नेवाःतय्गु प्रत्यक्ष सरोकार दुगु थी थी देगः लिसें सम्पदा क्षेत्रया व्वस्थापनयात कयाः थुगु पालय् स्थानीय सरकारं हे असन्तुष्टि प्वंकुगु दु । मुलरूपं स्वनिगःया हनुमानध्वाखा लाय्कु स्थीत सम्पदा क्षत्रयात व्यापारया केन्द्र दयेकाच्वंगु खुलासा येँ महानगरप्रमुख बिद्यासुन्दर शाक्यं थी थी सभा समारोहस यानाच्वंगु दु । वय्कःया कथं पुरातत्व विभागं हे थःगु अधीनय लानाच्वंगु थी थी सतःयात पसः कवलय् हिला बालं तयाः धेबा कमे यानाच्वंगु धासें आः फागुन ७ गते दुने तक्कया म्याद तयाः थुज्योगु पसः फुक्कं खाली यायेगु निंतिं पत्रचार याये धुंकूगु दु । यदि उल्लेखित मिति दुने पसः खाली मजुल धाःसा महानगर स्वयं पसः खाली यायेगु खँ नं पतिइ न्ह्यथनातःगु दु ।
वास्तवय् स्वनिगः दुने थी थी सम्पदा क्षत्रयात स्वनिगःवासीया निंतिं हे वर्जित यानातःगु दु । लाय्कुया गुलिं थासय् स्वयेगु तकं हे वर्जित यानातःगु दुसा मेगु खँ धयागु अज्योगु थासय् पसः कवः बालं बियाः तकं नयाच्वंगु दु । गुगु संस्थां व थाय्या रेखदेख याना सेवाःया भावं ज्या यानाक्यने माःगु खः व हे संस्थां झीगु हे ध्यबां कयाः झीत हे वर्जित यानाच्वंगु दु ।
थौंया स्थीतिइ धायेगु हे खःसा सम्पदा क्षत्रया महत्व छु दु धकाः ध्वाथुकेगु भाला सुनां कायेगु, गकथं कायेगु तकं प्रष्ट मजूनि । सम्पदा क्षत्रयात गुकथं झीसं ब्वयेगु । सम्पदा क्षत्रयात ला छगू जीवन्त म्युजिय कथं विकास याना यंकेमाःगु खः तर अथे छुं हे जुयाच्वंगु मदु । ताः ई लिपा सां येँ महानगरपालिकां न्ह्यलं चायेकूगु दु । तर थुगु चाःगु न्ह्यलं नं गुलि तक्क चालाच्वनिं धयागु नं छगू हाथ्याः हे दनिं ।
सम्भवतः राजसंस्था ल्यनाच्वंगु इलय् तक हनुमानध्वाखाया लाय्कु क्षत्र छगू सुरक्षाया कथं वर्जित जुयाच्वंगु अवस्था खइ, तर आःया अवस्थाय् थुगु क्षत्रयात झीसं व्यवस्थीत यायेमाःगु दु । पुरातत्व विभागया स्वीकृतिं गुगु व्यापारीकरण याना स्थलगत रूपं दुषित यानाच्वंगु दु उगु ज्याखँयात झी सचेत जुइमाः, सम्पदाया संरक्षणय् झी न्ह्यायेमाः ।
जिम्मेवारी वोध मयासे केवल सम्पदायात दोहण यानाः नयेगु नीति खुल्लारूपं विरोध यायेमाः ।
सम्पदाया न्ह्यसलय् थी थी पुचःत लिसें व्यक्तिगत रूपं नं नेवाःत न्ह्यचिलाच्वंगु दु । थुगु खँयात वाः चायेका नेवाः युवातय्गु शक्तियात नं परिचालन यानां यंकेमाः । संघीयताया प्रभावं नेवाःतय्गु अधिकार वः सः आः बुलुहुं बुलुहुं सम्वोधन जुयाच्वंगु दु । झीगु निंतिं थ्व बांलागु हे खँ खः ।
