नेपालय् मस्तय्त अनलाइनय् यौन शोषण बिषयस सिविन नेपालं २०२० वर्षय् यागु छगू अध्ययन रिपोर्ट सार्वजनिक याःगु दु । थुगु रिपोर्ट कथं इन्टरनेटया माध्यमं सामाजिक संजालय् मस्तय्त लानाच्वंगु प्रभावया वारे अध्ययन याःगु खः । मस्तय्त थौंया इलय् इन्टरनेटया माध्यमं यौन शोषण व नकारात्मक प्रभाव लानाच्वंगु लिच्वः पिदंगु दु । तर, थथे यौन शोषणय् लाःगु खँ स्वयं मस्तय्सं नं वाःमचाःगु वा मस्युगु खँ रिपोर्टं धाःगु दु ।
कारोना भाइरसया कारण जूगु लकडाउनं मस्तय्गु अध्यापनया निंतिं अनलाइन कक्षा न्ह्यानाच्वंगु दु । अनलाइन कक्षा कायेतुं हे मस्त नं क्लासय् च्वना आखः ब्वनिं थें बन्द कोठा दुने च्वना आखः ब्वनाच्वनिं धयागु झीगु मान्यता जुयाच्वंगु दु । तर वास्तवय् धाःसा छु धात्थें हे अथे जुयाच्वंगु खः ले सा ? अनलाइन कक्षां यानां थौंकन्हेया मस्तय झन झन हे इन्टरनेट व सामाजिक संजालय् नं एक्सपोज जुयाच्वंगु दु । लकडाउन न्ह्यो तक नं स्कुल वा थी थी मस्त लिसे स्वापू दुगु संघसंस्था नं मस्तय्त स्क्रीन टाइम पाखें तापाके माः धकाः धयाच्वंगु खः । तर थौंया अवस्थाय् धाःसा छम्ह मचां औसतय् ३ निसें ४ घण्टा याउँक हे मांअबुया हे रेखदेखय् इन्टरनेटय् सनाच्वंगु दु । थुकथं इन्टरनेटय् मस्तय्त संका तइबलय् इमिगु व्यवहारय् हिउपा वयाच्वंगु दुसा मस्त बुलुहु असमाजिक जुयाच्वंगु खँय् नं वाः चायेके माःगु दु । मुख्य खँ, अनलाइन क्लास धकाः मस्तय्त याकःचा बन्द कोठाय् दुने तयाः ब्वंका तइथाय् छु इपिं क्लास जक काइपिं खः वा मेमेगु सामाजिक संजालया माध्यमं मेमेपिं लिसे च्याट याना अनलाइन यौन शोषणया शिकार नं जुयाच्वंगु मदु धकाः धायेफइगु स्थीति नं मदु। अकसर दक्वस्यां हे जिमि काय् म्हयाय् थथे जुइ मखु धकाः दृढ जुयाच्वनिं तर थौंया अवस्थाय् सुयां नं काय् म्ह्याय् धाःसा सुरक्षित मजू ।
सिविनं याःगु थुगु सर्वेक्षणं १७१४ म्ह मस्त दथुइ नेपाःया ७गू हे प्रदेशय् अनुसन्धान याना स्वःगु खः । सरकारी स्कुल लिसें प्राइभेट स्कुलया ९ दँ निसें १९ दँ तकया मस्तय् दथुइ अनुसन्धान याःगु खः । थौंकन्हे हरेक मस्तय्के थःगु हे फेसबुक प्रोफाइल दयेकेगु सुविधा व मां अबुं हे दयेका बिइगु यानाच्वंगु दु । अले च्याटय् म्हमस्यूपिं मनूतलिसे खँ (च्याट) ल्हायेगु यानाच्वंगु दु । च्याट याइम्ह मनूया प्रभावय् लाना मस्तय्गु नांगां किपाः छ्वयेगु वा थी थी अश्लील किपा प्याखँ स्व धायेगु यात हे इन्टरनेटया माध्यमं यौन शोषण यानाच्वंगु जुइ । थ्व सिबें नं ग्यानापूगु खँ ला च्याटय् नापलापिं मनूयात हे नापलाः वनिगु व निम्ह दथुइ स्वीकृति अनुरुप हे संसर्ग जुइगु अनं लिपा निम्हेसिया थी थी नीजि किपाया माध्यमं व्लाय्कमेल जुइगु खँ तकं रिपोर्टय् वःगु दु । थुगु रिपोर्टया आधारय् गुलि मस्तय् जीवन हे स्यने धुंकूगु दुसा थौंया स्थीतिइ झी मस्तय्त स्यंकेत झी नं उतिकं हे जिम्मेवार जुयाच्वंगु खँय् सिविनं सावधान याःगु दु ।
