नेपालभासाया छपू बहुप्रतीक्षित म्ये संकिपाः भिंतुना भिंतुना नेपाः मांयात भिंतुना म्येया प्रिमियर येँया बेन्टो लाउन्ज एण्ड बारय् जुल । नांजाःम्ह भाषिक कार्यकर्ता एवं संगीत पारखि धकाः धायेके न्ह्याम्ह शैलेश शाक्य लगं बरेजुया च्वसां पिज्वःगु थुगु म्ये भुपेन्द्र बज्राचार्य व लसता जोशीं हालातःगु खःसा म्येया संगीत नं भुपेन्द्र बज्राचार्यं हे तयादीगु खः ।
श्रद्धय भन्ते सोभित महाअस्थवीरया मू पाहासुइ न्ह्याःगु थुगु ज्याझ्वलय् जनगायक भृगुराम श्रेष्ठ, ख्यालि जुजु मदनकृष्ण श्रेष्ठ, बागमती प्रदेशया सांसद शोभा शाक्य, पूर्व रक्षा मन्त्री भिमसेन दास प्रधान, येँ महानगरपालिकाया प्रमुख विद्यासुन्दर शाक्य, येँ महानगरपालिकाया उप प्रमुख हरिप्रभा श्रेष्ठ झायादीगु खः । श्रद्धय शोभित महाअस्थवीर भन्तेपाखें मंगलसुत्र पाठ याना ज्याझ्वः न्ह्याकादीगु खः । शैलेश शाक्य बरेजुं थुगु म्युजिक भिडियो दयेकेत वःगु समस्याः लिसें थःपिंसं यानागु परिश्रमया बारे खँल्हानादीलसा म्ये नं ब्वनां न्यंकादीगु खः । म्येया समीक्षा मेम्ह साहित्यकार संघरत्न शाक्यं यानादीगु खः ।
म्ये संकिपाया निर्देशक रवि साय्मिं, उपमेयर हरिप्रभा श्रेष्ठ थःगु नुगःखँ तयादीगु खःसा म्युजिक भिडियो जनगायक भृगुराम श्रेष्ठं ल्यापटपय् तियाः प्रिमियर यानादीगु खः । म्युजिक भिडियोलय् दुथ्यापिं सकलसित खादां न्येका सम्माननं याःगु खः ।
मूपाहां कथं पूर्व उपप्रधान मन्त्री प्रकाशमान सिंया ब्वनातःगु खःसां वय्कयाः राजनैतिक व्यस्तताया कारण मथ्यंगु खः ।
