चःमति नेवाः खलः, चःमति मिसा खलः व चःमति बहुउद्देशीय सहकारी लिमिटेडया ग्वसालय् लसता तुच्चा ज्याझ्वः लिसें चःमति ज्याथः क्यब सांगीतिक देछाःया उलेज्या जुल । नेवाः इन्टरटेनर पूर्णकाजी ज्यापु च्वसां चःमति ज्याथः क्यब म्येचाः पिदंगु खःसा थुगु सांगीतिक देछाःया उलेज्याया येँ महानगरपालिकाया मेयर विद्यासुन्दर शाक्यं व विशेष पाहाँ शहरी विकास राज्यमन्त्री रामबीर मानन्धर लिसें मेमेपिं पाहांन्पिसं ब्वज्या यानादीगु खः । थुगु सांगीतिक देछाः कप दुने पेनड्राइभय् तयाः उलेज्या याःगु खः ।
सांगीतिक देछाया समालाेचना वरिष्ठ म्येहालामि जुजु काजी रंजितं याना दीगु खःसा वरिष्ठ सिनेपत्रकार विजयरत्न असंबरें संगीतकःमि कलाकार पूर्णकाजी ज्यापुया कारणं चःमति त्वाःया नां सगीत व संकिपा ख्यलय् नं थ्वया वःगु खँ कुलादिल । विशेष पाहाँ मन्त्री मानन्धरं थःम्हेसिनं संगीतख्यःया नांया विश्व रेकर्ड दयेके खँगुलिं लसता प्वंकादिल । मूपाहाँ मेयर शाक्यं येँ महानगरपालिकाया विकास छसीकथं जुयाच्वंगु व महानगरपालिकां संरक्षण व जिर्णोद्धार यायेत स्वःबलय् छथ्वः मनूतसें विरोधया सः थ्वयेकाच्वंगु खँ कुलादिल ।
ज्याझ्वलय् वहालवाला मन्त्रीपाखें म्येहाला विश्व रेकर्ड तयेत तालानादीम्ह शहरी विकास राज्यमन्त्री रामबीर मानन्धरयात ग्वसाः खलःपाखें मूपाहाँ मेयर शाक्यं हनापौ लःल्हानादीगु खः । ग्वसाः खलःया कजि पूर्णकाजी ज्यापुया सभानायसुइ उगु ज्याझ्वलय् ग्वसाः खलःया छ्यान्जे राजेन्द्र महर्जनं लसकुस यानादीगु खः ।
ज्याझ्वलय् सतिश महर्जन, कल्पना श्रेष्ठ व पूर्णकाजी ज्यापु लगायतं म्येहाला न्यंकादीगु खःसा नेपाः डान्स एकेडेमीपाखें थीथी हुलाप्याखँ नं न्ह्यब्वःगु खः ।
