नेवाःतय्गु सम्पदां जायाच्वंगु स्वनिगः खःसां वास्तवय् स्वनिगः थौं छगू मैदान वा दबू हे जक जुयाच्वंगु दु । स्वनिगः अले विशेषयाना येँ, विशुद्ध छगू राजनैतिक अखाडा सावित जुयाच्वंगु दु । राज्यासत्ताया विरुद्धय् जुइगु आन्दोलन वा देय्या राजनैतिक समिकरण स्यनेवं खने दइगु छगू अखाडा हे येँ देय् जुयाच्वंगु दु । स्वनिगःया शान वा पहिचान नेवाःत जुयाः नं थौं स्वनिगः पाखें भू–राजनैतिकीकरण पाखें वंचित जुयाच्वंगु दु सा भू–राजनीतिया नामय् नेवाःतय्त सकस्यां छ्यलाजक हे च्वंगु दु ।
उकथं हे झी नेवाःतय्गु मुद्दाय् गुलि खँ ल्ह्वनेमाःगु खः व गुब्लें नं छुं पार्टि विशेषं ल्ह्वंगु मदु । चाहे व बुंगद्यःया जात्रा जुइमा वा खोकनाया फास्ट ट्राय्क, सम्पादा संरक्षण जुइमा वा सडक बिस्तार राज्य, प्रतिपक्ष वा मेगु छुं राजनीतिक दलं पुवंक समर्थन बियाच्वंगु मदु । तर नं झी सदां थीथी राजनीतिक पार्टिया ल्यू ल्यू वनेत तत्पर जुयाच्वना ।
नेवाः एकता दिवसया लसताय् तकं राजनीतिक पार्टितय्सं नेवाःतय्त भ्वँ छपातय् च्वयाः भिंतुना तकं ब्यूगु मदु । तर नं झी नेवाःत धाःसा थुपिं हे तःधंगु पार्टिं थःगु एजेण्डाय् नेवाःतय्गु हकहितया निंतिं छुं खँ दुथ्याकीला धैगु खँय् आशावादी जुयाच्वन । गनं जुलुस वा सभा समारोह यायेमाःसां न्हापां नेवाःतय्त हे धिमे थाकाः यंकाच्वंगु दु । तर नेवाःतय्सं याइगु आन्दोलनयात धाःसा गनं छथाय् समर्थन तकं यानाच्वंगु मदु ।
म्हिगः नेवाःतय्गु आन्दोलनय् गुकथं ज्यू उगु कथं दमन यानाच्वंगु दु । थःपिनिगु सम्पदा संस्कृति सरक्षणया निंतिं थःपिं हे ब्वाँय् वनाच्वनेमाःगु दु । तर सरकारया समर्थनय् आन्दोलन यानाच्वंपिन्त धुम्ती चःबिया तक्क सुविधा बिया विभेद यानाच्वंगु दु । नेवाःतय्गु थुगु भुमीइ झी गुकथं दमित यानातल, ल्यूने लाकातल धयागु खँय् थ्व सबें तःधंगु दसू गन स्वः वने ? जबकी झीगु स्थानीय त्वालय् थाय्मदुइ च्वंगु वाःस्याः द्यःयात सुरक्षा बिइ मफूत धकाः प्रशासनं बाकस दयेका त्वपुना ब्यूगु दु । अय्नं झी लय्ता की आः ला झीगु द्यः सुरक्षित जुइ, तर थ्व सम्पदा संरक्षणया नामय् औपचारीकता जक खः धैगु खँय् झीसं थुइके मफयाच्वन ।
नेवाः एकता दिवसया लसताय् झी खोकनाया सभाय् झीसं पाः च्वनाच्वंपिं सिपाहीँतय्त तकं हे लः त्वंकाः समयबजी नकाच्वनातिनि । अनं छुं खितिक्क जुल धाःसा व हे सिपाहीतय्सं झीत दमन याइ तिनिं तर न झीधाःसा नेवाः नुगः दुपिं । झीगु थ्व हे नुगःया लवः कयाः थौं सकलें हे सत्ताय् थ्यनेधुंकल । तर झी न्ह्याब्लें झीसं सत्ताय् थ्यंकातइपिंथाय् वनां ज्ञापन पत्र ब्यूवनेगु वाहेक छुं यायेफयाच्वंगु मदु ।
