नेपालभासाया सिने क्षत्र थौंया इलय् छगू अज्योगु मोडय् लानाच्वंगु दु गनं नं न्ह्यां वने फु नं लिहां वने फु । कोभिड १९या कारण नेपालभासाया सिनेमा जक मखु मेमेगु भाय्या सिने क्षेत्रलिसें अन्तर्राष्ट्रिय सिने जगततकं हे उतिकं हे प्रभावित जुयाच्वंगु दु तर नं नेपालभासा क्षेत्र धाःसा विकास हे जुइ मफूनीगु अवस्थाय् कोभिड १९या कारण झन हे अलमलय् लाकाब्यूगु दु । आःया इलय् कोभिडयात हाथ्याः बिया भारत लिसें नेपालय् नं सिनेमा हल चायेके धुंकुगु दु । तर थथे खःसां सिनेमा हलय् धाःसा मनू मुनेगु वातावरण मदुनी । छगू कमर्सियल शो सफल यायेगु निंतिं न्हापां छगू बांलागु सिनेमा ला दये हे माःगु जुल अनं वयाः स्वकुमिपिन्त नं स्वयेगु इच्छा दुगु जुइ माल ।
नेपालभासाया सिने जगतय् नं छुं छुं संकिपाया सार्वजनिक शो जुइधुंकुगु अवस्था दु । कोभिड १९या हुनिं सार्वजनिक शोया निंतिं ग्वसाः खलकं धाःसा थी थी सावधानी नाला हे प्याखँ क्यंगु अवस्था खः । छुं ई न्ह्यो योमरी पुन्हिंया लसता लाका खपिन्छे त्वाः पाखें त्वाः छेँय् हे मिसा व तिसा नांया चिहाः प्याखँ क्यने धुंकुगु खःसा कीर्तिपूर नगरपालिका पाखें नं चिहाः संकिपाः कासा ११४० धकाः राष्ट्रिय सभागृहस प्रदर्शन याःगु खः । निगुलिं हे ज्याझ्वलय् उल्लेखनीय स्वकुमिया उपस्थीति दुगु खः । कमर्सियल वा व्यवसायिक सिनेमा थें न्हिंया न्हिं संकिपा क्यने म्वाःगु व ई कथं लाक्क छगू शो वा छन्हुया शोया निंतिं झीसं संकिपा क्यनाच्वनागु छगू कथं सरल थें नं खनेदु ।
थौंया अवस्थाय् नेपालभासाया सिनेमा हलय् क्यनेगु वा मक्यनेगु धैगु खँय् नेपालभासाया सिने जगत अलमल जुयाच्वंगु खने दु । सिनेमा हलय् हुलहुल मुनां प्याखँ स्वयेगु इलय् मनूतय्त कोरोना भाइरसं पुनिं धकाः ग्याचिकु खःसा, सिनेमा हल सिबें हुलमुल जुइगु थासय् झी न्हिं न्हिं वनाच्वनागु दु, मुनाच्वनागु दु । नेपालभासाया सिनेमाया स्ववइपिनिगु मनस्थीति धैगु थौंनं अथे हे तिनि । व्यवसायिक प्रदर्शन झीसं याये मफूनिगु कारण टिकट व्यक्तिगत रूपं हे मियाच्वने माः । व हे कारण आः वइगु दिनस नेपालभासाया संकिपाः हलय् प्रर्दशन यायेगु वा मयायेगु धैगु खँय् झी अलमल जुयाच्वने मज्यु । प्याखँ क्यना छ्वये माः । छाय्की आः या अवस्थाय् नेपालभासाया प्यंगू न्यागू प्याखँत प्रदर्शन यायेगु निंतिं तयार जुयाच्वंनेधुंकुगु अवस्था दुसा वंगु दँ निसें वा कोभिडया कारण लकडाउन जूगु ई निसें नेपालभासाया सिने क्षत्रय् न्हूगु प्याखँया निर्माण शून्य जुयाच्वंगु दुसा, दयेकाच्वंगु प्याखँ तकं दिनावनाच्वंगु अवस्था दु । थुगु गतिं नेपालभासाया सिनेक्षत्र हाकनं लिहां वनीगु खने दु । सकलसिगु कुतलं निपला न्ह्याः वनाच्वंगु थुगु ख्यलं हाकनं दिपाः कयाच्वंगु अवस्था नेपालभासाया सिने क्षत्रयात आ छक्व हाकनं सकस्यां तिबः बिइमाःगु अवस्था दु ।
मूलत नेपालभासाया छुं नं गतिविधि जुलकी पासया व्यवस्था स्वइगु व टिकट न्याना वनेमालकि अनेक बाहना तइपिं थौंया स्थीतिइ छुं म्हो जुयाच्वंगु कारण नेपालभासाया संकिपा न्ह्यब्वयाः हाकनं छगू न्हूगु शुरुवात याये फइगु खँय् नेपालभासाया सिनेक्षत्रं वाः चायेकेमाःगु अवस्था नं उतिकं हे दु ।
