दच्छि न्ह्याे हे मैंचाया सपलय् म्येचाः तयार जुइ धुंकुगु व पिकाये धकाः भेन्यू बुक जुइ धुंकुगु खःसां काेराेनाया कारण लकडाउन जूयाः ज्याझ्वः दिकेमाःगु खः । तर बल्ल थाैं वयाः थुगु ज्याझ्वः यायेगु ह्वताः चू लात – म्ये हालामि माेहन शाक्यं कनादिल ।
वरिष्ठ तबलाबादक एवं लाेकंह्वाःम्ह संगीतकार मनराजा नकःमिया कुतलय् वयकया दिवंगत अबु संगीतज्ञ व भक्ति संगीत अन्वेषक भिमबहादुर नकःमिं मैंचाया सपले म्युजिक भिडियोया पितब्वज्या जूल । ज्याझ्वःलय् मूपाहाँ कथं जनकवि दुर्गालाल श्रेष्ठ व जनगायक भृगुराम श्रेष्ठ झायादीगु खः सा मनराजा नकःमिया सभापतित्वय् जूगु खः ।
ज्याझ्वया थप अाकर्षण कथं मदुम्ह संगीत अन्वेषक भिमबहादुर नकःमिं च्वयातगु जिं लुमंथें जिगु खँ सफू नं पितब्वज्या जूगु खः । उगु सफूया सम्पादन नेपालभासाया पत्रकार कृष्ण प्रजापतिं यानादीगु खः ।
मनराजा नकःमिया म्ह्याय् अन्जला नकःमिं लसकुस याःसें कृष्ण प्रजापतिं सफूया बारे खँ तयादिल ।म्येचाःलय् दुथ्यानाच्वंगु थी थी म्युजिक भिडियोया निर्देशक रामकृष्ण खड्गींनं म्युजिक भिडियोयात कया नुगःखँ तयादीगु खः ।
ज्याझ्वलय् कलानिधी ईन्दिरा संगीत महाविद्यालयया धनबहादुर गोपालि, नांजाम्ह संगीतज्ञपिं रत्न बेहोशी व अमरराज शर्मा राजोपाध्याय, वरिष्ठ संगीतकःमि संगीता प्रधान राना , वरिष्ठ सितारवादक तारावीर सिंह तुलाधर विशेष पाहाँ कथं झायादीगु खः ।
मैंचाया सपलय् म्येचाःया दक्वं म्ये मोहन शाक्य व आशा नकःमिं हालादीगु खःसा च्यापु म्येया च्वमि व लय् चिनामि भिमबहादुर नकःमि अले छपु म्ये मनराजा नकःमि यागु खः ।
