नेपाल सरकारपाखें स्थानीय भाय्या पाठ्यक्रम कथं नेपालभासाया पाठ्यक्रम तयार यानाः नेपालभासाया १७२म्ह प्रशिक्षकया सरकारी करार कथं माग याःगु दु । सरकारी तवरं नेपालभासा ख्यलय् थ्व सिबें तःधंगु आः तक्क छुं नं उपलब्धी मदुनि । थुकीया निंतिं नगरप्रमुख बिद्यासुन्दर शाक्य एवं थुगु पाठ्यक्रम तयार यायेगु निंतिं संलग्न जूपिन्त नेवाःतय्सं खेँ सगं बिया भिंतुने हे माः। छाय् धाःसा थुकीं याना आः नेपालभासाया भविष्य दयावल । नेपालभासा ब्वनां वा ल्हाना छु दइ धकाः न्ह्यसः तयाच्वंपिंन्त थ्व छगू तसकं हे बांलागु व सेल्लागु लिसः खः ।
नेपाःया संविधानं हरेक स्थानीय तहयात आधारभूत तहलय् छगू विषय स्थानीय पाठ्यक्रम निर्माण याना कार्यान्वयन यायेदइगु प्रावधान लिसें हेरक स्थानीय तहं थःगु परम्परा, संस्कृति, व्यवयास, पहिचानया विषययात प्राथमिकता बियाः स्थानीय पाठ्यक्रम निर्माण यायेगु अधिकार बियातःगु दु । येँ महानगरया नेपालभाषा व्यवस्था समितिया हे निर्णय कथं महानगरं पारिश्रमिक व्यवस्था यायेगु कथं प्रशिक्षकका नितिं विज्ञापन आः याःगु दु । नेपालभाषाया पाठ्यक्रम हरेक ब्वनेकुथिइ स्वला न्ह्यः हे थ्यनेधुंकुगु खःसां लकडाउनया प्रभाव व प्रशिक्षकया अभावं ब्वनेकुथिइ धाःसा पाठ्यक्रम कार्यान्वयन यायेमफयाच्वंगु खः । येँ महानगर अन्तर्गतया ब्वनेकुथिया शिक्षक कर्मचारीतय्सं स्थानीय पाठ्यक्रमय् समावेशयाना तःगु भाय् मथुगु कारण हे पाठ्यक्रम कार्यान्वयन यायेगु निंतिं महानगर पालिकां विज्ञापन हे याना नेवाः प्रशिक्षकया छनोट आ यायेत्यंगु दु ।
येँ महानगर क्षेत्र दुने फुक्कं हे ब्वनेकुथिइ अध्ययनरत विद्यार्थीपिंसं अनिवार्य कथं १०० पूर्णाङकया स्थानीय विषयया पाठ्यक्रम अध्ययन याये हे माःगु येँ महानगरपालिकाया नीति दु । पाठ्यक्रमय् येँँ महानगरपालिका दुनेया ६० व येँ दुनेया ४० प्रतिशत विषयवस्तुया अनुपातय् दुथ्याकातःगु दु । येँ महानगर दुनेया सामुदायिक व संस्थागत याना ७५० ब्वनेकुथि दु । थुकी मध्यय् ९२ गू सामुदायिक विद्यालय मध्य् ८६गू साधारण, ३ विशेष र ३ गू ब्वनेकुथि बन्दीतय्गु निंतिं दु धाःसा ६४०गू संस्थागत ब्वनेकुथि दु । नेपालभासाया अध्यापनया निंतिं थ्व छगू स्वर्ण युग जुइगु खँय् झी सकस्यां हे वाः चायेके माः, थुइके माः । थ्व सम्बन्धि छुं नं कथंया विवाद झीसं आः ब्वलंके मज्यु । गुलि फु उलि थुगु परियोजनायात ताः लाकेत स्वये हे माः ।
बुलुहँ नेपालभासा ख्यलय् नं आ संघीयताया प्रभाव लानावयाच्वंगु । नेपालभासाया आन्दोलनयात छगू गन्तब्य चुलाका ब्यूगुलिं मेयर विद्यासुन्दर शाक्ययात आपलं आपा सुभाय् ।
