नेपाल सरकारपाखें हे नेपालभासाया सिनेमायात तिबः बिइ कथं न्हापांगु किपू नगरपालिका चिहाः संकिपा कासा ११४० क्वचाल । स्थानीय तह पाखें न्हापांखुशी आधिकारीक रुपं नेपालभासाया सिनेमायात स्वीकार याःगु वा प्रोत्साहन ब्यूगु, न्ह्यागु धाःसां थुगु दिंन नेपालभासाया मनोरंजन ख्यलय् छगू न्हूगु मोड वःगु दु । थुकीया निंतिं किपू नगरपालिकायात न्ह्याक्व सुभाय् देछाःसां मगाः ।
नेपालभासा ख्यलय् संस्थागत बिकासया अभाव जुयाच्वंगु दु । छुं छुं संस्थागत पलाः ल्ह्वंसां थुकीं छुं धिसिलाक्क न्ह्यांवनेफूगु अवस्था मदुनी । मनोरंजन ख्यःया चिहाः संकिपाः नेपालभासा ख्यलय् न्हूगु लहर कथं नालाच्वंगु दु । न्हूगु पुस्ता लिसें पुलांगु पुस्ता नं मनोरंजनया थुगु बिधाय् आकर्षित जुयाच्वंगु दु । नेपालभासाया बिकास धकाः न्हापा ख्यालः, साहित्य कासा इत्यादि जुयाच्वंगु खःसां थौंया इलय् धाःसा लहर चिहा संकिपा पाखें हे वनाच्वंगु दु । थुगु हे खँयात वाः चायेका किपू नगरपालिकां न्ह्याकुगु थुगु पलाखं धात्थें हे नेपालभासा मनोरंजन ख्यलय् छगू युगया शुरुवात याइगु निश्चितता दु ।
किपू नगरपालिकां भिजिट नेपालया आज्जु तयाः हे किपूया प्रवद्र्धनयाये धकाः हे गुगु फिल्म फेस्टिभलया अवधारणा हःगु खः उकि ब्वति कायेगु निंतिं हे मुक्कं ७गू चिहा संकिपा निर्माण जूगु खः । थुकी ब्वति काःगु संकिपा कथं न्हेका सिं, साःगः, किपू देय्, बाखँ मखु थ्व खँ , अर्ति, लाखे पाः व आजुद्यः खः । मुक्कं किर्तिपूरया बिषयलय् जक दयेकुगु थुगु चिहाः प्याखनं किर्तिपूरया बारे अझं थप रोचक सामाग्री पितब्यूगु दु ।
लाखे पाः
न्हापांम्ह मिसा उपन्यासकार शशिकला मानन्धरया न्ह्यब्वया लाखे पाः छगू लोकबाखनय् आधारीत दु । किपूलिइ लाखय्यात पाः च्वंवनेमाःगु इलय् इन्द्रायणी द्यःयात पुकारयाना लाखय् यात स्याइगु बाखँ थुकी दु । कलाकार कथं शशिकला मानन्धर, अन्नपूर्णेश्वरी थुकी म्हिताच्वंगु दु । थुगु प्याखँ आर्यम नकःमिं निर्देशन यागु खः ।
साःगः
किर्तिपूरय् पृथ्वीनारायण शाहलं त्याकेधुंकाःया असर गथे जुल धकाः साःगः प्याखनय् न्ह्यब्वयातःगु दु । राजेन्द्र मान शाक्य व सुरज व्यंजनकारया मू भुमिका दुगु थुगु प्याखँ नेपाः च्यानलया न्ह्यब्वया खःसा थुगु प्याखँ प्रदिप खड्गीं निर्देशन यागु खः ।
बाखँ मखु थ्व खँ
धुँ देय् प्रोडक्सन प्रा लि किपूया न्ह्यब्वयाय् बाखँ मखु थ्व खँय् निम्ह मतिनामिया बाखँ क्यनातःगु दु । स्थापना यानातःपिं द्यःया भक्तिभावं मनूया बानी व्यवहार हिलावनिं धैगु सन्देश थुकी बियातःगु दु । थुगु प्याखँ रविन्द्र महर्जनं निर्देशन यागु खः ।
किपू देय्
नरेन महर्जनया निर्देशन व च्वसाय् किपू देय् छगू लिरिकल डकुड्रामा दयेकातःगु खः । पृथ्वीनारायण शाहया उदय व शाहवंशया अन्त तकं थुकी एनिमेशनया ग्वाहलिं क्यनातःगु दु । एनिमेशनया माध्यमं छगू बिस्कं सवाः थुकी बियाच्वंगु दुसा शोभा महर्जन व राज्यलक्ष्मी नं थुकी म्हिताच्वंगु दु ।
अर्ति
पृथ्वीनारायण शाहलं किर्तिपूर त्याकेत गनं प्रेरणा काल धैगु बाखँया लिधंसाय् थुगु चीहा प्याखँ दयेकातःगु खः । सुरेश महर्जन, सनिश शाक्य व सजिना महर्जनया भुमिका थुकी दु । लोक जनस्रुतिइ आधारित थुगु प्याखनय् सागर महर्जनं निर्देशन याःगु खः ।
आजु द्यः
बागभैरवया लोक बाखनय् आधारीत थुगु प्याखँ नेवाःयुट्युब पाखें निर्माण याःगु प्याखँ खः । योवन शाक्यया निर्देशनय् तयार जूगु थुगु प्याखनय् सरिता बज्राचार्य, अमन महर्जनया भुमिका दु ।
न्हेका सिं
भाजंगलय् पासापिं क्याम्प फायर याःवनीगु इलय् अन छुं अप्रिय घटना जुइ गुकिंयाना प्यम्ह पासापिं मध्य छम्ह पासा बेहोस जुइ । व बेहोस जुम्ह मिसायात छम्ह रहश्यमयी मनुखं होसय् हयाः भाजंगःलय् जूगु छगू बाखँ कनिं । थुकी शुशिल राजोपाध्याय व कृष्णभक्त महर्जनया मू भुमिका दुसा थुगु प्याखँ प्रदीप खड्गीं हे निर्देशन यागु खः ।
थुगु कासाय् साःगः न्हाप लाःगु खःसा, आजु द्यः ल्यू लात । लियां ल्यू लाखय् पाः व हःपा कथं न्हेका सिं लाःगु खः।
