बहुप्रतिक्षित म्ये छंगु लँ स्वैच्वंगु मिखाया प्रिमियर ब्लूज लाउन्जय् मध्यपुर थिमि नगरपालिकाया मेयर मदनसुन्दर श्रेष्ठया मुख्य आतिथ्यताय् जुल । नव प्रतिभा कल्पना श्रेष्ठया न्हापांगु एकल गायन, निर्देशक एवं कलाकार रविन्द्र शाहीया कलाकार कथं न्हापांगु म्युजिक भिडियो अले रेश्मी महर्जनया अभिनय दुथ्यानाच्वंगु थुगु म्युजिक भिडियोया प्रिमियर छगू भव्य समारोहया ग्वसाः आर बि इन्टरटेन्मेन्टं ग्वःगु खः ।
ज्याझ्वलय् बिशेष पाहां कथं मध्यपुर थिमि नगरपालिकाया उप मेयर अन्जना मधिकर्मि नं झायादीगु खः । अले पाहां कथं थिमि नगरपालिकाया ६ नं वडाया अध्यक्ष इन्द्रबहादुर प्रजापति, ईलोहं प्रकाशनया प्रबन्ध निर्देशक नरेश वीर शाक्य, वरिष्ठ सिने पत्रकार बिजयरत्न असंबरे, नेपाली कांग्रेसया नगर सभापति युवा नेता सुरेन्द्र श्रेष्ठ, राष्ट्रिय नाचघरया वरिष्ठ कार्यक्रम प्रमुख प्रभाकर देव शर्मा व युवा व्यवसायि एवं समाजसेवी रत्न प्रजापति नं झायादीगु खः ।
सुष्मा महर्जनं न्ह्याकादीगु थुगु ज्याझ्वलय् म्येया सर्जकपिं संगीतकार बिजय कायस्थ, संगीत संयोजक जुगल डंगोल, म्येहालामि कल्पना श्रेष्ठं म्येया अनुभव प्वंकादीगु खः । जुगल डंगोलं संगीत कम्पोजयात कयाः अकसर रोम्यान्टिक म्ये मेजर स्केलय् जुइगु तर थुगु म्ये धाःसा माइनर स्केलय् कम्पोज यानातःगु व थज्योगु कम्पोज तसकं हे म्हो जुइगु खँ कुलाः कम्पोजर बिजय कायस्थया तारिफ यानादील । उकथं हे बिजय कायस्थं म्ये खँग्व भचा सेन्टिमेन्टल जूगुलिं न्हापा दादरा तालय् कम्पोजयानां लिपा खेम्ता तालय् यंकागु खँ तनादिल । थःगु न्हापांगु अनुभव जुगुलिं कल्पना श्रेष्ठ मचामगागु दुसा सुझावया अपेक्षा यानाच्वनागु खँ तयादील ।
भिडियोया सर्जक पुचःकथं म्ये च्वमि एवं भिडियोया परिकल्पनाकार दर्शनवीर शाक्यं थुगु म्ये छम्ह मतिनामिं पिने लजगा यानाच्वंम्ह थः यज्जु लिहां वइ धगु थीमय् दुनेच्वना च्वयागु व भिजुअलया कन्सेप्ट कथं गनं झ्वाट्ट म्ये तायेदत धाःसा थःत सुं लुमना वइगु परिवेशय् निम्ह मनुखं नं व हे म्ये न्यनाच्वनिगु छगू परिवेशयात न्ह्यब्वयागु खँ कनादिल । म्युजिक भिडियोलय् समाः यानादीम्ह उमिसा पाण्डें म्येया मेकअपय् हाथ्याः दुगु व निर्देशक एवं कलाकार रविन्द्र शाही लिसे ज्या याये खनां लसता प्वंकादील । प्रोडक्शनया ज्याय् तसकं हे हाथ्याः दुगु व क्राउड गुलि अप्वल उलि हे व्यस्वस्थापनयायेत थाकुगु खँ कनादील । डिओपि एवं सम्पादन यानादीम्ह मनोजरत्न शाहीं थुगु म्ये शुट यायेगु निंतिं माःगु लाइट निसें सामान चूलाःगु व धाःथें जाःगु लोकेशन दुगुलिं थुगु म्ये तसकं हे बांलाक्क खिचेयाये खंगु खँ कनादील । म्येया निर्देशक राजन शाहीं हरेक खँय् सकल टिमया उतिकं हे मेहनत दुगु व चिचिधंगु खँय् नं ध्यान बियाःगु खँ कनादिल ।
