हिरो खः । उमेरया ल्याखँ बाज्य वने धुंकुम्ह धिरेन शाक्य थौंकन्हे छुं छुं फिल्मय् सपोर्टिङ्ग रोलय् जक म्हिता च्वंगु दुसाः नेवाः फिल्मया ख्यलय् नं पलाः न्ह्याका वया च्वंम्ह हिरो खः । विशेष याना नेवाः म्युजिक भिडियोपाखे धिरेन शाक्यया सकृयता च्वछाय् बहजू । धिरेन शाक्यं छुं छुं म्युजिक भिडियोलय् आराध्यलक्ष्मी खड्गी व शोभा महर्जनलिसे जोडि जुया म्हितातःगु दु । धिरेन शाक्यं “त्याग” नांयागु छगु फिल्म नं म्हितूगु दु । थ्व फिल्मय् वया हिरोइन कथं भिंतुना जोशी म्हितातःगु दु । उमेरया ल्याखँ खँल्हायेगु खःसा धिरेन शाक्य व भिन्तुनाया उमेर यक्वःहे पाना च्वंगु दुसा आराध्यलक्ष्मी व धिरेन अले धिरेन व शोभा महर्जनया उमेर नं यक्व हे पाः ।
अमृतमान महर्जननाप भिन्तुना
अमृतमान महर्जन नेवाः फिल्मख्यःया तसकं ल्हाः न्ह्याम्ह कलाकःमि खः । विशेष याना “उलिंचिया बाखं थुलिंचा” नांयागु टेलिभिजन सिरीयलपाखें बिस्कं हे म्हसिका दयेकेत ताःलाम्ह अमुतमान महर्जन नं उमेर वंसां वैश मवंनि धायेके न्ह्याम्ह हिरो खः । अमृतमान महर्जन हिरो जुया म्हितुगु “द्वपंमि सु” नांयागु फिल्मय् वया हिरोइनया रूपय् म्हिता तःम्ह ईन्जा नेवाः खःसा वयागु हे मेगु छगु “स्वयेनगु” नांयागु फिल्मय् वया हिरोइन जुया म्हितातःम्ह हिरोइन् भिन्तुना जोशी खः । उमेरया ल्याखँ भिन्तुना व ईन्जासिबें अमृतमान महर्जन यक्वः हे थकालि खनेदु ।
हृदयप्रसाद मिश्र व सिन्तिया
“सत्य धरोधर्म” नांयागु फिल्म आपासित लुमं जुइमा । उगु फिल्मया ख्यालिन्हिलाया निंतिं नांजाम्ह कलाकार हृदयप्रसाद मिश्र हिरो जुया म्हितातःगु दुसाः थुके वया हिरोइन जुया म्हितातःम्ह सिन्तिया सेन ताम्रकार खः । थ्व फिल्म पिहाँ वःगु ईलय् हे हिरो हृदयप्रसादसिबें हिरोइन् क्वकालि खनेदत धका नं चर्चा जूगु खः ।
आशिष्मा व सबिन शाक्य
नेवाः फिल्मख्यःया तसकं लोकंह्वाम्ह हिरोइन् आशिष्मा नकःमिया दकले न्हापांगु निगु फिल्म धइगु “न्याल्लब्यां” व “पपु मदुम्ह झङ्क” खः । उकि मध्ये “न्याल्लब्यां” फिल्मय् आशिष्माया हिरो जुया म्हितुम्ह सबिन शाक्य खः । सबिन शाक्य उगु इलय् पीदँ पुले धुंकुम्ह खःसा आशिष्मा धाःसा नकतिनि झिन्यादँ पुला झिँखुदँ तिनि क्यंम्ह खः । थुकथं सबिन शाक्य व आशिष्मा नकःमिया दथुइ यक्वः हे उमेर पाना च्वंगु खः ।
बासु शाही व रजनी खडगी
