नेपालभासा ख्यलय् म्युजिक भिडियोया बहार वयाच्वंगु इलय् जितेन शाक्यया देछा कथं छक्वलं स्वंगू म्यूजिक भिडियो यलया एम्बियन्स ३६५ रेष्टुरेन्टय् पिदंगु दु । नेपालभासाया निपू म्ये जीउ ज्यान प्राण सकतां व दुनुगलं निंसें ल्यम्ह व खस भाय्या म्ये जीउ ज्यान प्राण सारा स्वपुं म्येया प्रिमियर याःगु खः। वरिष्ठ निर्देशक एवं कलाकार सुरेन्द्र तुलाधर मू पाहां कथं झाःगु खःसा म्यूजिक भिडियोस संलग्न सकसितं हना पौ नं लःल्हाःगु खः ।
म्ये च्वमि अमृत रत्न शाक्यं थुगु स्वपूं म्ये च्वयादीगु खःसा संगीतकार विरेन शाक्यं थुगु स्वपुं म्येय् संगीत व संगीत संयोजन यानादीगु खः । पाहांया आशनय् म्युजिक भिडियोया कलाकार कृष्णभक्त महर्जनयात नं ब्वनातःगु खः ।
ज्याझ्वस जीउ ज्यान प्राण सकतां व जीउ ज्यान प्राण साराया परिकल्पनाकार दर्शनवीर शाक्यं थुगु म्ये पाखें स्वदेशय् हे छुं याना नये झी विदेश पलायन मजुइ धैगु परिकल्पनाय् तयार यानागु खँ कनादीगु खःसा दुनुगलं निसें ल्यम्ह म्येया परिकल्पनाकार विश्वास वज्राचार्यं म्येया संगीत अनुरुप सन ९०या सांगीतिक लकसय् परिकल्पना याना तयार यानागु खँ कनादिल ।
जीउ ज्यान प्राण सारा व जीउ ज्यान प्राण सकतां म्येया निर्देशक राजन शाही खःसा म्येया डिओपि मनोजरत्न शाही खः । कलाकार कथं थुकी कृष्णभक्त महर्जन, सुरेन्द्र मानन्धर, रुपेन श्रेष्ठ थक्वामि व सरीता बज्राचार्य लिसें अन्य कलाकार दु । उकथं हे दुनुगलं निसें ल्यम्ह म्ये सुरज नापित व रजनी खड्गी कलाकार कथं दुसा म्येया बिजन राज बज्राचार्यया निर्देशन, क्यामरा व सम्पादन दु अले राजिव वज्राचार्यया कोरियोग्राफी दु ।
ज्याझ्वलय् म्ये च्वमि अमृत रत्नं शाक्यं झीसं झीगु भाय्या निंतिं न्ह्यचिले माःगु व सम्बन्धित मनूतय्सं थथःगु थासं पहल यायेमाःगु खँय् बः बियादील । उकथं हे मूपाहां सुरेन्द्र तुलाधरं म्येया बःचाहाकलं समिक्षा यानादीसें झी सकस्यां हरेक नेवाः म्येयात प्रवद्र्धन यायेमाःगु खँ बः बियादिइसें म्ये निर्माण याःपिन्त प्रशारण जुइगु च्यानल मार्फत रोयल्टीया नितिं पहल यानाच्वनागु खँ नं कनादील ।
ज्याझ्वः जितेन शाक्यया सभानायोसुइ क्वचाःगु खः ।
