रत्नकेतु महाविहारको जिसिं आजु गुठीया प्रबज्या संवर व्यवस्थापन समितिया ग्वसालय्र प्रवज्या संवर अर्थात् बरे छुयेगु छु खः?, छाय् छुइगु व गथे याना छुइ धैगु बिषयलय् प्राडा नरेशमान बज्राचार्य पाखें छगू प्रवचन जुल । एकेदमिक तवरं बरे छुइगु संस्कारया बिषयलय् प्राडा नरेशमान बज्राचार्यं स्लाइ शाे मार्फत हे प्रेजेन्टेशन यानादीगु खः ।
जिसिं आजु गुठीया थकालि अशोक रत्न बज्राचार्यया सभापतित्वय् सम्पन्न उगु ज्याझ्वःलय् प्रा. डा. गौतम रत्न बज्राचार्यं लसकुश यानादीगु खःसा गुठिया दुजः नरेन्द्र रत्न बज्राचार्यं सुभाय् देछानादीगु खः । प्रबज्या व्यवस्था समितिया सह–संयोजक आनन्द रत्न बज्राचार्यं झीसं बरे छुइगु छु खः धकाः थुकीया यथार्थ खँ निं थुइके माः धकाः थुगु ज्याझ्वःया ग्वसाः ग्वइगु खँ जानकारी बियादील ।
प्राडा नरेशमान बज्राचार्यपाखें वरे छुइगु बिषयलय् तर्कपूर्ण खँ त न्ह्यब्वःसें बुद्धधर्म संघय् दुहांवनेगु न्हापांगु पलाः कथं थुइके माःगु खँ कनादिल । थाैंकन्हे मस्त बिदेशय् वनां अाखः ब्वंवनेगु सिलसिला थें छुं इया नितिं परिवार त्याग याना शिक्षा हासिल याये थें वरे छुइगु नं परिवार त्याग याना वनेगु छगू अभ्यास थें खः धकाः धयादील ।
थ्व हे अनुरूप ग्वय् दां तयेगु धैगु हे धन (दां) व मानसम्मान बिइगु सामान्य खँ खः । लिसें बरे छुइगु धैगु चुडाकर्म वा कयेता पुजा मखु धाःसें थ्व बुद्ध धर्मया पालना याना वा बुद्धया शिष्य जुइगु न्हापांगु पला खः धकाः थुइका दिल ।
दकलय् महत्वपूर्ण खँ ला बरे छुइबलय् लाय्कुलिइ वनां ग्वदां तयेगु धैगु हे जुजुया स्वीकृति काः वनेगु लिसं राज्यं हे हनाच्वंगु थुगु उत्सवयात थाैंकन्हे नितान्त व्यक्तिगत तवरं तक्क बरे छुयाच्वंगु बिषय नं कुलादील । थुकीया तर्क ब्युसें प्राडा नरेश मान बज्राचार्यं धयादिल की न्हापा न्हापा छत्रं धैगु जुजु वा द्यःया हे जक कुइकी । तर बरे छुपिं मस्तय्त धाःसा छत्रं कुइकेगु व्यवस्था दु । बरे छुइगु धैगु राज्यं हे हनावयाच्वंगु संस्कार खः धकाः कनादील ।
अथेहे तुं वरे छुइगु थाैंकन्हे तसकं तडक भडक यानाच्वंगु व थथे तडक भडक मयासे हे बरे छुया वनेमाःगु खँय् जाेड बियादील ।