बासु शाहीयात नेवाः फिल्मख्यःया नन्स्टप फिल्ममेकरया रूपय् चर्चा यानातःगु दु । आपालं फिल्मया निर्माण व निर्देशन याये धुंकुम्ह वासु शाही छम्ह कलाकार नं खःसा आपालं फिल्मय् हिरो जुया म्हितातःगु दु । बासु शाहीया छगु चर्चित फिल्म “क्या फसाद” य् वया हिरोइन् जुया म्हितुम्ह रजनी खड्गी खः । खय्तला रजनी खड्गी व बासु शाही दथुई च्यादँ झिदँति जक पाःगुलिं उलि उमेर पाः धायेथाय्ला मदु तर अयसां मल्वःगु हे खनेदु ।
कर्मा व मेलिना मानन्धर
मेलिना मानन्धर धइम्ह छगु इलय् नेपाःया फिल्मख्यःया छम्ह लोकंह्वानाच्वंम्ह हिरोइन खःसा कर्मा नं लिपांगु ईलय् छम्ह लोकंह्वाम्ह हिरोया रूपय् न्ह्योनेलाम्ह हिरो खः । इपिं निम्हेसिनं नापनापं “पटाचारा” व “क्षा गौतमी” नांयागु निगु नेवाः फिल्म म्हितल । इपिं निम्ेहसियागु जोडियात आपासिनं येकल । “पटाचारा” म्हितुगु इलय् इमिगु जोडि लोकंह्वाःगु खना इमित हाकनं “कृषा गौतमी” फिल्मय् नं नापं म्हितकुगु खः । फिल्मया पर्दाय् इमिगु जोडि ल्व धासां इमिगु उमेर धाःसा यक्व हे पाः । मेमेथाय् धाःसा हिरो अप्वःहे थकालिम्ह जुया च्वनिगुसा थनथाय् धाःसा अःखः जुया च्वंगु दु । हिरो कर्मासिबें हिरोइन मेलिना करीब झिदँ थकालिम्ह खः । मेलिनाया जन्म ई सं १९७७ जनवरी खःसा कर्माया जन्म मिति धाःसा ई सं १९८६ खः ।
मू खँ
खय्तला बलिउडया मेगास्टार धयातःम्ह अमिताभ बच्चनं “निशब्द” फिल्मय् जिया खान नांयाम्ह नच्चाम्ह हिरोइन्लिसे फिल्म म्हितुगु दुसाः थःसिबें क्वकालिम्ह तब्बुलिसे “चीनिकम” म्हितुगु दु । अथेहेतुं भारतया न्हापांम्ह सुपरस्टार धका धयातःम्ह राजेश खन्नां “घर का चिराग” नांयागु फिल्मय् थःसिबें यक्व हे क्वकालिम्ह हिरोइन् निलम व “वफा” नांयागु फिल्मय् नं ल्यासेम्ह हिरोइन् लैलालिसे म्हितुगु दु । तर थनथाय् धाःसा बाखंया माः कथं अथे जूगु खः ।
बाखंयात माःगुलिं थथे कलाकार छनौट जूगुयात मल्वःगु धका धाये मछिं । बलिउड व हलिउडय् थज्यागु बाखं यक्वः दु । तर नेपालय् थज्यागु बाखं न्ह्यब्वयातःगु उलि खने मदुनि । झन नेवाः फिल्मय्ला अज्यागु बाखं दहेमदुनि धाःसां पाइमखु । थनला दसु हे न्ह्यब्वयेबले आपालं हे अज्यागु फिल्म लुया वल गुकि हिरो व हिरोइन् दथुइ उमेर यक्वः हे पाना च्वंगु दु । थुखेपाखे नेवाः फिल्मकःमिपिन्सं छक्वः ध्यान तया अथे उमेरयात ल्वइकथंया हे बाखं सिर्जना याना फिल्म दयेकुसाः अझ बाँलाई धका धायेमा ।
