रामवीर मानन्धर छम्ह बहुायामिक व्यक्तित्व । वय्कःया थी थी आयाम मध्यय् गायन पक्ष नं खः । वय्कःया गायन पक्षया बिषयस जक हे चर्चा यानास्वये । वय्कःयात म्ये हाले तसकं यः । छम्ह जनमतं त्याःम्ह व्यक्ति खःसां इलय्ब्यलय् औपचारिक अनौपचारिक ज्याझ्वलय् नं वय्कलं माइक ज्वनेगु मत्वतु । सामाजिक संजालय् मद्दिक्क म्ये हालाच्वंपिन्त नं वय्कलं माक्वं अभ्यास याना जक म्ये हाः धकाः मंचं हे नं छ्याता नं बियादिइ ।
छुं ई न्ह्यः मन्त्री पदय् हे च्वना, औपचारिक रूपं हे लगातार ४ घण्टा ५ मिनेट २० सेकेण्ड म्ये हाला वय्कः गिनिस वल्र्ड रेकर्ड तयेत ताःलागु दु । वय्कःयात भिंतुना ।
शहरी विकास राज्यमन्त्री रामवीर मानन्धरं विश्व मंचय् एकल गायनया रेकर्ड तयेत ताःलागु बांलागु हे खँ खत । थुकथंया रेकर्डं नेपाःया संगीत ख्यलय् गुकथंया उत्साह वल वा ह्यूपाः वल धयागु खँय् मुल्यांकन जुइमाःगु स्थीति दु । राज्यमन्त्री रामवीरया गायन पाखे मन क्वसाःगु खःसां नेपाःया म्ये वा नेवाः म्ये छपू नं रेकर्ड जुयाः पिहांवःगु मदुनि । छपु हे म्ये पिमकाःम्ह मनूयात झीसं केवल छम्ह शौखीन गायक जक धाये फइ । तर थथे धायेवं तुं वय्कःया उपलब्धीयात झीसं म्हो आकंलन यायेगु खँ जुइ मखु । बहुआयामिक ब्यक्तित्व रामवीर मानन्धरं थुगु उपलब्धीयात संस्थागत याना यंकेमाःगु दु अले न्हूगायक लिसें वरिष्ठ म्येहालामिपिंत नं उचित सम्मानया व्यस्था आः थुगु हे प्लाय्टफर्म पाखें यंकेमाः ।
संगीतया लगाव मात्र क्षणिक जुइ मखु धयागु सन्देश राज्यमन्त्री रामवीर मानन्धरं ब्यूगु दु । वय्कलं थःगु रीयाज मत्वता धकाः मन्चय् च्वना हे न्ववानादी । तर छुं नं उपलब्धीयात संस्थागत याये मफूगु वा सोच मवनीगु हे झीगु कमजोरी खः । विश्वय् थःगु गायन कला न्ह्यब्वये धुंकाः आः राज्यमन्त्री मानन्धरया संगीत क्षत्रय् गज्योगु पलाः वइ धयागुु खँय् सकसिया मिखा वनाच्वंगु दु, व वनाच्वने हे माः ।
कला व संगीत छगू स्वतन्त्र विधा खः । थुकी मेमेगु खँ ल्वाकछ्याये मज्यु व ल्वाकाज्याइ नं मखु । सुयांगु नं सः, संगीत व कलायात त्वपुनां त्वपुइ फइमखु । लगन व इच्छा दतले व निरन्तर न्ह्यानातुं च्वनीं । तर रेकर्डया नामय् छगू कुतः धुंकाः मेगु कुतः मजुइगु खःसा वा थ्व रेकर्ड जिगु नामय् दु धकाः च्वनेगु खःसा थज्योगु रेकर्डं झी गननं थ्यनि मखु । नेपालभासाया संगीत ख्यः अथें ल्यूने लानाच्वंगु दु । थन फुक्कं हे कुतः व्यक्तिगत जक हे खः। संस्थागत कुतः जुइ फूगु अवस्था मदुनि । थ्व पाखे ध्यान सकस्यां वने हे माः ।
