ईलोहं प्रकाशन प्रालिया न्ह्यब्वयाय् च्वमि पूर्णिमा शाक्य पामिलाया न्हापांगु हाइकु सफू मतिनाया ख्वबिया पितब्वज्या यलया होटल गुडविलय् जुल । ईलोहं प्रकाशनया मू व्यवस्थापक दर्शनवीर शाक्यं लसकुश यायेगु झ्वलय् वास्तवय् नेपालभासा ख्यः गतिशील जुयाच्वंगु धैगु हे पूर्णिमा शाक्य थें जाःपिं च्वमि पिंसं थःगु श्रम व श्रद्धां थः मां बाःया नामय् व नेपालभासा ख्यलय् सफू देछाना पिथनाच्वंगु खँ न्ह्यथनादिल ।
सफू बिमोचन यायेगु झ्वलय् सांसद शोभा शाक्य, वरिष्ठ साहित्यकार एवं च्वसापासाया नायो भुषण प्रसाद श्रेष्ठ, किरण शाक्य, नेवाः हाइकु ख्यःया कजि सुरेश प्रधान व वरिष्ठ साहित्यकार ध्रुव मधिकर्मिं मंकाः रुपं यानादील ।
नेपालभासा मंकाः खलः यलया पूर्व नायः एवं च्वमि पूर्णिमा शाक्यया जहान किरण शाक्यं थुगु सफू पिदनीगु बारे थः अनभिज्ञ जुयाच्वंगु खँ न्हथनादिसें थःत ब्वनापौं वयाः तिनि स्युगु खँ कनादिल । छगू कथं थः सप्राइज जूगु खँ न्ह्यब्वःसें थुगु ज्याझ्वलय् थः काय् सरगतया कमि जुयाच्वंगु खँ कनादिल । छुं ई न्ह्यः तिनि हे सरगत छगु दुर्घटनाय् लाना आ बेडरेष्टय् च्वनाच्वनेमाःगु खँय् किरण शाक्य भचा भावुक नं जुयादीगु खः ।
च्वमियात भिंतुना बिइगु झ्वलय् बागमती प्रदेशया सांसद शोभा शाक्यं मिस्तय्सं पिने नं ज्या यायेमाःगु अले छेँ नं स्वयेमाःगु लिसें हाकनं सफू नं च्वयेगु व पिकायेगु खँय् मिस्त धैपिं सुँ सिबें म्हो मजू धैगु आशय व्यक्त यानादील । ज्याझ्वलय् न्हूगु धार कथं च्वमि पूर्णिमा शाक्य व पत्रकार सिल्भिया राजोपाध्याय दथुइ बःचाःहाकःगु लाइभ अन्तरवार्ता जूल । अन्तरवार्ताय् सफू पिकायेगु अनुभव बारे न्यने कने याःगु खः ।
साहित्यकार ध्रुव मधिकर्मिं च्वमि व ब्वमि दथुया प्रभाव पाइ धाःसें पाठक व च्वमि दथुया स्वापू छगू हे अर्थ दयेमाः धैगु मदु धकाः कनादिल । समालोचनया दौरान मूपाहां भुषण प्रसाद श्रेष्ठं हाइकुया बिषलय् अझं ध्वाथुक्क थुइकादिलसा छगू शिर्षक अन्तरगत हाइकु च्वयेगु छगू प्रयोग जुयाच्वंगु व सफूतिइ ख्वबि खँग्वः छ्यलातःगु खँ कुलादिल । उकथं हे च्वमिं धाःसा ५–७–५ या फ्रेमय् दुने च्वना हाइकु च्वयातःगु लिं गनं गनं आखःयात थःत छिंक च्वयातःगु बिषयलय् नं कुलादिल ।
थुगु सफूया वितरणया भाला काःगु कथं नेवाः हाइकु ख्यःया कजि सुरेश प्रधानं सफू छेँ छेँ हे थ्यंके फइगु खँ न्ह्यथनादिल । उकथं हे सभानायः ईलोहं प्रकाशनया प्रबन्ध निर्देशक नरेशवीर शाक्यं नेपालभासा ख्यलय् अझ नं सफू पिकाये न्ह्यःया तयारीया निंतिं अझं जनशक्तिया अभाव दनिगु खँ कुलादिल ।
ज्याझ्वलय् सफू पिकायेगु निंतिं ग्वहालि याः पिन्त मतिनाया चिं लः ल्हाःगु खःसा ज्याझ्वः सुनिल बज्राचार्य न्ह्याकादीगु खः ।