भिंतुना न्वचु बिइगु झ्वलय् ईलोहं प्रकाशनया प्रवन्ध निर्देशक नरेशवीर शाक्यं थःपिंसं नेवाः कलाकारपिंत तिबः बिइगु निंतिं नं थी थी पत्रपत्रिका प्रकाशन यानाच्वनागु खँ कुलादिलसा थुगु म्ये नं ईलोहं प्रकाशनया युट्युब च्यानलय् हे प्रिमियर नं याःगु खः । म्येया समालोचना यानादीम्ह बिजयरत्न असंबरें थौंकन्हे नेपालभासाया म्येया गुणस्तर बढे जुयाच्वंगु व थुगु म्ये नं व हे झ्वलय् लाः धाःसें थुगु म्ये चिचिधंगु खँय् तकं यक्व हे ध्यान बियातःगु व म्युजिक भिडियो दयेकातःगु स्वयेबलय् बलिउडया म्युजिक भिडियो कथं मेहेनत यानातःगु खँ धयादिल ।
कलाकारया अनुभव प्वंकेगु झ्वलय् रविन्द्र शाहीं थःगु गेटअप खनां थः हे अजूचाःगु खँ कुलादिल । न्हापांखुशी म्युजिक भिडियो म्हितागु व थः न्ह्याब्लें क्लिन सेव जुयाः च्वनेगु व भिडियोलय् ग्वाय् तयाः गेटअप स्वयेबलय् थः हे मखु थें च्वंगु व भिडियोया क्यारेक्टरय् दुहांवनेत यक्व मेहनत यानागु खँ कुलादील । कलाकार रेश्मी महर्जनं सुटिंगया झ्वलय् सुटिंग थें हे मच्वं व तसकं हे कम्र्फट फिल ब्यूगु खँ तयादील । कलाकार कथं कल्पनां थुकी थः छम्ह म्ये हालामि कथं हे प्रस्तुत जुयागु खँ तयाःदिल ।
नाचघरया वरिष्ठ कार्यक्रम प्रमुख प्रभाकर देव शर्मां थः न्हापा तःक्व मछि मुना मदनया नाटक म्हिते धुनागु लिं थुगु भिडियोलं मुनामदन नाटक लुमंका बिल धाःसें थुगु भिजुअलय् मुनामदनया दुखान्त अन्त थें मजुसें मिसा व मिजं नापमलाःसां सुखान्त जुइगु आभस क्यनेत ताःलागु खँ कुलादिल । भिजुअलय् नेवाः संस्कार व संस्कृति क्यनातःगु तसकं हे च्वछायेबह जूगु खँ नं कुलादिल ।
मध्यपुर थिमि नगरपालिकाया उपमेयर मय्जु अन्जना मधिकर्मिं थुगु म्येया निंतिं कल्पना श्रेष्ठ थिमिया म्ह्याय् मचा जुसां थःपिंसं छुं ग्वाहलि याये मफूगु खँ दुःख प्वंकादिल सा वइगु दिनय् कल्पनायात सांगितिक क्षत्रय् न्ह्यां वनेत थःपिसं पूर्ण रुपं ग्वाहलि याये धकाः हःपाः बियादिल ।
मध्यपुर थिमि नगरपालिकाया मेयर भाजु मदन सुन्दर श्रेष्ठं कल्पना श्रेष्ठया कुतःया तारिफ यानादिसँे मध्यपुरया सान जूगु खँ कंसें स्वस्वं हे मगाःगु खँ कुलादिल । म्ये न्यनेबलय् न्हाय्पनय् थिउ व म्ये स्वयेबलय् मिखाय् भ्यलय्पुं धकाः कनादील । ज्याझ्वलय् भिडियोलय् दुथ्यापिं सकल सित मतिनाया चिं मेयर मदनसुन्दर श्रेष्ठ व उपमेयर अन्जना मधिकर्मिं लःल्हानादीगु खःसा पाहाँपिन्त रविन्द्र शाहीं मतिनाया चिं लःल्हानादील ।
ज्याझ्वलय् आर बि इन्टरटेन्मेन्ट पाखें शशिकला मानन्धरं लसकुश यानादीगु खःसा आर बि इन्टरटेन्मेन्टया प्रवन्ध निर्देशक रविन्द्र शाहीया सभापतित्वय् जूगु खः ।
