वंगु न्यय्दँ न्ह्यवंनिसें थःत कला क्षेत्रय् फ्याना वयाच्वंम्ह कलाकार लिसे निर्देशक खः पवन जोशी । वय्कलं दकलय् न्हापां २०२७ सालपाखे गोविन्द चिकंमुं निर्देशन यानादीगु दबू प्याखँ ‘हकदार’य् भिलेनया भूमिका म्हितादीगु खःसा गोविन्द चिकंमुं हे निर्देशन याःगु ‘चरित्र’ नांया दबू प्याखनय् हिरो लिसे सहायक निर्देशक जुयादीगु खः । लिपा वनाः २०४३ सालपाखें दबूप्याखँ चरित्रयात कयाः भिडियो फिल्मया निर्देशन नं वय्कलं यानादीगु खः । लिपा देय्या पुकार नांगु दबू प्याखँया निर्देशन यानादिल । उकथं हे वय्कलं नेपालभाषा संकिपा ‘सिलु’ नं अभिनय यानादीगु दुसा व स्वयां न्ह्यः २०३९ सालपाखें हिमालयभक्त प्रधानाङं निर्देशन याःगु नेपालभाषा फिल्म म्हितादीगु खःसा ७० प्रतिशत सुटिङ क्वचाःगु उगु फिल्म धाःसा पिहां मवल ।
नेपालभाषाया लिसें आपालं खस भाषाया संकिपाय् म्हितेगु जक मखु फिल्मया पटकथा च्वयेगु व निर्देशन यायेगु ज्या नं वय्कलं यानादीगु दु । वय्कःया कथं वय्कलं २५ गू सेडुलाइट फिल्म म्हितादीधुंकूगु दु ।
उकथं हे झिंनिगू सेडुलाइट फिल्म निर्देशन यानादीधुंकूगु दुसा उलि हे फिल्मय् पटकथा च्वयादीगु दु । थुकथं स्वयेगु खःसा वय्कः बहुप्रतिभावान निर्देशक व कलाकार खः । वय्कःया कथं वय्कलं राजमति म्येया फिमेल भर्सन म्ये च्वयादीगु दुसा उकियात म्युजिक भिडियो दयेकेगु ज्या जुल । उगु म्युजिक भिडिओ नेपालभाषाया दकलय् अप्वः भ्युअर्स दुगु दावी नं वय्कलं यानादी । वय्कःया कथं उगु भ्युअर्स जक ६५७५० थ्यनेधुंकूगु दु ।
वय्कलं २०६३ सालंनिसें म्ये च्वयेगु ज्या यानादीधुंकूगु दुसा छगू हे दँ २०७६ सालं जक ३६ गू म्युजिक भिडियो दयेकूगु दुसा उकि मध्ये झिंन्यागू म्युजिक भिडियोया निर्देशन नं यानादीगु दु । वय्कः लिसे यानागु खँल्हाबल्हा थन न्ह्यब्वयाच्वना ।
थौंकन्हय् छु यानाच्वनादिया ?
थौं कन्हय् म्ये च्वयेगु व उकिया म्युजिक भिडियो दयेकाच्वना ।
अभिनय क्षेत्रय् गुकथं लात ?
जि २०२७ सालपाखे गोविन्द चिकंमूं निर्देशन याःगु दबू प्याखनय् म्हिताः कला क्षेत्रया यात्रा न्ह्याकूगु खः ।
दबू प्याखनय् म्हितेगु व फिल्मय् म्हितेबलय् छु पाः ? गुकिं अप्वः सन्तुष्टि दु ?
दबू प्याखनय् सन्तुष्टि दु । दबू प्याखनय् लाइभ अभिनय यायेगु जुइ । गुकिं दर्शकया तत्काल प्रतिक्रिया स्वयेफइ । दबू प्याखनय् ताः हाकःगु डाइलस कन्ठ यायेमाः । तर फिल्मय् अज्याःगु जीवन्त अभिनय यायेफइ मखु । निर्देशकं कलाकारया भूमिकायात कयाः बांलाक ध्वाथुइके मफुत धाःसा सिचुयसन चेन्ज जुयाः कलाकारया रियाक्सन नं चेन्ज जुयाः जीवन्तता मदयेफु । अथेजुयाः दबू प्याखनय् अभिनय यायेबलय् गुलिं सन्तुष्टि दु । उलि फिल्मय् यायेबलय् मदु ।
अभिनय यानाः आर्थिक रूपं गुलि तक सन्तुष्टि दु ?
अभिनय यानाः आर्थिक रूपं सन्तुष्टि हे दु । जिं न्हापा खस भाषाया फिल्म बहादुर यानागु खः । थ्व २०५०÷५१ सालपाखे खः । अबलय् अभिनय यानाबलय् पारिश्रमिक हे १ लाख तका कयागु खः । उकथं हे जिं आपालं फिल्मया पटकथा नं च्वया । छगू पटकथा च्वयेगु पारिश्रमिक हे ४० हजार निसें ६० हजार तका कया । थ्व कथं आर्थिक रूपं सन्तुष्टि हे दु धायेमाः । तर नेपालभाषाया फिल्मय् धाःसा आर्थिक रूपं सन्तुष्टि जुइगु अवस्था मदु । अथे खःसां नं मां भाय्यात म्वाकेगु निंतिं छुं यायेफुगुलिं तसकं लय्ता । तर आर्थिक पक्षयात धायेगु खःसा दुःख ताः ।
नेपालभाषाया फिल्म छाय् म्हो जक निर्माण जुयाच्वन ?
नेपालभाषाया फिल्म स्वइपिं दर्शक तसकं म्हो जक दु । झी झिंखुगू लाख नेवाः जनसंख्या दु । तर निगू प्रतिशत नेवाःतय्सं हे नेवाः फिल्म स्वया मबिउ । गुकिं यानाः नेपालभाषाया फिल्म दयेकेगु ज्या म्हो जुल । नेपालभाषाया फिल्म दयेकाः लाय् तकं सालेत थाकुइवं फिल्म दयेकेगु क्रम नं म्हो जूगु खः ।
नेपालभाषाया फिल्म गुलि तक स्तरीय जू ?
नेपालभाषाया फिल्म स्तरीय मजू धकाः धायेगु स्वयां स्तरीय फिल्म दयेकेत न्हापां उकिया दर्शक अप्वये माल । नेपालभाषाया फिल्म दयेकाः थःगु लाय् तकं लिफ्याये मफुगुलिं यानाः हे खस भाय्या फिल्म दयेकेमाःगु अवस्था वल । गुकिया लिच्वः नेपालभाषाया फिल्म दयेकेगु म्हो जुल ।
कला क्षेत्रय् वयाः छुं अवार्ड कयादीगु दु ?
अपालं अवार्ड कयागु दु । नेपालभाषाया ‘बांलाम्ह मय्जु’ पाखे बेस्ट डाइरेक्टर अवार्ड कयाः, उकथं हे तःभुखाय् ब्वयेधुंकाः दयेकूगु म्युजिक भिडियोपाखें पेजथ्री अवार्ड नं कयाः । उकथं हे आपालं अवार्ड कयागु दु ।
थौंकन्हय् पटकथा च्वयेत गुलि ध्यबा कायेगु यानाच्वना ?
थौंकन्हय् खस भाषां छगू पटकथा च्वयेत ३० हजार तका कयाच्वना । उकथं हे नेपालभाषाया पटकथा च्याद्वः निसें झिद्वः तका कायेगु यानाच्वना । उकथं हे खस भाषां छपू म्ये च्वयेत स्वद्वः निसें न्याद्वः तका कायेगु यानाच्वना । उकथं हे नेपालभाषाया म्ये च्वयेत निद्वः निसे स्वद्वः तका कायेगु यानाच्वना ।
नेपालभाषा फिल्मय् वयेधुंकाः छुं अज्याःगु बामलाःगु अनुभव यानादियागु दु ला ?
न्हापा न्हापा आपालं खस भाषाया सेडुलाइट फिल्मया पटकथा च्वकेत मनूत वइगु खः । तर जिं गुबलय् बांलांम्ह मय्जु दयेकाः अनंनिसें खस भाषाया पटकथा च्वकिपिं म्हो जूगु दु । नेपालभाषाया फिल्म दयेकीम्ह मखुला धकाः धाइगु थौंकन्हय् । नेपालभाषाया फिल्म दयेकाः जि छगू कथं प्रमोशन मखु डिमोशन जूगु दु । तर अथेखःसां नं दुःख मताः । मां भाय्या विकासया निंतिं जि अझ नं न्ह्यानाच्वने ।
डिजिटल प्रविधि वःगुलिं ज्या यायेत गुलि अःपू ?
डिजिटल प्रविधि वयाः ज्या यायेत अःपू । तर उकिया लिसे पारिश्रमिक नं म्हो जूगु दु । न्हापा न्हापा प्रविधि मदुगु इलय् आपाः पारिश्रमिक वः । थौं कन्हय् दाई थुलि ज्या याना बियादिसं चिया खर्च जक बी धाइगु अवस्था वःगु दु ।
नेवाः फिल्म ख्यःयात विकास यायेत छु यायेमाः ?
गुबलय् तक नेवाः भाय् प्रति नेवाःतय् दुने मतिना दइमखु उगु इलय् तक नेपालभाषाया फिल्म विकास याये फइमखु । अथेजुयाः दकलय् न्हापां नेवाःतय्के थःगु भाषा प्रति मतिना दयेमाः थुलि जुल धाःसा नेवाः फिल्म नं विकास जुइ ।
गुबलय् तक नेवाःतय्कें थःगु मां भाय् प्रति मतिना दइमखु ।
अन्तय् पेजथ्रीपाखे छुं धायेगु दु कि ?
नेवाः फिल्म ख्यःयात ब्वयेगु ज्या पेजथ्री पत्रिकां यानाच्वंगु तायेका । थुगु पत्रिकां च्वछाये बहःगु प्रस्तुती न्ह्यब्वयाच्वंगु दु । पेजथ्री पत्रिकाया विकास अनन्त तक जुइमाः । थुकथं थीथी अवार्ड ज्याझ्वः याना वनेफयेमाः धकाः भिन्तुना च्वना ।
